Kai太的懷孕日記 @ QE 產檢《驗B鏈》 (36w6d)

17/1產檢《驗B鏈》
今日36w6d又返QE產檢，驗B鏈嘅日子
同媽媽group d媽媽傾開，政府會安排懷孕媽媽在35-37週左右驗B鏈
我有好多朋友懷孕期間都中B鏈，命中率幾乎係50%，到底B鏈係咩？B鏈 (全名B型鏈球菌)係在媽媽身體上正常嘅細菌，很容易在陰道同肛門部位搵到，對媽媽係唔會有影響嘅，但係呢隻菌係會喺穿水之後攻擊BB，有機會（1-2%）引發早產、肺炎、細菌入血等等，再嚴重d會導致腦炎。所以政府醫院會在35至37週期間產檢時為準媽媽驗B鏈，在媽媽陰道同埋肛門拎啲分泌物去化驗。如果真係中咗其實都唔洗太擔心，只要在開始進入產程前或者穿水之後打抗生素就可以保護BB㗎喇！

如果第一胎有，第二胎都會當有；但如果第一胎冇，唔代表第二胎冇，所以每次懷孕都要重新再驗一次。

11點去到日間醫療中心4樓，又係例行公事，驗水便、磅重、量血壓，今日炆死我喇，因為天氣涼左得16度，所以著左件毛毛褸，d毛毛好滑好線，太sin，累我倒瀉兩次尿

個廁所又窄，我一咩返個袋上膊頭，1秒就sir落嚟，佢個重量令我隻左手強力chok左一下，就倒瀉晒😫😫😫

跟住入去用試紙驗小便俾姑娘睇，我隻手仲揸住兜尿，驗完俾張紙姑娘mark返，個袋又sin落嚟，又倒瀉第二次😵倒到地下有一撻尿，勁唔好意思，炆死我

今次重量有增長，62.9kg，比上次多左0.5kg，血壓都正常

等左一陣，就被叫名入去見醫生。
一入房姑娘就叫我除褲瞓上床，然後姑娘就用棉棒在我陰道同肛門沾少少分泌物化驗，過程好快都唔痛，完成後姑娘就俾塊布我遮住下半身，然後等醫生過來幫我摸肚仔，聽BB心跳。BB心跳正常，頭位向下胎位正常。好快check完就落床過去見醫生。

我將上次私家產檢醫生開俾我封信交俾QE嘅醫生，話俾佢知BB上次照到肚圍大左4週，醫生話估計BB都屬於大碼，所以建議我考慮38-39週左右催生，唔洗生得咁辛苦。突然間咁樣提出完全冇心理準備......我問醫生，係咪要即刻答架？佢話可以再考慮下，下次產檢再回覆。

由於上胎係作動40週自然產，未試過催生嘅我有d忐忑，兩者都有風險，好多人催生唔成功要食全餐......但係如果留在肚子太耐，BB太大超過8磅，都一樣會有難生最後開刀嘅風險＞＜。仲有一星期，再諗下先。

最後，醫生叫我落去2樓度抽血再驗下血色素有冇提升返，抽完血就走得，下星期再返嚟產檢。

Kai太的懷孕日記 @ 產前最後一次私家產檢 (35w4d)

8/1私家產檢 (35w4)

太耐無照過，臨產前最後一次到私家產檢。又約呂醫生，不過今次係去石門唔係尖沙咀，因為驚TG🙈 約左12點，都唔係好多人，去到先驗小便，再磅重量血壓。重63.4kg，又無乜重啊😱量血壓我瞄到個脈搏有117，嘩，高過QE度好多，有無問題架？

呂醫生幫我照完，嚇我一跳
BB肚圍大左4週呀😱😱😱
其他size 都正常，佢而家已經重2.7kg，有6磅
醫生話呢個肚圍係生得嘅size
我問醫生：「會唔會生嘅時候Kick住個肚出唔到架？」
唔怪得我無重到啦，因為BB已經重左好多🙈
醫生估計係大碼B，同弘弘一樣
咁我要節制一下飲食先得喇
要食多d菜同食少d澱粉質

呂醫生寫左封信俾我下星期去產檢時交俾QE，唔知QE會點呢...^^"
明明11月尾照完肚仔size已經正常返，點知短短六星期就由符合週數變成大左4週🙈
好驚佢捉我去催生...

