Kai太的懷孕日記 @ 陪月的重要性

【陪月的重要性】 好多媽媽生第一胎都未必會請陪月，好似我咁，因為想慳錢，唔捨得用兩皮幾野請個陪月，以為陪月只係煮月子餐同幫手照顧BB，等媽媽有得休息。
上胎係奶奶幫我坐月，佢煮飯俾我食同埋幫手照顧BB，都幫輕好多，但坐完月之後有成半年膝頭痛 (好彩之後冇事)，我就覺得坐月好重要，如果坐月坐得唔好搞壞身子，就一世架喇，所以第二胎，我一驗到有左就搵陪月。

而家坐月第13日，我覺得有陪月真係好好。
首先，陪月煮野好好食，因為食d野好正氣同健康，而家差不多日日有便便，千年宿便都清曬！ 上一胎我係廣華順產，d惡露用左個幾月先完，傷口都痛左成個月。 今次清得好快，同埋子宮都收縮得好，頭一星期已經排出好多惡露。陪月叫我得閒就用手搓下個子宮，等佢埋個位埋得靚d，仲話過左頭七日就想搓都搓唔到。
陪月在產後一星期煲益母草俾我飲，連續飲左三日，而家Day 13，惡露已經得返好少，好似嚟M最後一兩日咁。

食療方面，佢都照顧得我好好。
唔係陪月講，我都唔知坐月唔食得隔夜飯，隔夜餸。頭一星期都唔可以食豆腐、食雞。
雖然有d誇張......我以為隔夜飯蒸返熱就食得，佢話有風。
咁我就乖乖聽話，陪月煮乜我就食乜，所有野都食晒飲晒。

唔知係咪因為我乖，同埋休息夠，身體復原得好快，上奶都好順利，12朝已經追到阿女嘅食量，可以全人奶喇😍 老公都記一功，因為老公幫手當夜班，所以我先可以夠瞓泵到咁多奶。
不過子宮收縮就痛到痴線... 頭一星期，每隔一段時間就宮縮，每次痛1分鐘，痛到好似開左5度咁，呢個痛持續左一星期，好似陣痛延續落去咁，初頭痛得好密，慢慢越來越疏。唔知點解上一胎好似唔係好覺有呢種痛，今胎係催生，生完在醫院吊左成包子宮收縮藥，之後果幾日已經痛到標眼淚。上網睇，話如果生得越快，產後宮縮就越快，同埋越痛。我第一胎陣痛左廿幾個鐘，可能咁，所以第一胎子宮收縮得慢，d惡露排左個幾月先清晒。

今胎仲冇咁肥，兩胎陀到生嘅時候體重都係差不多一百四十幾磅，第一胎生完之後只係跌到一百三十幾磅，坐月又肥返，去返一百四十幾磅，肥到豬咁，足足用左一年時間先減返到一百一十幾磅。今胎我在十二朝磅過，得返一百二十幾磅，距離我生之前只係爭左十零磅左右，同埋多左個大肚腩，令我更有信心可以變返以前咁瘦😍

總結，今次請陪月嘅體驗好好，有個好嘅陪月坐月真係事半功倍！
呢d錢真係唔慳得，因為身子係一世嘅，養好身體先可以有精力湊小朋友。
如果之前坐月坐衰左，可以在下次再生嘅時候坐返好。
第一胎冇請陪月嘅，強烈建議第二胎要請返。
只係打算生一個嘅，都好值得請！
不過好嘅陪月好搶手，基本上一驗到就要立即落訂hold期。
準備懷孕嘅，最好拎定幾個好陪月嘅資料，有口碑嘅最好。
祝大家好孕，懷孕、生產、坐月都順順利利！

Kai太的懷孕日記 @ 產後三大痛

【產後三大痛】

生仔十級痛，但除左生仔痛，產後經歷嘅「痛」都唔惹少......
產後三大痛，我有三樣一次過嚟，仲痛過生仔>_<

第一痛：子宮收縮痛
第二痛：痔瘡痛
第三痛：乳頭痛 & 谷奶痛

產後第一痛：子宮收縮痛
子宮因懷孕變大，生產完之後，子宮會慢慢收縮返去原本大小。
生產後的第1-2天左右，腹部就會感到陣陣疼痛感，這是所謂的「產後痛」！生產後宮縮引起疼痛多為正常生理現象，主要目的在於幫助子宮止血，讓惡露與子宮內殘餘的血塊加速排出體外，同時幫助產後媽咪的身體盡快復原。「產後痛」一般都發生在產後1～2天，這種疼痛4～7天後會自然消失。產後痛是子宮收縮產生的疼痛，雖然是正常生理現象，但真係「痛。到。標。眼。水」，尤其係埋身餵奶/泵奶嘅時候，因為餵母乳有助子宮收縮。每次BB啜啜啜嘅時候，個子宮就拿住痛。

