Kai太的懷孕日記 @ 生左喇！！！

我已經生完三個月喇！而家先有時間嚟記錄返。之前睇人地d blog，好好奇點解咁少有關「生產記」的文章......好多都係寫到生之前，跟住就係一年後BB大個左。生完仔原來真係好忙好忙好忙，趁仲有記憶，要記錄低個過程先。

話說我去到39週5都未有生產的跡象，聽講到40週都冇動靜就要預約時間入院催生，要塞藥令宮頸開，催生仲要唔一定成功，如果過程唔順利，有可能要緊急開刀。去到39週6，我疊埋心水等第二日朝早去醫院見醫生，晚上沖完涼洗完頭，正準備上床之制......突然feel到個肚陰陰痛，呢種似平時突然一下果種陣痛，但係今次比平時痛少少，同埋last左廿零秒左右。跟住我同老公講：「咦，唔知係唔係開始陣痛呢」之前做晒功課，如果持續出現有規律的陣痛，例如每隔十幾分鐘一次，每次持續30秒左右，就要準備去醫院。果陣已經凌晨2點幾，好眼瞓，第一胎冇咁快嘅，諗住如果瞓到都係瞓醒先算。點知大約10分鐘後，再出現一次陣痛，同樣last左30秒左右。唔對路喎，好似真係。如是者，我地開始計時，再等多10分鐘睇下係咪真，當出現第三次陣痛時，我同老公講要執野去醫院喇。凌晨三點幾爬起身，執定走佬袋，銀包，身份證，同老公搭的士去廣華醫院。

約4點半左右到達廣華醫院辦理入院手續，老公陪到我入左院就返屋企休息，醫生幫我check左宮頸一度都未開，八點幾轉左去產前房等照超聲波，當時仲係可接受嘅痛。照完超聲波醫生話我有排都未生，所以轉左我去普通病房。到11點，仲係典床典蓆，痛下瞓下咁，keep住每隔10-15分鐘痛一次，痛楚類似M痛咁。下午1點，探病時間，老公同奶奶嚟左，見到佢地好開心，老公同奶奶幫我按摩舒緩下痛楚，到1點9，突然覺得好急去左BooBoo，陣痛真係會覺得好急屎，痾痾下就見紅喇。同左姑娘講，佢地話正常，陣間會搵醫生嚟check。我有朋友痛左3日先生，好驚自己都會咁，之前網上搵到個「加速宮頸開」嘅偏方，就係開到1-2度時飲濃蜜糖水，據聞好多人試過都話work，於是我就在2點左右飲左，但係太甜喇，飲左一半已經頂唔順，再飲就嘔，希望work啦。然後成個下晝就係瞓下醒下，在床上典來典去，每次開始陣痛都用「拉梅茲呼吸法」，4點醫生巡房時幫我駁心機，同check宮頸，痛左咁耐仲係開左1度左右。等到夜晚7點左右，越痛越密，產前房有位轉返落產前房，再check已經開左4度喇，醫生幫我人手穿水，又唔係d人講得咁痛，陣痛果下收縮比起穿水痛好多，穿左羊水後，有股暖流從下面流出。8點半，已經痛到不醒人事，醫生叫我去坐波波，可以加快宮頸開同舒緩陣痛，Un左半個鐘左右，唔覺得可以減痛幾多......不過可以分散注意力。Un完波波，返去駁機再check。其實駁左咁多次機，我都唔係好知駁果個係咩機，只係知貼左好多野在肚度，唔係好舒服，有個joystick俾我揸住，如果feel到BB郁就按一下。期間醫生幫我用音樂療法減痛，我閉上眼，Keep住「拉梅茲呼吸法」，一邊忍痛一邊後悔點解唔開刀，每次陣痛果下來臨，真係痛到想死，好想痾佢出嚟，但係姑娘叫我唔好亂用力，咁樣會傷到BB，為左BB，我一直咬緊牙關繼續忍，一直捱到10點，醫生幫我再check，已經開左8度，醫生同姑娘都讚我呼吸得好好，產程好順利，如果有位就轉我去產房，會通知我老公stand by。跟住好快就轉左落產房，進入第二產程，助產士小組d姑娘圍住我，同我講解一陣生產時的技巧與姿勢，插尿喉放尿，同埋清理陣痛期間唔覺意排出的便便，有個護士長同我講，好少人在預產期當日生，仲話有預感BB會在12月16日出世，跟住我在老公陪同下，努力左個幾鐘，終於生左阿B出嚟。初初我都以為佢會在16號出世，但係阿媽唔爭氣，必極都必唔到，用錯晒d力，所以最後佢係17號凌晨先出世。