BB頭仔向左下喇，但未落晒盤
佢而家側身瞓，個背脊在我左邊，唔怪得成日都係踢我右邊😂
今日好好彩都照到佢個面珠仔，睇到佢啜手指😆連鼻眼嘴都睇得好清楚
個樣同我老公成個餅印😂😂😂基因太強喇🙈

Kai太的懷孕日記 @ QE 產檢見醫生 (34w6d)

3/1 產檢

今日又返QE產檢，11:15 去到ACC日間醫療中心4樓，又如常check小便、量血壓、磅重。上次重62.5kg，今次重62.35kg，咁係我瘦左定係BB無重到？😱 脈搏又超標，106，姑娘要我再量過，第二次好少少喇，100，剛剛踩界🙈

今日入左健康教育室上堂，學點餵母乳。因為上胎好少埋身，又餵得唔耐，我已經唔係好記得正確姿勢同點餵，今胎想學好d，要溫故知新！姑娘教得好好，講解得好清楚，要努力記住佢先。希望實戰時可以順利💪🏻💪🏻💪🏻

上完堂就出去見醫生，醫生幫我量BB心跳，摸肚仔，BB頭轉左下面喇，心跳150正常。見完醫生就約期下次產檢時間，兩星期後再返嚟驗B鏈，到時差不多37週喇。

Kai太的懷孕日記 @ QE 產檢見醫生 (32w6d)

話咁快又過左一個月來到QE產檢時間，今次又係去日間醫療中心4樓，到左如常登記、驗小便、磅重、量血壓，omg，脈搏又踩界，今次仲高d，有108（正常應該係100以下），再量第二次都係咁。

好快就被叫名入房見醫生，上次俾醫生捉左去抽血，原來係驗血報告有貧血，血色素較低，所以脈搏都因而高左。醫生開左鐵丸俾我，要我一定要食😅
本來之前有食開materna，但因為食左之後嚴重便秘，materna太多鐵，所以一個月前已經停左🙈其他suppliment都係得閒就食下，本身真係超唔鍾意食藥。

不過點避都係避唔到，上胎又係血色素低要食鐵丸，今胎都要食。
醫生話驚貧血，萬一生產過程出血太多會有危險，所以點都要食。

今日產檢過程都係瞓喺床，醫生摸下肚仔，聽下BB心跳。

又係唔洗一個鐘就完左產檢，然後拎下次覆診紙（兩星期後），同埋去2樓藥劑部等攞藥，拎完就走得。

Kai太的懷孕日記 @ QE 再照超聲波 (29w2d)

我的產前檢查週記（第29週）：QE 再照超聲波

因為BB肚仔大左一週，所以QE俾左個期我再照一次超聲波
我覺得QE好好，跟得好足
今日再去QE超聲波，今次都係在B大樓3樓「婦產科日間中心」照，又係先去E1會計處登記。去到姑娘派左個號碼，就坐低等叫名。
排第6個，都好快，等左幾個字就到我喇。
Yeah~~~BB肚仔size正常返喇。
BB重1.29kg，醫生話中碼B。
安樂晒，最緊要係BB健健康康^^

Kai太的懷孕日記 @ QE 產檢見醫生 (28w6d)

28週的產檢在日間醫療中心4樓婦產科進行
如常的驗小便、磅重、量血壓
上血壓102
下血壓65
脈搏101
體重60.6kg
Oh，我脈膊又擇界喇，101 (正常100以下)，又要再量過
兩次脈膊都擇界添，唔會有咩事卦

因為擔心催淚煙殘餘物
我專登搵個3M嘅加強版R95口罩，有活性碳，可以過濾有機化合物

但係嚟到醫院令我好驚訝，醫護人員、病人，大部分都只係戴普通口罩，甚至唔戴口罩，都幾多人無戴口罩。係咪我過份擔心？不過為左保護BB，寧願誇張左都唔想掉以輕心，始終無色無味嘅二噁英，無人會知道濃度有幾高，聞唔到唔代表唔存在。