產後第二痛：痔瘡痛
正所謂「10個孕婦9個痔」，陀緊BB嘅時候因為肛門附近的腹壓增加，血液循環較差就引起痔瘡。隨著孕媽咪懷孕週期的增加，胎兒越來越大，骨盆腔及子宮變大因而造成腹壓增加，血液循環不佳，尤其是懷孕後期，痔瘡會越來越嚴重。我就係其中一個，而且我嘅痔瘡係血柱性外痔，屬於最痛果隻，仲要唔止一粒，到35週嘅時候，在肛門外面有4粒，每粒大約檸檬核咁大，到生完之後，個PatPat痛到癲，PatPat痔瘡痛仲痛過順產陰道的傷口，痛到坐唔到。喺醫院果幾日，成日都要坐在床上，個PatPat壓力增加，感覺痔瘡仲嚴重左，返到屋企睇下，原本4粒外痔已經腫脹到紅豆冰嘅紅豆咁大。返到屋企頭一星期PatPat都好痛，坐都坐唔到，後來買左痔瘡膏查，排便又順暢左，而家冇咁痛了，同埋細粒返。

產後第三痛：乳頭痛 & 谷奶痛
大部份人奶媽都經歷過「乳頭痛」，啜損，查人奶/羊脂膏，好返，再啜損，地獄無限loop。新手媽媽因為唔識餵，BB啜唔啱位，稍一差池，「蓮姐」就會受傷。雖然我有第一胎經驗，但係埋身並唔成功。頭幾日未上奶，乳頭只係得好少奶，但又知道要俾阿B密密啜先可以快d上奶，所以好快就啜損左。出院後返到屋企用泵泵，開到最細力個乳頭都好痛。到第四日，個胸谷奶谷到脹晒，仲有好多硬塊，乳腺未通，無論點按點泵都係好脹，超級痛>_< 好驚塞奶，更加驚乳腺炎，第二日即刻叫老公買卵磷脂，食左即日通返。通左之後等「蓮姐」好返，就開始做泵媽嘅生活，暫時無再試埋身。

做女人，生仔已經好痛，仲要經歷埋呢d產後痛...T^T
不過生完十日，總算完左喇，希望身體快d復原

Kai太的懷孕日記 @ 面對武漢肺炎的心情...(38w0d)

大年初一睇新聞搞到人心惶惶

TG都未驚完又嚟個武漢肺炎，而且疫情一天比一天嚴峻，確診數字日日幾何級咁上升，在這個非常時期連出街都驚嘅時候但我仲要經常出入醫院

孩子一日未出世一日都好擔心

香港人經歷過沙士，我地唔會忘記歷史有幾慘痛，政府的後知後覺係令到人好嬲，無知和低危機意識令到全球疫情一發不可收拾⋯⋯
但事情已經發展到咁嘅地步
都唔驚得咁多
因為驚都無用
驚定唔驚都一定要去醫院
驚定唔驚都改變唔到事實
唯一可以做的就是祈禱
希望上帝可以保佑我同BB平平安安順順利利

#倒數6天

Kai太的懷孕日記 @ QE 產檢 (37w6d)

24/1 產檢 (37w6d)
接近38週產檢，今日都係去日間醫療中心4樓
如常去到驗小便、量血壓、磅重。今次我終於有自己帶小便，唔洗呢咁hea。
脈搏如常地唔合格，姑娘又叫我再驗過，第一次108，第二次103，其實都唔係超好多啫😅

今日唔知點解特別多人，唔通年三十晚？我本身產檢時間11點3，已經早左到，11點到，等到11點9都未到我見醫生，平時呢個時間我已經走得。等到12點左右終於叫我個名喇，入房見醫生，摸肚仔同聽心跳，醫生話BB個頭位正左喇。跟住落床入去見醫生，醫生話抽血結果血色素升返少少，但都叮囑我繼續食鐵丸，同埋上次化驗結果無中B鏈，同上胎一樣，好Lucky呀。然後就約埋個催生期喇，初初都驚個期會好快，我有朋友話最快第二日就入院。所以我一早諗定counter offer，可能因為新年啦，醫生一俾個期就已經係30號，即係6日後，咁我都放心d，仲有幾日buffer。另外佢俾埋張關於催生需知嘅紙俾我睇，第一次催生，其實我都有d緊張，醫生話人人反應都唔同，未必一次就成功，可能要試幾次，總之留院直到生為止。

