Kai太的懷孕日記 @ 廣華產前講座 + 護協購物記 (27w1d)

今個月係講座月，每個星期六都貢獻左俾產前講座。今朝都唔例外，去廣華聽「產後護理及營養」。聽完之後我地去左佐敦護協度買野，趁而家仲行得走得，要快ｄ買齊晒需要嘅ＢＢ用品先得。朋友話ＢＢ用品去護協買平ｄ，除左護協會員之外，用「惠氏媽媽會」卡都可以買。

香港護士協會（親子天地）
http://www.nurse.org.hk/
地址：九龍佐敦白加士街25-27號慶雲商業大廈一樓
電話：2314 6925
營業時間：星期一至五10:30 am - 7:00 pm；星期六10:30 am - 4:00 pm (星期日及公眾假期休息)

之前冇格過價，所以我都唔知實質平幾多。但係見到哺乳圍巾幾平，有兩款，大概七十幾至八十幾蚊，質地都ok，不過因為冇乜花揀，最後冇買到。事前無做功課，今次只係買左三樣野，澳洲Emotion & kids的純綿薄紗巾(120cm x 140cm)$84，SoftTouch嬰兒專用消毒綿花球$19/250粒，同埋孕婦胸圍。依樣野一樣想買好耐好耐，但係完全唔知應該買咩Size好！網上爬文都好少人分享...但係距離生嘅日子越近，個胸就越大，唔買仲keep住著有鋼綫嘅bra會對個胸好唔健康。依款幾好，有胸墊同延長背鉤。有關試著感，請看下篇。

Kai太的懷孕日記 @ 「雅培」產前講座 媽媽學堂 (初生嬰兒護理知多少及湊B攻略)

今日出席左雅培舉辦的媽媽講座，在逸東酒店舉行，不過時間好早兼好長，10:15-12:45，對於我同老公都係一個挑戰^^"

雅培嘅講座一向搶手，一來唔係成日搞，二來座位有限，好似今日只限１００對父母參加，三來好難報名，之前有媽媽group send過資料出嚟，我試過打去報名，原來係特選媽媽先可以登記，所以每次在網頁見到講座資料已經爆滿。咁點先可以成為特選媽媽？可以在婦科診所內報名，然後等消息。如果有幸被選中，會收到短訊邀請優先登記，成功報名的媽媽會在講座五日前收到短訊或電郵通知申請是否成功。

Kai太的懷孕日記 @ 私家產檢 + 廣華講座 (26w1d)

每一次產檢心情都是興奮的！今日又去見我們的心肝寶貝弘弘b了～
對上一次照超聲波已經係7月30日照結構果日，差不多個半月前，真係等到頸都長。今次又去返尤醫生度，約左10:15am，等左55分鐘左右。一見面醫生同我地回顧返上次17週時嘅紀錄，佢話上次BB前臂同小腿長度爭少少，以威院個標準係合格，但以其他醫院個標準就短左少少，今次26週，目標係前臂4cm，小腿4.4cm。度之前有d緊張，因為已經好耐冇照過，唔知ＢＢ生長速度如何，照完後鬆一口氣，手仔有4.35cm長，腳仔有4.59cm長，重0.9kg (約2磅1安士)，符合標準。不過今次佢冇咁乖俾我地睇個靚樣喇，用對手仔遮住左，只係睇到個靚耳仔同腳仔。至於位置呢，而家頭仔向下，眼望我右邊身，所以而家佢郁都係右邊肚皮彈彈下。

Kai太的懷孕日記 @ 「雪印」產前講座 (坐月錦囊)

早前見到雪印有新嘅媽媽講座資料，次次都報唔到，今次終於俾我捕到，拿拿聲報左名。Topic係我好想聽的「坐月知識」，幸運地抽中左，超開心！

講座內容：

。坐月的重要及禁忌

。坐月的進補方法

。坐月食療

。掃風及換片示範

Kai太的懷孕日記 @ ＢＢ展「美贊臣」產前講座 (美贊臣愛相伴產前講座) ＋「荷蘭美素佳兒」產前講座 (育兒技巧賓習坊)