因為早又無乜人，好快就見醫生。
首先瞓床聽BB心跳
然後同醫生傾左幾句
醫生話第二胎BB size可能會再大d
見我脈膊擇界，又俾人捉去樓下2樓抽血😵因為怕甲狀腺有事或貧血。
醫生同姑娘都話覺得我個肚好大😅上胎都7磅8，今胎都可能差不多
抽完血就走得喇~

Kai太的懷孕日記 @ 卓越產檢 (25w3d)

今日又去見呂醫生喇～
最期待又可以見妹妹嘅日子^_^
25週妹妹已經大個左好多，眼耳口鼻都成晒形，所以今次照到個樣清楚好多呀😍
妹妹各方面都正常健康，肚仔真係大左一週，但醫生冇話特別有問題，問我係咪食好多甜野。為左妹妹唔好變肥妹仔，我要戒下口喇。

下星期26週要搭飛機，醫生出埋封孕婦健康證明信俾我證明我可以搭飛機。

Kai太的懷孕日記 @ QE 產檢見醫生 (22w6d)

次次產檢都倒塔咁早真係好辛苦😵
又09:15⋯⋯已經病緊唔夠瞓，難得產檢可以輕鬆下，仲辛苦過返工😭

QE個位又吊腳，次次搭車都起碼要九個字先去到，行埋過去差唔多成粒鐘😪

有比較之下，廣華真係方便好多，屋企樓下有紅Van直接去到廣華門口落，半個鐘內就去到。

今日產檢係驗小便同見醫生，QE唔係每次都要驗小便，今次係第一次，唔知合唔合格呢？下個月頭就要飲糖水喇，上次照結構醫生話BB個肚大左啲，我都驚係我食得太多甜野食到佢肥晒，最緊要係妊娠糖尿同妊娠毒血可以過關🙏🏻

今朝驗小便合格，但量血壓嘅時候個脈搏唔合格，正常應該要100以下，我有108，姑娘叫我唞唞再量過。

跟住我被嗌名叫咗入去間房，第一次嚟產檢都有入嗰間房，有好多媽媽一齊聽姑娘講嘢，今日個主題係產檢程序，同埋餵哺母乳。聽左驗血報告之後，姑娘就派左張白色卡仔同一本關於母乳餵哺嘅小冊子俾我。原來嗰張白色卡係好重要，姑娘叫我地放喺銀包隨身攜帶。如果37週之前作動或者有任何異樣，都可以廿四小時前往產科大樓度檢查。我覺得佢呢個服務同安排真係好好，有專責部門照顧。聽完講座之後再量多次血壓，今次正常返喇。

跟住坐低等嗌名入房見醫生，醫生幫我摸肚，檢查乳房，同埋聽BB心跳。跟住再跟進上次照結構嘅報告，因為BB肚仔大左少少，佢擔心我係妊娠糖尿，所以明明26週先飲糖水，醫生幫我改期聽日就飲。另外再俾咗兩個覆診期我，11月尾照多次超聲波。今晚12點之後就唔可以再食嘢， 聽朝9:15要去到QE抽血😭同飲糖水。本來聽日10:30有個產前運動班都去唔到😔

我好眼瞓呀😭😭😭
成個禮拜都唔夠瞓，今日已經好攰，聽日仲要嚟多次。因為唔夠休息所以個病一路都未好，鼻塞仲嚴重左😞

Kai太的懷孕日記 @ 卓越產檢 (16w0d)

呀～～～等到頸都長喇！
由驗完唐氏到今日又過左4星期，在未feel到胎動嘅時間，真係覺得好不安。
即使係第二胎有經驗，都仍然會囉囉亂，直到見到BB郁先至安樂。
下一次政府產檢要等到9月27日，仲有成個月呀，同埋政府唔俾影相，所以今日又book左卓越搵呂醫生產檢，見下BB先😊