下次再返嚟，就係催生嘅日子喇

Kai太的懷孕日記 @ QE 產檢《驗B鏈》 (36w6d)

17/1產檢《驗B鏈》
今日36w6d又返QE產檢，驗B鏈嘅日子
同媽媽group d媽媽傾開，政府會安排懷孕媽媽在35-37週左右驗B鏈
我有好多朋友懷孕期間都中B鏈，命中率幾乎係50%，到底B鏈係咩？B鏈 (全名B型鏈球菌)係在媽媽身體上正常嘅細菌，很容易在陰道同肛門部位搵到，對媽媽係唔會有影響嘅，但係呢隻菌係會喺穿水之後攻擊BB，有機會（1-2%）引發早產、肺炎、細菌入血等等，再嚴重d會導致腦炎。所以政府醫院會在35至37週期間產檢時為準媽媽驗B鏈，在媽媽陰道同埋肛門拎啲分泌物去化驗。如果真係中咗其實都唔洗太擔心，只要在開始進入產程前或者穿水之後打抗生素就可以保護BB㗎喇！

如果第一胎有，第二胎都會當有；但如果第一胎冇，唔代表第二胎冇，所以每次懷孕都要重新再驗一次。

11點去到日間醫療中心4樓，又係例行公事，驗水便、磅重、量血壓，今日炆死我喇，因為天氣涼左得16度，所以著左件毛毛褸，d毛毛好滑好線，太sin，累我倒瀉兩次尿

個廁所又窄，我一咩返個袋上膊頭，1秒就sir落嚟，佢個重量令我隻左手強力chok左一下，就倒瀉晒😫😫😫

跟住入去用試紙驗小便俾姑娘睇，我隻手仲揸住兜尿，驗完俾張紙姑娘mark返，個袋又sin落嚟，又倒瀉第二次😵倒到地下有一撻尿，勁唔好意思，炆死我

今次重量有增長，62.9kg，比上次多左0.5kg，血壓都正常

等左一陣，就被叫名入去見醫生。
一入房姑娘就叫我除褲瞓上床，然後姑娘就用棉棒在我陰道同肛門沾少少分泌物化驗，過程好快都唔痛，完成後姑娘就俾塊布我遮住下半身，然後等醫生過來幫我摸肚仔，聽BB心跳。BB心跳正常，頭位向下胎位正常。好快check完就落床過去見醫生。

我將上次私家產檢醫生開俾我封信交俾QE嘅醫生，話俾佢知BB上次照到肚圍大左4週，醫生話估計BB都屬於大碼，所以建議我考慮38-39週左右催生，唔洗生得咁辛苦。突然間咁樣提出完全冇心理準備......我問醫生，係咪要即刻答架？佢話可以再考慮下，下次產檢再回覆。

由於上胎係作動40週自然產，未試過催生嘅我有d忐忑，兩者都有風險，好多人催生唔成功要食全餐......但係如果留在肚子太耐，BB太大超過8磅，都一樣會有難生最後開刀嘅風險＞＜。仲有一星期，再諗下先。

最後，醫生叫我落去2樓度抽血再驗下血色素有冇提升返，抽完血就走得，下星期再返嚟產檢。

對孕婦有益的零食，醫肚又補充營養！

懷孕期間胃口大左，成日都好肚餓，但食得太多又會肥，咁有咩零食係對孕婦有益又冇咁肥呢？以下是對孕婦健康有益之零食，而且係我超鍾意的：

1) 堅果

堅果係超有益的孕婦零食，營養價值高，含豐富的蛋白質、氨基酸、維生素E、礦物質，其中，植物纖維有助於消化和便秘的防治;維生素E是孕期中重要的營養素之一，具抗氧化功用
以下幾款是適合孕婦的6款堅果：

1、核桃：含有豐富的維生素E、亞麻酸以及磷脂等，尤其是亞麻酸對促進大腦的發育很重要。核桃除了補腦外，還有豐富的鉀，攝取鉀有助於排出體內過多的鈉，對孕婦而言也能有效防止水腫。