第一次行ＢＢ展，我的媽媽朋友話好多野行，唔買都睇下，咁啱美贊臣送左兩張門劵俾我地。一入場就去左美贊臣個攤位換領禮物，佢好好啊，送左本購物優惠劵，依本就係傳說中嘅「coupon書仔」，裡面超厚有百幾頁，可以拎住去每個攤位度換禮物或者享購物優惠，媽媽group的媽媽們都大力推薦要買。

美素佳兒攤位玩遊戲換獎品

之前收到美贊臣講座短訊邀請，幸運抽中左，好開心。
美贊臣會：第24屆BB博覽又嚟喇! 現誠邀特選會員優先報名於8月6日及7日舉行的BB博覽「美贊臣愛相伴產前講座」。完成講座後，參加者更可獲豐富禮品。

「美贊臣」產前講座 (美贊臣愛相伴產前講座) 16:00-18:00

美贊臣媽媽講座免費禮物：

。Ａ+媽媽U型枕

。美贊臣媽媽奶試飲裝一盒

。Soft Touch 嬰兒專用清潔綿 (試用裝三片)

。Oilatum 嬰兒洗髮沐浴露及潤膚乳液試用裝

「荷蘭美素佳兒」產前講座 (育兒技巧賓習坊) 20:30-20:50

短短２０分鐘，教左幫ＢＢ換衫、換片、掃風、按摩的技巧。

真心覺得美素佳兒d講座唔錯，資訊好實用！

上完堂仲送左牛牛被，連禮物都好實用。

BB展收獲：

我地四點聽講座，六點先正式行，行到八點幾再去左美素佳兒聽產前講座 (育兒技巧賓習坊) ，真正只係行左兩個鐘。有ｄ朋友由十二點行到夜晚九點，好佩服佢地！

Kai太的懷孕日記 @ 「荷蘭美素佳兒」產前講座 (懷孕期媽媽及寶寶十大營養須知及育嬰技巧示範)

荷蘭美素佳兒媽咪會：謝謝您早前對我們講座的支持，現優先邀請您參加由註冊營養師及護士主講的「十全營孕產前講座」，詳情如下：

日期：7月23日(星期六)
地點：尖沙咀香港金域假日酒店
內容：懷孕期媽媽及寶寶十大營養須知及育嬰技巧示範
可選擇之講座時段：上午11時至1時或下午2時至4時。

如有興趣參加及登記，請致電美素佳兒登記熱線36195801，座位有限，額滿即止。
查詢： 28593705

********************************************************************************************

上星期收到短訊邀請後立即報名，成功報左下午場！
講座分兩部分，上半part係由註冊營養師負責，佢講解左好多關於懷孕期媽媽的營養知識及攝取，之前都在媽媽手冊裡學過，但經佢再講一次，具體好多同印象更深刻！節錄例如：
- 食狹豆類(如荷蘭豆, 蜜豆, 四季豆等)或寶礦力1:1溝水飲可預防抽筋
- 食深色肉類或蔬果可以吸收鐵質 (包括牛肉、羊肉、鯖魚、秋刀魚、倉魚、紅莓乾、車厘子等)
- 每日讓皮膚直接曬10-15太陽可吸收足夠維他命D
- 深綠色蔬菜含豐富的葉酸, 一星期要食四次一碗份量的深色菜

上圖是懷孕期間孕婦一日所需攝取份量，佢誇張左話如果攝取齊晒所有營養，需要食幾多同一份食物先得。依個好似一個數學遊戲，要計下每種食物有咩營養，自己食左幾多。要跟住食冇問題，但係人會飽家嘛。。。。。。最慘係食飽晒都未夠某種營養量。經我一番研究，已經掌握到自己一套飲食原則，每日提醒自己食以下東東，再加均衡飲食就ok。 (由於太多種食物，我只係寫左自己平時鍾意食同埋大機會食到的食物出來)