星期六嘅卓越醫務中心好熱鬧，超多準媽媽嚟產檢，幾乎坐滿了人。今日帶埋老公同仔仔一齊見BB，阿仔仲未知咩事，只係知媽媽個肚大左，裡面有BB，但對於妹妹嘅來臨，暫時仲未有太大感覺。不知不覺等左一個鐘左右，可惜阿仔瞓著左見唔到妹妹。

呂醫生超好人，佢幫我影左好多相，咁啱BB好活躍，不停郁來郁去，呂醫生仲幫我錄低左Video😍醫生話BB好健康，各方面都正常，Size正常，好開心呀～
如果各位孕媽正在尋找好嘅產科醫生，誠意推薦呂桂英醫生，細心又溫柔，價錢仲非常合理。

知道BB健康終於安心d，進入第16週已經冇晒孕吐不適，開始有返胃口，要好好享受孕中期的快樂😊

Kai太的懷孕日記 @ QE唐氏 照超聲波 (11w4d)

今日係第二次去QE產檢，今日終於有得照超聲波喇！因為今日係驗早期唐氏。
預約時間係8:45am，又係晨咁早...上次係直接去粉紅色大樓產檢，今次有d唔同，係去B大樓3樓做產檢。但去之前要特登去另E大樓1樓會計部度登記左先，因為唔識路，所以都搵左好一陣......去到E大樓會計部有其他病人一齊排隊，搞到遲左少少先到B大樓。

去到登記左就度高磅重，然後坐低等嗌名，等左半個鐘左右就到我喇～今日要照超聲波+抽血，我被安排照左超聲波先。
BB身長5.72cm，Size計係12w2d，度頸皮厚1.26mm，屬於低風險，不過姑娘話等埋驗血報告出埋先可以作準。BB已經成形喇，仲見到鼻骨。姑娘好強調有鼻骨，因為鼻骨都係唐氏BB嘅一個參考指標，如果係唐氏BB鼻骨可能扁d。

跟住出房等叫名入去抽埋血，就走得。今日好快呀，產檢過程只係用左個零鐘左右。
姑娘話如果驗血報告冇問題就唔會收到電話，如果驗到有問題就會兩星期內收到通知。

下次在QE產檢就係兩個月後lu，20週照結構。

Kai太的懷孕日記 @ 卓越產檢+Nifty Pro (11w0d)

等左好耐，終於等到今日喇！
繼上次見BB之後已經差不多成個月冇見BB，好掛住佢
同埋上次只係見到心跳閃閃，聽唔到聲，而家咁細粒又feel唔到佢，感覺總係好唔實在。

Nifty Pro我係去媽媽group朋友極度推薦的卓越醫務中心做。
卓越係一間專做婦產科嘅醫務中心，尖沙咀和石門都有分店。有5位婦產科醫生坐陣，其中一位係好出名嘅孫錫鴻醫生。

呂桂英醫生做Nifty Pro好抵，HKD4400包埋照超聲波，仲平過家計會。
而且個個都讚呂醫生好Nice，溫柔又細心，所以我就book左搵呂醫生做Nifty Pro^^

星期六尖沙咀center，超級多人，裡面好多孕婦，登記完就等嗌名，首先係度高磅重量血壓，然後就等嗌名入房。等等下又一個鐘，終於到我喇！入到房首先上床照超聲波先，好清楚見到BB同胎囊，好得意呀😍醫生話BB好活躍，見到手腳郁郁游緊水，仲伸隻手仔出嚟同我Say Hi😂  聽到BB心跳係145，屬於正常。醫生度過BB size都話預產期係吻合2月8日，即係而家係11週，BB好健康，呂醫生仲影左兩張3D圖俾我睇。之前聽媽媽朋友講卓越d儀器好清楚，你會愛上卓越嘅儀器，真係名不虛傳，真係超級清楚😍見到BB咁活躍就好開心，唔怪得媽媽咁唔舒服啦