生完果一刻成身散晒，個腦一片空白，feel到下面好痛，成身都係汗，同埋覺得好眼瞓......期待與阿B見面的一刻。由於廣華係愛嬰醫院，所以生完之後，好快就將BB放喺媽媽心口，見到佢，真係覺得好感動，亦同時覺得自己好叻，可以成功順產無用任何藥物止痛嘅情況下生左佢出嚟。進入第三產程，助產士幫我善後，拎胎盤出來，同埋幫傷口聯針。因為我夠位生，所以沒有剪到陰部，只係自然生產時造成撕裂的傷痕。其實我係想剪架，因為剪左傷口埋得靚d。

生完果刻我同自己講下一胎都係開刀算，但過左三個月，而家再問我，我都係會揀返順產。雖然順產過程係好辛苦，但係見到BB健健康康，自己又可以復完得快d，都係值得嘅。少少Tips：
1) 懷孕期間如果可以媽媽請多做運動，瑜珈游水都是好的
2) 「拉梅茲呼吸法」真係好有用，我捱到廿幾個鐘都係靠佢
3) 唔知係咪真係飲蜜糖水幫到呢，我由1度變8度都係用左八個鐘，但都冇害一試無妨
4) 下一次，我會練習好生產的姿勢，個人認為那兩個典型生產姿勢都係好難用力，點解講座冇教嘅呢......生完之後我周身骨痛，好似俾人打左一身，同參加完三項鐵人賽咁，令我之後三日住院都好辛苦，完全影響我照顧BB

謝謝收看，祝各位準媽媽都可以生產順利，奶源滾滾！

P.S.下次再分享下餵母乳的辛酸史

Kai太的懷孕日記 @ 廣華產檢 (39w)

今日已經39週喇，仲未生得，所以要去廣華產檢。
都係例行檢查一下，量血壓、驗小便、聽心跳、摸肚仔、度肚Size等，助產士姑娘話一切正常，跟住就俾左下次產檢日期 (40週)，佢話如果下星期都未有動靜，就會預約日期入院催生。仔呀仔，係咪媽媽子宮太舒服你唔捨得出嚟呀？已經放左個幾禮拜產假，希望唔洗等催生啦，如果唔係之後唔夠時間照顧BB。

產檢完去左永安睇電磁爐用瓦煲，終於搵到喇，係想要果個4.5L size，但係個Sales話唔可以用嚟煲薑醋，亦唔可以長期浸住薑醋，我問：「如果我淨係翻熱呢？」佢話翻熱薑醋都唔得，話因為薑醋會滲左入去底部，影響d電磁粉甩，令到個煲會接觸唔到個爐，咁點算呀？我得電磁爐咪即係冇得煲薑醋！？一場歡喜一場空。

奶奶話可以用電子瓦罉，我地去左地庫果層睇，見到有呀，可以插電慳返個爐頭位添！做過Research搵到幾隻牌子，最平係Homey，跟住係伊瑪牌，最貴係Panasonic。太好了，終於解決煲薑醋嘅問題！

Kai太的懷孕日記 @ 廣華產檢 (37w5d)

已經37週喇，轉入大直路。今日又去廣華度產檢，今次好快啊！約左10:45AM，等到12點左右就有得睇，助產士姑娘好好人，除左幫我檢查肚仔大細同聽心跳外，仲幫我照左超聲波 >v< 明明之前廣華話除左唐氏果次以後都唔再照架喇，突然有得見ｂｂ覺得好開心。

照到頭仔額頭對上已經落左骨盤，我問姑娘幾時會入晒盤架？佢話：「如果成個頭入晒盤骨就已經生得架喇」

我問姑娘我一星期重左３磅幾係咪唔正常，佢話可能係水腫，唔洗太擔心，不過都有提醒我，現階段唔好咁為食，因為而家會好吸收，唔好食咁甜，而家ｂｂ約3KG，摸落都幾好肉地，Size差不多了，以我嘅身形，細細粒會易生d 。

