Kai太的懷孕日記 @ 私家產檢 (35w1d)

35w1d

重60.4kg

肚圍41.5吋

去尤醫生度最後一次產檢

今日可能係弘弘出世前最後一次在超聲波見佢lu～Book左尤醫生12點鐘，等到差不多一點半先有得睇。BB已經5磅喇，頭圍、肚圍，都乎合週數，係手仔同腳仔只係僅僅合格，不過都屬正常，係中碼B。預計出世時應該有3kg左右。而家BB背脊骨已經去了左邊，醫生話依個係最靚嘅位。BB頭仔有少少已經落左骨盤，照超聲波時差d照唔晒，塊面就塞左入去，所以望唔到佢個樣lu，上次廣華個姑娘好勁，一摸就知BB轉左位。咁樣咪好快生得？仲有兩個星期就足月，好驚呀......弘弘你唔好咁早出嚟住，媽媽仲有好多野未做，等我準備好d你先出嚟呀。醫生提我有咩未準備好要立即1st priority做左先，唔好拖，希望我以完全放鬆嘅心情去生。同埋冇咩特別，唔洗再睇佢喇，因為下個月都生了。轉入直路，加油呀！

Kai太的懷孕日記 @ 私家產檢 (30w1d)

今日又去見尤醫生喇，跟進返上次產檢，bb大腿骨同手臂相對較短，今次30週，大腿骨長度係3.49cm，距離瑪麗標準3.6cm還差少少，如果以威院標準3.2cm計就合格。手臂骨就合格有多。bb重3磅4安，總括嚟講，除左腳仔之外，size合乎標準，平均，唔太大，唔太細。佢今次肯露少少樣俾我地睇，但手仔放額頭遮住左對眼，只係睇到鼻同咀仔。

Kai太的懷孕日記 @ 私家產檢 + 廣華講座 (26w1d)

每一次產檢心情都是興奮的！今日又去見我們的心肝寶貝弘弘b了～
對上一次照超聲波已經係7月30日照結構果日，差不多個半月前，真係等到頸都長。今次又去返尤醫生度，約左10:15am，等左55分鐘左右。一見面醫生同我地回顧返上次17週時嘅紀錄，佢話上次BB前臂同小腿長度爭少少，以威院個標準係合格，但以其他醫院個標準就短左少少，今次26週，目標係前臂4cm，小腿4.4cm。度之前有d緊張，因為已經好耐冇照過，唔知ＢＢ生長速度如何，照完後鬆一口氣，手仔有4.35cm長，腳仔有4.59cm長，重0.9kg (約2磅1安士)，符合標準。不過今次佢冇咁乖俾我地睇個靚樣喇，用對手仔遮住左，只係睇到個靚耳仔同腳仔。至於位置呢，而家頭仔向下，眼望我右邊身，所以而家佢郁都係右邊肚皮彈彈下。

Kai太的懷孕日記 @ 私家產檢 (17w1d)

今日照左超聲波，知道BB係男仔，哈哈，唔可以再叫你趣之喇，要改返個男仔名。姨姨叔叔同婆婆都好支持力弘噃，咁叫你力弘好唔好呀？哈，希望你好似王力宏哥哥同鄭俊弘哥哥咁有才華又靚仔。

今日醫生尤漢維叔叔都好好人呀，佢好細心幫你檢查，讚你好健康，Size正常，仲幫你影左張靚相添！你個樣好搞笑呀，好似纜緊安全帶揸車咁，成個車手咁款！唔通你有媽媽遺傳鍾意揸車車？😂
爸爸今日第一次同你見面，佢都好開心呀😊最緊要你健健康康。

一直都冇book私家醫生產檢，因為一心諗住如果政府做到嘅就唔洗嘥錢去私家做，慳返Ｄ奶粉錢嘛。但係後尾發現政府照完唐氏後就唔會幫我照，又唔知BB而家幾大，所以都係Check下穩陣Ｄ，萬一BB唔夠重或者大，都可以用時間追返嘛。

今日仲去左剪頭髮，大肚婆要爭取時間休息，夜晚洗完頭吹頭實在太嘥時間喇，而家一頭短髮好清爽。