見完醫生，就出去等俾錢，付款方法有：現金、EPS、支付寶、微訊支付
跟住姑娘俾左張紙我落樓下12樓化驗所度抽血，抽完血就走得～



之前聽人講，話胎囊圓碌碌，頭身比例係1:1，就係女；胎囊腰果形，頭身比例係1:2，就係仔
今胎圓頭圓身，似係女呀😍😍😍
我記得上胎阿仔個超聲波係腰果形同個身長d，如果係真就好喇😍
Nifty Pro約8-12個工作天就知結果。


卓越醫務中心
http://www.zenithmc.com.hk/

地 址: 九龍尖沙嘴廣東道5號 海港城海洋中心13樓1326-27室
電 話: 2110 4760 / 2110 4761
傳 真: 2110 4765
電 郵: info@zenithmc.com.hk
診症時間: (敬請預約) 星期一至六
逢星期日及工作假期休息

地 址: 新界沙田石門安群街3號京瑞廣場1期19樓C室(港鐵石門站C出口)
電 話: 2155 2871 / 2155 2872
傳 真: 2155 2874
電 郵: info@zenithmc.com.hk
診症時間: (敬請預約) 星期一至六
逢星期日及工作假期休息

Kai太的懷孕日記 @ 第一次QE產檢 (9w0d)

第一次嘅QE產檢，安排在第10週。
時間是早上8:30...好早，對於懷孕初期嘅孕婦嚟講，真係好辛苦😅
今次為左快少少，在佐敦地鐵站B出口搭小巴去QE，總站落車，但行過去婦產科都搵左一陣，結果遲左少少8:45先到排隊登記。

姑娘首先同我度高磅重，然後就派左一堆書仔、紙同問卷俾我，跟住叫我入左去一間房仔度等，裡面有其他孕婦一齊喺度等，大概等左10分鐘左右，助產士姑娘就同大家講解一下關於QE婦產科的產檢流程同安排，例如幾多週會做咩呀、會唔會安排結構呀、如果產檢當日唔舒服要改期要打咩電話呀咁。如果2年內生過，或者曾經在QE聽過的可以唔洗聽。

聽完講解，就出返去等嗌名檢查。
「等～～～寂寞到夜深」係每次去產檢最想唱嘅歌，因為每次產檢，2個鐘係基本，d冷氣又凍，不知不覺等左成個鐘。都唔記得等左幾耐，終於嗌我個名喇～～入到間房仔，係助產士姑娘見我，第一次見面唔洗檢查，血壓都唔洗量，主要係問下第幾胎，上次邊度生，順產定開刀等問題。姑娘睇左上次家計會醫生幫我寫嘅信，因為醫生度size BB細左一週，再問埋我經期週期一向係28-35日不等，所以幫我改左個預產期至2月8日，噢！如果遲左一星期，咁就有機會係老鼠唔係豬豬🙈 跟住姑娘就一次過出左4個期俾我，分別係：
1) 早期唐氏評估 (11w)
2) 結構 (20w)
3) 見醫生 (22w)
4) 飲糖水 (26w)

好開心呀，排到結構期😍可以慳返d錢
上胎廣華講到明冇結構，要去自己俾錢出去照，因為政府資源有限，今次姑娘在講座都有講未必排到，如果full左就要自己出去照，所以排到真係超開心呀！
其實呢個都係我揀QE嘅原因，不過唔好意思同姑娘講...^^"
姑娘知我上胎廣華生，都問我做乜唔去返廣華，通常好多人第一胎去開果間生就會繼續喺同一間醫院生。其實廣華都好好嘅，不過想試下QE啫😝

Kai太的懷孕日記 @ 廣華產檢 (39w)

今日已經39週喇，仲未生得，所以要去廣華產檢。
都係例行檢查一下，量血壓、驗小便、聽心跳、摸肚仔、度肚Size等，助產士姑娘話一切正常，跟住就俾左下次產檢日期 (40週)，佢話如果下星期都未有動靜，就會預約日期入院催生。仔呀仔，係咪媽媽子宮太舒服你唔捨得出嚟呀？已經放左個幾禮拜產假，希望唔洗等催生啦，如果唔係之後唔夠時間照顧BB。