依個禮拜成日個肚都好硬，又成日feel到個肚陰陰痛，好似M痛咁，但係又冇規律架喎。姑娘話咁代表個子宮已經成熟，隨時準備好生產，佢硬左其實係供血俾ｂｂ，正常的。最後，姑娘仲有教我肚仔按摩法催產，佢話由而家開始每晚10:30pm左右就上床準備瞓，臨瞓前幫肚仔同大脾分別做15min催產按摩，咁樣到凌晨兩點左右，身體就會分泌催產素，係好嘅荷爾蒙，可以幫助生產。下次產檢日期係12月9日，到時已經39週，姑娘話通常d媽媽做完催產按摩唔洗幾日，就會產房見。

Kai太的懷孕日記 @ 廣華產檢 (36w5d)

話咁快又到產檢嘅日子，今日預約時間係10:20am，天陰陰，雨濛濛，天文台仲話今晚氣溫會跌到落15度，搞到要帶定件褸出門口，好輪盡。

已經36週5，今日除左見助產士仲要見醫生，先去量血壓及驗小便，然後如常地等等等，今日好多人，助產士小組姑娘話唔夠人手，所以平時由小組做的量血壓及驗小便轉左出去大堂做。等到大概12點左右，助產士姑娘終於見我，仲叫左幾位媽媽，一次過講。問我地執好走佬袋未，最好分開兩個袋，一個裝定床墊、產婦衛生巾、尿片兩片、杯等，以防突發穿水入院可以即刻走，其他野可以遲ｄ請家人拎過嚟。跟住就係留意胎動情況，如果ＢＢ郁少左，或者覺得佢突然郁得好勁，好似掙扎緊咁，唔安心都可以入院Check下。如發生規律陣痛，住得唔遠可以慢慢等到痛10分鐘先一次才入院都得，第一產程通常痛好耐。坐我隔離果位媽媽，原來已經40週了！姑娘話今日醫生會同佢講關於催生嘅野。Oh，希望我唔洗等到40週催生啦，ＢＢ在肚裡住得越耐，就越大隻，生嘅時候就越辛苦架喇^^"

見完小組姑娘，就坐出大堂等見醫生，大概等左十幾分鐘就入房lu。第一件事就係瞓上床俾醫生姑娘聽心跳、摸肚、度肚皮Size，過程極迅速，check過一切正常就去返位度坐。磅重61.9kg，醫生叫我keep返均衡飲食，唔好食咁多甜野肥膩野，仲有話我知Ｂ型鏈球抹片測試過關，然後就叫我走得喇。我都冇機會問問題添，只係問左一條問題，佢地可能太忙，想我快ｄ走。下次產檢日期係11月30日，一星期後，嚟緊會每一星期產檢一次直到ＢＢ出世。

Kai太的懷孕日記 @ 廣華驗B鏈 + 美素佳兒禮物 (35w4d)

已經好耐好耐冇寫懷孕日記喇，不知不覺懷孕35週幾，時間過得好快呀！今日下晝去左廣華度驗B鏈 (乙型鏈球菌)，明明記得好似係好快，點知我等左成粒鐘都未叫我，覺得唔對路......走去問登記護士，驗B鏈覆診紙係咪都係放入助產士小組個兜度，佢話係，跟住我又繼續等，飯都未食，等到勁肚餓......

好彩姑娘發現得早，原來驗B鏈唔係排助產士小組，而係直接去登記處入紙排見醫生T^T

白白等左粒幾鐘......

等左一陣，已經入去見醫生，有位女醫生同女護士幫我採集組織化驗，冇咁尷尬。醫生叫我除褲瞓上床，然後佢就將儀器放入陰道同肛門中採集樣本，過程中有少少唔舒服，不過好快就搞掂，拎埋到診紙就走得。

乙型鏈球菌常見於腸道、女性陰道，一般不會致病，惟孕婦一旦帶菌，可增加死胎或新生嬰兒中招風險。約10%至30%懷孕婦女的陰道或直腸拭子樣本中可找到乙型鏈球菌。雖然媽媽本身沒有症狀，但生產過程中，新生兒經過產道時，會遭到感染，盛行率約千分之一。乙型鏈球菌也會引起早產、死產或是流產的問題。孕婦在懷孕35至37周時，應接受陰道及肛門B型鏈球菌的例行篩檢，發現帶菌的孕婦，在分娩前使用有效的抗生素治療，可減少約7成的早發性感染。