懷孕期間孕婦一日所需攝取營養份量
- 鐵 24毫克(mg) (牛肉, 杏仁, 穀物早餐, 深綠色蔬菜, 乾豆類, 車厘子)
- 鈣 1000-1200毫克(mg) (一杯牛奶 /  一杯豆漿 / 兩片芝士 / 菜心300克 =300毫克, 杏仁15毫克=40毫克, 橙一個=60毫克)
- 鎂 370毫克(mg) (5g紫菜=鎂23毫克, 綠葉蔬菜 / 杏仁 / 肉類 / 澱粉質 / 牛奶)
- 維他命A 800微克(μg) (蕃茄 / 紅蘿蔔 / 蛋黃)
- 維他命C 105毫克(mg) (橙兩個 / 奇異果一個)
- 維他命D 10微克(μg) (曬太陽10-15分鐘 / 雞蛋, 三文魚, 奶)
- 蛋白質 70克(g) (雞蛋 / 牛奶 / 肉類)
- 鉀 2000毫克(μg) (香蕉 / 西瓜 / 哈密瓜 / 橙汁 / 薯仔 / 蕃薯 / 豆類 / 蜜糖 / 紅蘿蔔汁)
- 鋅 16.5毫克(μg) (白菜 / 海帶 / 果仁 / 動物肝臟 / 蠔, 蝦, 蟹 / 蛋黃 / 牛奶 / 豆類 / 糙米)
- 碘 230微克(μg) (5g零食紫菜=170微克, 雞蛋一隻=18微克, 牛奶一杯=20微克)
- 葉酸 600微克(μg) (葉酸補充劑一粒, 深綠色蔬菜, 蛋黃, 奇異果, 牛奶)
- DHA 200毫克(mg) (藻油DHA一粒, 三文魚)
- 水份 10-12杯 (包括水, 湯, 奶, 果汁)

懷孕期各種營養素每日建議量及其食物來源

營養素	每日建議量	食物來源
蛋白質	60克	肉類、雞蛋、奶類、魚、豆腐、豆類等
葉酸	400微克	菠菜、西蘭花、全麥包、已添加粟米片、蛋黃、香蕉等
鐵質	18 - 23毫克	紅肉、肝臟、深綠色葉菜、乾果等
鈣質	1200 - 1500毫克	奶、芝士、乳酪、豆腐、連骨魚、深綠色葉菜等
維他命D	5微克	奶、蛋黃、肝臟、魚等
維他命A	800微克	肝臟、蛋黃、紅蘿蔔、蕃茄、深綠色葉菜等

唔係大肚都唔會咁留意營養學，減肥都冇咁好心機！
因為有d營養唔可以過多，例如維他命A，攝取過量會導致K胎，維他命C過多就會影響便秘，碘過多就會有甲狀腺問題。所以醫生點解咁強調均衡飲食的重要。同埋有d食物好有益，含多種營養，食一樣就攝取幾種營養，唔會嘥左d quota，例如雞蛋，每日食一隻好有益；杏仁，每日一湯匙；牛奶，每日最少一杯；深綠色蔬菜，最好日日食；奇異果/橙，一日一至兩個。


講座中場休息，用換領劵試飲左美素佳兒媽媽奶及用媽媽奶製成的薑汁燉奶，媽媽奶唔太甜，易入口，薑汁燉奶都ｏｋ，現場購買媽媽奶一罐仲送胎心機，購買兩罐加送牛牛被同埋精美媽媽袋一個，不過自己都係鍾意鮮奶多ｄ，所以冇買到。


下半場係育嬰知識，由護士教大家同BB仔沖涼。依part我好集中精神睇，因為老公唔得閒陪我嚟，而我從來未接觸過依方面的資訊，所以好俾心機聽。由洗頭仔，換片片，沖涼，洗肚臍，抹面仔，好似要開壇作法咁，姑娘做好輕而易舉，好驚自己會搞唔掂呀＞＜　希望遲d去醫院聽可以實戰練習下啦。