產檢完去左永安睇電磁爐用瓦煲，終於搵到喇，係想要果個4.5L size，但係個Sales話唔可以用嚟煲薑醋，亦唔可以長期浸住薑醋，我問：「如果我淨係翻熱呢？」佢話翻熱薑醋都唔得，話因為薑醋會滲左入去底部，影響d電磁粉甩，令到個煲會接觸唔到個爐，咁點算呀？我得電磁爐咪即係冇得煲薑醋！？一場歡喜一場空。

奶奶話可以用電子瓦罉，我地去左地庫果層睇，見到有呀，可以插電慳返個爐頭位添！做過Research搵到幾隻牌子，最平係Homey，跟住係伊瑪牌，最貴係Panasonic。太好了，終於解決煲薑醋嘅問題！

Kai太的懷孕日記 @ 廣華產檢 (37w5d)

已經37週喇，轉入大直路。今日又去廣華度產檢，今次好快啊！約左10:45AM，等到12點左右就有得睇，助產士姑娘好好人，除左幫我檢查肚仔大細同聽心跳外，仲幫我照左超聲波 >v< 明明之前廣華話除左唐氏果次以後都唔再照架喇，突然有得見ｂｂ覺得好開心。

照到頭仔額頭對上已經落左骨盤，我問姑娘幾時會入晒盤架？佢話：「如果成個頭入晒盤骨就已經生得架喇」

我問姑娘我一星期重左３磅幾係咪唔正常，佢話可能係水腫，唔洗太擔心，不過都有提醒我，現階段唔好咁為食，因為而家會好吸收，唔好食咁甜，而家ｂｂ約3KG，摸落都幾好肉地，Size差不多了，以我嘅身形，細細粒會易生d 。

依個禮拜成日個肚都好硬，又成日feel到個肚陰陰痛，好似M痛咁，但係又冇規律架喎。姑娘話咁代表個子宮已經成熟，隨時準備好生產，佢硬左其實係供血俾ｂｂ，正常的。最後，姑娘仲有教我肚仔按摩法催產，佢話由而家開始每晚10:30pm左右就上床準備瞓，臨瞓前幫肚仔同大脾分別做15min催產按摩，咁樣到凌晨兩點左右，身體就會分泌催產素，係好嘅荷爾蒙，可以幫助生產。下次產檢日期係12月9日，到時已經39週，姑娘話通常d媽媽做完催產按摩唔洗幾日，就會產房見。

Kai太的懷孕日記 @ 廣華產檢 (36w5d)

話咁快又到產檢嘅日子，今日預約時間係10:20am，天陰陰，雨濛濛，天文台仲話今晚氣溫會跌到落15度，搞到要帶定件褸出門口，好輪盡。

已經36週5，今日除左見助產士仲要見醫生，先去量血壓及驗小便，然後如常地等等等，今日好多人，助產士小組姑娘話唔夠人手，所以平時由小組做的量血壓及驗小便轉左出去大堂做。等到大概12點左右，助產士姑娘終於見我，仲叫左幾位媽媽，一次過講。問我地執好走佬袋未，最好分開兩個袋，一個裝定床墊、產婦衛生巾、尿片兩片、杯等，以防突發穿水入院可以即刻走，其他野可以遲ｄ請家人拎過嚟。跟住就係留意胎動情況，如果ＢＢ郁少左，或者覺得佢突然郁得好勁，好似掙扎緊咁，唔安心都可以入院Check下。如發生規律陣痛，住得唔遠可以慢慢等到痛10分鐘先一次才入院都得，第一產程通常痛好耐。坐我隔離果位媽媽，原來已經40週了！姑娘話今日醫生會同佢講關於催生嘅野。Oh，希望我唔洗等到40週催生啦，ＢＢ在肚裡住得越耐，就越大隻，生嘅時候就越辛苦架喇^^"