下星期又去產檢，到時應該公佈結果喇，希望唔好中啦。

返屋企，去郵局取件，原來係美素佳兒寄來的禮物，係一個好靚嘅牛牛BB車掛袋同埋一本育兒書。美素佳兒真係好窩心呀，成日都送咁多野，送d禮物仲好實用添^^

最surprise係佢有個Checklist，雖然好簡單，但印刷好精美又實用，特別係對我呢d仲未執齊走佬袋嘅人，真係好貼心

仲有本書仔，真係要大力推薦！之前已經送左一本「開心懷孕篇」育兒書，裡面講懷孕時會遇到的階段，由發現懷孕1個月至10個月，胎兒成長、媽媽營養與飲食、準備生產、產後護理等知識，內容非常實用呀！今次呢本係講生左之後，BB成長嘅各種階段，由零歲講到歲半，咩階段食咩、咩階段寶寶成長會有咩變化等，連疫苗注射一覽表，勁實用呀！(心心眼)

 我同老公都覺得好正，多謝美素佳兒。

個牛牛袋都好靚，可以掛BB床，又可以掛BB車，size唔太大，啱啱好可以放d BB濕紙巾呀、紗巾仔等，出街正晒。

Kai太的懷孕日記 @ 廣華產檢 (33w5d)

今日又係一個月一次嘅產檢，本身約左10:30，人流同平時差唔多，等待嘅過程有個姑娘問我願唔願意參加一個「實驗計劃」，佢會搵240對夫婦，抽籤分成兩組，一組係按摩組，一組係非按摩組，抽中按摩組的夫婦，醫院會安排上「產前按摩班」，然後在產前利用按摩的方式減痛；另一組就完全唔俾按摩，其他減痛方法都用得。因為我地之前報唔到按摩班，報到果班已經係預產期，所以好想試下運氣。本人係非常支持非藥物式減痛方法的，因為對BB的副作用減到最低，不過...希望還希望，運氣差的我抽中左「control group」，即係冇按摩組XD
有少少失望，不過唔緊要啦，仲有其他方法家嘛。

等到約12點幾可以見姑娘，佢循例幫我摸肚仔，聽BB心跳，Size正常，佢仲話BB背脊在左邊，咦，明明在右邊架，之前照幾次超聲波都係右邊。頭仔在下面，佢仲叫我用手摸：「你摸下，頭仔係呢度呀」但係我摸完都唔覺得果個係頭XD 姑娘好勁。今日產檢仲有份問卷要填，主要係考我對餵母乳嘅知識。因為之前有聽過醫院產前講座，所以全部都答啱晒。

對返上次個驗血報告，血色素已經回升返至11.4，姑娘話依個數字好靚，可以唔洗再食鐵丸～不過都要繼續食返多d紅肉同埋深綠色蔬菜。

Kai太的懷孕日記 @ 廣華產檢 (30w5d)

尋日開始作病，俾老公傳染左，今次隻菌好惡，只係一晚就已經惡化得好緊要。鼻水倒流落喉嚨好辛苦，吞每一啖口水都勁痛，完全瞓唔到......T^T

今朝仲要去產檢，又是漫長的等待......今日比平時辛苦，又要等抽血，等到12點半，終於有得見姑娘。佢幫我摸肚仔，聽BB心跳，好快就見完。我問姑娘可唔可以見醫生開d藥俾我食，因為我感冒真的很辛苦，佢就話如果要見醫生都可以，但要再等多個幾鐘，起碼等到1點9......橫掂出去睇都係要等，唔想行來行去喇，所以答應等，而家最想食藥。

見完姑娘仲未走得，要排隊抽血，但我已經餓到不得了......上次產檢姑娘話抽血唔洗空腹，但唔好食咁豐富嘅早餐，所以我唔敢食咁多，而家後悔了。12點9，抽完血後繼續等醫生，點知姑娘走出嚟搵我，佢話唔洗見醫生了，佢將我d病徵同左醫生講，醫生開左d藥俾我，未見醫生就開到藥，真係第一次，不過唔洗錢就算啦，最緊要有藥食。

跟住我落去地下藥部拎埋d藥就去食飯，剩係等藥都等左半個鐘......今日真係過得好漫長。

Kai太的懷孕日記 @ 廣華產前講座 + 護協購物記 (27w1d)

今個月係講座月，每個星期六都貢獻左俾產前講座。今朝都唔例外，去廣華聽「產後護理及營養」。聽完之後我地去左佐敦護協度買野，趁而家仲行得走得，要快ｄ買齊晒需要嘅ＢＢ用品先得。朋友話ＢＢ用品去護協買平ｄ，除左護協會員之外，用「惠氏媽媽會」卡都可以買。