總括今日個講座幾實用，完場派禮物袋，同埋一開始玩遊戲送的三角枕。
禮物唔算好多，但三角枕真係好有用啊！

Kai太的懷孕日記 @ 「雀巢營養天地」產前講座 (1000天的過敏預防)

雀巢營養天地：恭喜您已成功登記「雀巢營養天地」產前講座。提提準媽媽敬請準時出席2016年7月17日（星期日）中午12:00-13:30於旺角帝京酒店六樓喜宴堂舉行之產前講座。講座內容：孕育健康寶寶∕懷孕分娩知識你要知！EN/CN : 21798333。

新手媽媽產前講座-1000天的過敏預防（中午場）

日期:	2016年07月17日
時間:	中午 12 時至下午 1 時 30 分
場地:	旺角帝京酒店六樓喜宴堂 （旺角太子道西，近新世紀廣場）
講者:	徐傑醫生（兒科專科醫生） 何靖醫生（婦產科專科醫生）
主題:	孕育健康寶寶／懷孕分娩知識你要知!
名額:	300

***************************************************************************

今日去雀巢講座，分上下半場，由兩位醫生主講，最尾有問答環節。
第一部份係講由懷孕到分娩的知識，第二部份係講ＢＢ的敏感與疾病。
我地覺得兩位醫生都講得好好，內容好實用，特別係徐傑兒科醫生，佢講得好生動，全場好多笑聲。

完場後派發禮物袋。

Kai太的懷孕日記 @ 「惠氏」產前講座 (產前產後湊B實習班)

惠氏媽媽的產前講座，知道的時候已經額滿了......
希望下次報得切名啦～

Kai太的懷孕日記 @ 「美國智多健」產前講座 (懷孕媽媽和嬰兒健康講座)

之前報左好多產前講座，今日同Kai先生一齊去。

美國智多健"懷孕媽媽和嬰兒健康免費講座"
出席媽媽致送:
美國高純度藻油孕婦DHA丸及精美禮品
時間: 7月10日 (日) 下午2:30分
地址: 沙田大圍道28-30號松栢樓地下A&B 屈臣氏店內 (大圍港鐵站A出口)
留位號: C138

呢個唔太出名奶粉商，但佢地強調係唯一一隻係美國FDA認證，奶粉成份同母乳接近。講座大概個半鐘，有個營養師負責主講，感覺似sell野多d，Kai先生直頭聽到瞓著左。不過知道魚油丸同藻油丸嘅分別，深海魚有水銀，同埋知道如何挑選配方奶粉要注意的地方，都有得著嘅。完場有即場購物優惠，我地都買左佢嘅藻油丸同除疤膏，仲有好多野送添。

有關藻油丸，之前淨係聽過惠氏，因為佢賣廣告實在太行，朋友都係食佢的藻油丸同materna，本來都有諗過買晒嚟食，但係兩樽一齊食實在太貴，materna萬寧賣＄２ｘｘ一樽，惠氏藻油DHA賣＄３ＸＸ樽，兩樽一齊食一個月咪差唔多六百蚊？本身有食開葉酸，materna都係葉酸＋綜合維他命，所以最後淨係決定買藻油DHA，三樽優惠裝＄８８８，除返開每樽＄２９６。點知今日美國智多健的藻油丸唔單止平好多，純度仲高，冇咁多添加劑，仲有美國FDA安全認可，呻笨喇T^T 講座優惠買4送1，用埋減＄１００ coupon，同埋Watsons優惠，除返每樽都係＄１６ｘ......一次過買左五樽，計埋今日送果樽，同埋惠氏果三樽，夠食到生了。營養師建議最好食到生產後三個月，因為頭三個月要餵母乳，媽媽食藻油DHA可以令到ｄ奶有營養ｄ，對ｂｂ腦部發展好有用。其實我好憎食藥架，不過為左ｂｂ健康，頂硬上啦。