見完小組姑娘，就坐出大堂等見醫生，大概等左十幾分鐘就入房lu。第一件事就係瞓上床俾醫生姑娘聽心跳、摸肚、度肚皮Size，過程極迅速，check過一切正常就去返位度坐。磅重61.9kg，醫生叫我keep返均衡飲食，唔好食咁多甜野肥膩野，仲有話我知Ｂ型鏈球抹片測試過關，然後就叫我走得喇。我都冇機會問問題添，只係問左一條問題，佢地可能太忙，想我快ｄ走。下次產檢日期係11月30日，一星期後，嚟緊會每一星期產檢一次直到ＢＢ出世。

Kai太的懷孕日記 @ 廣華驗B鏈 + 美素佳兒禮物 (35w4d)

已經好耐好耐冇寫懷孕日記喇，不知不覺懷孕35週幾，時間過得好快呀！今日下晝去左廣華度驗B鏈 (乙型鏈球菌)，明明記得好似係好快，點知我等左成粒鐘都未叫我，覺得唔對路......走去問登記護士，驗B鏈覆診紙係咪都係放入助產士小組個兜度，佢話係，跟住我又繼續等，飯都未食，等到勁肚餓......

好彩姑娘發現得早，原來驗B鏈唔係排助產士小組，而係直接去登記處入紙排見醫生T^T

白白等左粒幾鐘......

等左一陣，已經入去見醫生，有位女醫生同女護士幫我採集組織化驗，冇咁尷尬。醫生叫我除褲瞓上床，然後佢就將儀器放入陰道同肛門中採集樣本，過程中有少少唔舒服，不過好快就搞掂，拎埋到診紙就走得。

乙型鏈球菌常見於腸道、女性陰道，一般不會致病，惟孕婦一旦帶菌，可增加死胎或新生嬰兒中招風險。約10%至30%懷孕婦女的陰道或直腸拭子樣本中可找到乙型鏈球菌。雖然媽媽本身沒有症狀，但生產過程中，新生兒經過產道時，會遭到感染，盛行率約千分之一。乙型鏈球菌也會引起早產、死產或是流產的問題。孕婦在懷孕35至37周時，應接受陰道及肛門B型鏈球菌的例行篩檢，發現帶菌的孕婦，在分娩前使用有效的抗生素治療，可減少約7成的早發性感染。

下星期又去產檢，到時應該公佈結果喇，希望唔好中啦。

返屋企，去郵局取件，原來係美素佳兒寄來的禮物，係一個好靚嘅牛牛BB車掛袋同埋一本育兒書。美素佳兒真係好窩心呀，成日都送咁多野，送d禮物仲好實用添^^

最surprise係佢有個Checklist，雖然好簡單，但印刷好精美又實用，特別係對我呢d仲未執齊走佬袋嘅人，真係好貼心

仲有本書仔，真係要大力推薦！之前已經送左一本「開心懷孕篇」育兒書，裡面講懷孕時會遇到的階段，由發現懷孕1個月至10個月，胎兒成長、媽媽營養與飲食、準備生產、產後護理等知識，內容非常實用呀！今次呢本係講生左之後，BB成長嘅各種階段，由零歲講到歲半，咩階段食咩、咩階段寶寶成長會有咩變化等，連疫苗注射一覽表，勁實用呀！(心心眼)

 我同老公都覺得好正，多謝美素佳兒。

個牛牛袋都好靚，可以掛BB床，又可以掛BB車，size唔太大，啱啱好可以放d BB濕紙巾呀、紗巾仔等，出街正晒。

Kai太的懷孕日記 @ 私家產檢 (35w1d)

35w1d

重60.4kg

肚圍41.5吋

去尤醫生度最後一次產檢

今日可能係弘弘出世前最後一次在超聲波見佢lu～Book左尤醫生12點鐘，等到差不多一點半先有得睇。BB已經5磅喇，頭圍、肚圍，都乎合週數，係手仔同腳仔只係僅僅合格，不過都屬正常，係中碼B。預計出世時應該有3kg左右。而家BB背脊骨已經去了左邊，醫生話依個係最靚嘅位。BB頭仔有少少已經落左骨盤，照超聲波時差d照唔晒，塊面就塞左入去，所以望唔到佢個樣lu，上次廣華個姑娘好勁，一摸就知BB轉左位。咁樣咪好快生得？仲有兩個星期就足月，好驚呀......弘弘你唔好咁早出嚟住，媽媽仲有好多野未做，等我準備好d你先出嚟呀。醫生提我有咩未準備好要立即1st priority做左先，唔好拖，希望我以完全放鬆嘅心情去生。同埋冇咩特別，唔洗再睇佢喇，因為下個月都生了。轉入直路，加油呀！