香港護士協會（親子天地）
http://www.nurse.org.hk/
地址：九龍佐敦白加士街25-27號慶雲商業大廈一樓
電話：2314 6925
營業時間：星期一至五10:30 am - 7:00 pm；星期六10:30 am - 4:00 pm (星期日及公眾假期休息)

之前冇格過價，所以我都唔知實質平幾多。但係見到哺乳圍巾幾平，有兩款，大概七十幾至八十幾蚊，質地都ok，不過因為冇乜花揀，最後冇買到。事前無做功課，今次只係買左三樣野，澳洲Emotion & kids的純綿薄紗巾(120cm x 140cm)$84，SoftTouch嬰兒專用消毒綿花球$19/250粒，同埋孕婦胸圍。依樣野一樣想買好耐好耐，但係完全唔知應該買咩Size好！網上爬文都好少人分享...但係距離生嘅日子越近，個胸就越大，唔買仲keep住著有鋼綫嘅bra會對個胸好唔健康。依款幾好，有胸墊同延長背鉤。有關試著感，請看下篇。

Kai太的懷孕日記 @ 廣華產檢 (26w5d)

26w6d，肚仔已經37.5吋喇, 重56.4kg 今日去廣華產檢，姑娘話我肚仔大小適中，胎水正常，如果keep住咁嘅進度，到時應該會好好生。哈哈，係就好喇∼姑娘有提話37週足月後就唔好飲d咁杰嘅湯水，因為會令到d奶水好杰，影響分泌。 姑娘聽弘弘心跳時，弘弘踢左姑娘兩腳，個胎心機一放落肚皮佢就踢，好百厭呢。 下次產檢係四週後，到時就要抽血化驗血糖，我一直最擔心嘅妊娠唐尿就會揭盅喇！

Kai太的懷孕日記 @ 私家產檢 + 廣華講座 (26w1d)

每一次產檢心情都是興奮的！今日又去見我們的心肝寶貝弘弘b了～
對上一次照超聲波已經係7月30日照結構果日，差不多個半月前，真係等到頸都長。今次又去返尤醫生度，約左10:15am，等左55分鐘左右。一見面醫生同我地回顧返上次17週時嘅紀錄，佢話上次BB前臂同小腿長度爭少少，以威院個標準係合格，但以其他醫院個標準就短左少少，今次26週，目標係前臂4cm，小腿4.4cm。度之前有d緊張，因為已經好耐冇照過，唔知ＢＢ生長速度如何，照完後鬆一口氣，手仔有4.35cm長，腳仔有4.59cm長，重0.9kg (約2磅1安士)，符合標準。不過今次佢冇咁乖俾我地睇個靚樣喇，用對手仔遮住左，只係睇到個靚耳仔同腳仔。至於位置呢，而家頭仔向下，眼望我右邊身，所以而家佢郁都係右邊肚皮彈彈下。

Kai太的懷孕日記 @ 廣華產檢 (21w5d)

話咁快又到左產檢嘅日子，今日第一次見助產士小組，本來約左11:15am，點知我記錯時間係12點，一起身就飛的過去，遲左20min......好彩冇事。幾驚佢唔俾我睇，因為張覆診紙上寫遲到就要重新預約。

一到左就驗小便，浸落d尿尿度，好快變左深綠色，平時驗完俾張試紙姑娘望兩望就會叫我掉左張試紙。但今日姑娘見到話「小便唔合格」，「超唔合格」，叫我再驗過。我立即忍唔住「下」左一聲，我問姑娘關唔關我食完早餐事，佢話唔知，好難講，叫我飲多ｄ水之後返嚟再驗過。聽人講食完野後兩個鐘血糖會偏高，今朝我仲要食左兩塊蛋沙律三文治同飲左一盒紙包牛奶。於是我就買左樽水，狂飲，坐低等再急尿。

等到12:35pm，見急急地，就去廁所再驗多次，今次張試紙中間黃色，圍邊現左少少綠色，但姑娘話都係爭少少，跟住佢要我再留多次小便，要拎去種菌化驗。慘喇，我好驚會中「妊娠糖尿病」，千祈千祈唔好中呀，please！！！