Kai太的懷孕日記 @ 廣華產檢 (33w5d)

今日又係一個月一次嘅產檢，本身約左10:30，人流同平時差唔多，等待嘅過程有個姑娘問我願唔願意參加一個「實驗計劃」，佢會搵240對夫婦，抽籤分成兩組，一組係按摩組，一組係非按摩組，抽中按摩組的夫婦，醫院會安排上「產前按摩班」，然後在產前利用按摩的方式減痛；另一組就完全唔俾按摩，其他減痛方法都用得。因為我地之前報唔到按摩班，報到果班已經係預產期，所以好想試下運氣。本人係非常支持非藥物式減痛方法的，因為對BB的副作用減到最低，不過...希望還希望，運氣差的我抽中左「control group」，即係冇按摩組XD
有少少失望，不過唔緊要啦，仲有其他方法家嘛。

等到約12點幾可以見姑娘，佢循例幫我摸肚仔，聽BB心跳，Size正常，佢仲話BB背脊在左邊，咦，明明在右邊架，之前照幾次超聲波都係右邊。頭仔在下面，佢仲叫我用手摸：「你摸下，頭仔係呢度呀」但係我摸完都唔覺得果個係頭XD 姑娘好勁。今日產檢仲有份問卷要填，主要係考我對餵母乳嘅知識。因為之前有聽過醫院產前講座，所以全部都答啱晒。

對返上次個驗血報告，血色素已經回升返至11.4，姑娘話依個數字好靚，可以唔洗再食鐵丸～不過都要繼續食返多d紅肉同埋深綠色蔬菜。

Kai太的懷孕日記 @ 廣華產檢 (30w5d)

尋日開始作病，俾老公傳染左，今次隻菌好惡，只係一晚就已經惡化得好緊要。鼻水倒流落喉嚨好辛苦，吞每一啖口水都勁痛，完全瞓唔到......T^T

今朝仲要去產檢，又是漫長的等待......今日比平時辛苦，又要等抽血，等到12點半，終於有得見姑娘。佢幫我摸肚仔，聽BB心跳，好快就見完。我問姑娘可唔可以見醫生開d藥俾我食，因為我感冒真的很辛苦，佢就話如果要見醫生都可以，但要再等多個幾鐘，起碼等到1點9......橫掂出去睇都係要等，唔想行來行去喇，所以答應等，而家最想食藥。

見完姑娘仲未走得，要排隊抽血，但我已經餓到不得了......上次產檢姑娘話抽血唔洗空腹，但唔好食咁豐富嘅早餐，所以我唔敢食咁多，而家後悔了。12點9，抽完血後繼續等醫生，點知姑娘走出嚟搵我，佢話唔洗見醫生了，佢將我d病徵同左醫生講，醫生開左d藥俾我，未見醫生就開到藥，真係第一次，不過唔洗錢就算啦，最緊要有藥食。

跟住我落去地下藥部拎埋d藥就去食飯，剩係等藥都等左半個鐘......今日真係過得好漫長。

Kai太的懷孕日記 @ 私家產檢 (30w1d)

今日又去見尤醫生喇，跟進返上次產檢，bb大腿骨同手臂相對較短，今次30週，大腿骨長度係3.49cm，距離瑪麗標準3.6cm還差少少，如果以威院標準3.2cm計就合格。手臂骨就合格有多。bb重3磅4安，總括嚟講，除左腳仔之外，size合乎標準，平均，唔太大，唔太細。佢今次肯露少少樣俾我地睇，但手仔放額頭遮住左對眼，只係睇到鼻同咀仔。