等候驗小便嘅期間，快速咁完成埋產檢。見我果位姑娘姓黃/王，都幾好人。首先佢幫我睇下肚仔size同埋聽BB心跳，約156下。然後就坐低，為我講解上次的抽血報告，大概正常，除左話我紅血球唔夠多，10以下唔合格，我個度數係10.9，算合格，但姑娘想我多d，所以開左d鐵丸俾我食，因為紅血球具有將氧氣運送到全身的作用，如果紅血球不足，會造成氧氣不夠，變成貧血。身體一旦缺鐵，紅血球內的血紅素會製造不足，引起缺鐵性貧血。特別係生完BB可能會大量失血，如果數值太低，可能會導致產後貧血。食左鐵丸要飲多d水，如果唔係可能會便秘，仲有大便會變黑。

另外，姑娘仲俾左本生產計劃書我，主要係填寫返生產及產後的個人意願。
13:15pm，留埋最後一次小便，跟住就走得。

Kai太的懷孕日記 @ 產檢 (15w4d)

15週，以為有得見BB，原來廣華係無照超聲波架，除左唐氏果次同你照，之後都唔會再照。產檢時間係10:15，今次去返徐展堂大樓果邊四樓，唔係產科10樓。去到等叫名，去左血壓站，循例又量血壓、度高、磅重，都好正路，點知量完血壓竟然叫我去抽血站，當堂呆左一呆，下？又抽血？上次咪抽左囉！在完全無心理準備情況底下⋯⋯又經歷了一次抽血😭 抽完血就去大堂等叫名。
等候期間，有個姑娘叫左幾個身穿白袍的少女過嚟，話想同我做個訪問，原來佢地係香港大學嘅學生，想同孕婦做個調查。幫學生我最樂意架喇，於是就一口氣填了幾頁紙問卷，內容主要都係圍繞孕婦在懷孕初期的情緒變化，有沒有童年陰影等。除左做問卷，佢地仲幫我download左個App，開左個account，叫「懷孕寶典」，我之前都下載過，但見要login所以delete左。個App裡面有好多關於懷孕的知識短片，和常見問題，最正嘅係我仲可以自己發問問題，醫生得閒見到會在個App度答返我，勁好呀！另外，個妹妹仲話生完之後一個月內佢地都會打電話俾我同我跟進返個情況，訪問下我，又幾好喎。
完左依part，我又繼續等了又等⋯⋯今日唔知點解咁多人，個大堂坐滿晒，好似急症寫輪街症咁😓
等左半粒鐘，終於入房見醫生喇，好期待！
但係入到去佢係叫我坐低喎，個醫生問左我d general問題，然後就叫我入去瞓上床，姑娘叫我除埋個bra扣，一心以為照超聲波嘅我極度失望，原來姑娘只係幫我check心跳，聽到BB有心跳就安心了，跟住就到醫生入嚟check乳房，大概係睇下有無硬塊。好快速check完就坐返低，佢繼續問問題，感覺醫生好冷冰冰同hea，明明上次照唐氏姑娘話今次會詳細d check，再出個準確的預產期，點知醫生竟然跟返上次照唐氏個結果就算數，預產期係12月16日。跟住就出返去大廳等⋯⋯⋯

等到差不多12點，終於叫我個名喇。除左我、仲有另外兩個孕婦，被一齊帶去個房仔。入到去有兩個姑娘，佢話佢地係助產士小組，今次叫我地嚟係想問下我地有無興趣參加助產士小組，加入左以後嘅產檢直到生都係由助產士小組負責跟進，如果唔加入，就好似今日咁排返見醫生，但次次都唔同人。我都無乜點諗過就第一個決定加入！之前上網睇過好多人都讚廣華生好，特別係助產士小組，個個好專業，同埋唔係你想入就入到，要身體健康無咩大問題先得，所以好快就決定加入。

今日去時同離開時在廣華醫院門外，見到有一些姨姨手拿各間不同牌子的媽媽會登記表格，她們會給你在街上填寫，及刻時給你一份小禮品，拎埋一大袋禮物，滿載而歸。

今日都拎左媽媽手冊同預產期醫生紙了！可以上網報班😄

不過6月暫時出到8月個schedule，大部份已經full晒。每月第一日9點就會公佈兩個月後的schedule，7月頭才出9月的，因7月1日是公眾假期，所以順延至7月2日早上9點才可報名。

排左期下次產檢係8月10日。

Kai太的懷孕日記 @ 驗唐氏 (11w3d)

今日又去做產檢了，度頸皮驗唐氏。
姑娘話初步睇BB都ok，一切正常。
BB身長4.5cm，大概11週3日，預產期12月16日，只係同我地自己計嘅日子相差1日。
抽血化驗結果要等兩星期，如果有問題會通知我，無問題就唔會。
今日見到BB大隻左好多，見到佢個心臟跳跳下，同埋佢d手手腳腳郁郁下，好得意呀。睇嚟佢係個活潑小B。

今次又係冇相留念，網上搵到張比較似今日見到嘅畫面，Keep返個Record

Kai太的懷孕日記 @ 照左陰道超聲波 (8w5d)

今日在廣華做左之前急症室轉介嘅「早孕評估」，照左陰道超聲波，聽到BB心跳，醫生話一切正常，而家估計8週左右。今次好響亮呀！
問左醫生可唔可以搭飛機，醫生話無規定一定唔得，看媽媽身體，不過就算飛，盡量去d醫療發達的國家，例如日本、泰國布吉、印尼峇里島都可以，咁去到當地有咩依郁都可以去醫院。
做超聲波檢查，$1都唔洗俾，需然政府比較簡單，無講咁多野，不過作為簡單檢查，真係好抵呀！家計會做同類檢查要$500，私家醫生做最平都要$680，政府$0，太抵喇。

P.S.無相留念，唯有偷網上一張圖嚟做紀錄，依張比較接近我看到的畫面

Kai太的懷孕日記 @ 睇急症 (8w1d)

今日聽朋友講，直接去左廣華急症室。懷孕見紅被分流到「緊急」，等待的期間好緊張，亦有被分流的醫護人員鬧我點解咁遲嚟，仲話「份工緊要定BB緊要丫？你知唔知飛機有幅射架？」我真係唔知原來飛機有幅射⋯⋯ 跟住醫生幫我照超聲波，第一次照醫生話照唔到BB心跳⋯⋯果一刻我好驚，驚係因為我所以搞成咁。然後醫生就話叫我不如入院再照真d，如果真係無心跳就要做流產手術。


跟住心情好沈重，出去等消息。等左一陣，第二個醫生見我話幫我再照多次，今次佢照低d，照到落膀胱個位，照下照下，我默默望住個Mon，心裡期待奇蹟。跟住過多陣，醫生話：「BB係有心跳嘅」我立即鬆左口氣，識笑返喇，然後醫生仲開左個心跳線俾我睇同聽，卜卜卜卜卜卜卜，好快嘅心跳聲一下一下咁，我終於聽到BB心跳喇><

果一下好感動，眼角流左一滴淚。然後姑娘話，果粒白點就係BB喇，見唔見到呀？醫生用mouse point去俾我睇，我見到BB好細粒，好似一粒豆咁，見到佢好開心，感覺生命好頑強。
Check到有心跳都唔洗咁擔心，佢話依個情況發生流產嘅機會係3-15%，流啡即係「作小產」，暫時醫學上係無藥食左可以阻止依個情況，叫我多d休息。

然後醫生再幫我檢查陰道出血嘅情況嚴唔嚴重，好彩無咩血，應該只係子宮慢慢流出嚟。
開左5日假紙，同時安排我下星期11號再去婦產科作詳細的檢查。
太好喇～～～～～BB無事，以後我會小心d架喇

Kai太的懷孕日記 @ 廣華產科登記 - 我的猴BB

今朝一早去左廣華度登記，新手媽媽乜都唔識，已經生過兩胎的好友同我講，話我而家「時間就是金錢」，有左「懷孕證明」應該第一時間應該登記左醫院先，因為排期驗早期唐氏需要在11-13週期間做，錯過左黃金時間就要排中期唐氏，準確度低好多。

一早起身打左去醫院Check，知道九點就開門，所以Kai先生陪我在返工前去登記左先。產科新症預約在徐展堂門診大樓四樓，上到去排隊登記，填Form，等左一陣，醫院出左兩個產檢日期俾我，對清楚無問題就走得。
１）5月30日 驗唐氏
２）6月28日 產檢

不過提提大家：
．登記產科要帶埋住址證明，去之前Check清楚係咪果區先，如果唔係醫院有可能唔收。
．懷孕證明醫院會收左，如果你得一張Copy，最好預先影印定留底。

一直好想生猴BB，但係人生計劃又未ready，所以一直十五十六，而家個天幫我地決定埋，一次過完晒我嘅心願☺️