2、腰果：腰果的各種維生素含量都高，孕媽咪適量食用能夠同時補充鈣、鐵、鋅，另外鉀含量比核桃來得高，而熱量又比其來得低，能夠潤腸、補充體力、消除疲勞，是孕期中不可或缺的食物。

3、開心果：是人體內熱量、必需脂肪酸中多不飽和脂肪酸、鎂和磷的主要來源，而且也是蛋白質、鈣、鐵和B族維生素的主要來源。開心果可降低人體內膽固醇含量，減少心臟病的發生。並且開心果中含有豐富的油脂，准媽媽常吃開心果對胎寶寶大腦發育有益，可增強胎寶寶智力，但開心果不可多食，準媽媽的最佳適宜攝入量為每日5-8粒左右。

4、花生：花生常被認為是過敏源，但其實花生的維生素E能抗老化，還能預防胎兒出生後出現溶血性貧血。花生衣中含有止血成分，可以對抗纖維蛋白溶解，增強骨髓製造血小板的功能，縮短出血時間，提高血小板量，改善血小板質，加強毛細血管的收縮功能，是孕婦防治再生障礙性貧血的最佳選擇。

5、杏仁：坊間有傳杏仁毒素高，吃杏仁會滑胎，其實杏仁有著豐富的纖維，而且低熱量，適量攝取可以有助排便。杏仁含有豐富的維生素E，能夠有效地防止人衰老，保護心腦血管。杏仁是優質蛋白最好的食物來源之一，還含有膳食纖維，豐富的礦物質和營養元素，是維生素B族的很好來源。建議孕媽咪將一天的甜杏仁食用量，控制在5公克以下。

咁多種堅果當中，核桃係最好的，因為熱量最低，又低糖、低納，高營養！不過無論選咩堅果，都最好揀天然原味，減少糖份同鹽份的攝取。仲要唔好過量啊，一日約十粒就足夠。


2) 紫菜
紫菜含有豐富嘅碘，係懷孕中對胎兒很重要的營養，給甲狀腺和腦部發育。紫菜中的各種B族維生素，特別是核黃素和尼克酸的含量十分豐富。它含有15%左右的礦物質，各種微量元素與大量的礦物質，有助於維持人體內的酸鹼平衡，而且熱量很低，纖維含量很高，對準媽媽來說是不錯的零食。但我們在選擇紫菜時一點要選擇低鈉鹽類的，尤其在懷孕期間有高血壓或水腫的准媽媽，更應該嚴格限制鈉的攝取。每日食幾塊是不錯的零食啊～

3) 水果

1、無花果：能健胃潤腸，還能催乳呢。無花果富含多種維生素和果糖以及葡萄糖等。是孕期的絕佳零食哦！無花果含有多種人體必需氨基酸，有機酸，果膠，鎂、錳、銅、鋅、鈣、硼等礦物質及維生素等營養成分，而且無花果還能夠促進消化，潤腸通便，還有降血脂、降血壓等多種功效，對準媽媽來說是補鈣及預防便秘的優良食品。

2、奇異果：奇異果富含很多營養，像是葉酸、維生素C，這對孕婦來說都是非常重要的營養物質。此外，它還可以增強免疫系統、促進消化、平衡雌激素，還可以預防便秘。

3、蘋果/橙：蘋果、橙子等新鮮水果糖份較低，富含維生素和膳食纖維，並且屬鹼性食物，能使血液保持中性或弱鹼性，可以為孕媽補充足夠的營養。

4、牛油果：牛油果係孕婦的Super Food，含多種維他命、豐富脂肪酸、蛋白質同大量嘅鈉、鉀、鎂、鈣等礦物質。孕婦食一個牛油果，就可以補充每日所需嘅34%纖維。牛油果中嘅水溶性纖維可以幫助降低膽固醇，而非水溶性纖維可以預防及舒緩便秘。牛油果中含有豐富的葉酸，這種重要的維生素或能預防胎兒出現先天性神經管缺陷，孕婦食一個牛油果可以攝入57微克嘅葉酸，大約係孕婦每日攝取量嘅28%。而牛油果中嘅不飽和脂肪酸，對於胎兒嘅大腦發育、眼睛、神經系統同脂肪組織都有好處。

5、車厘茄：車厘茄中含有豐富的維生素、胡蘿蔔素、蛋白質等成分。更具清熱解毒、補血養血的功效，孕早期適量吃一些小番茄對孕媽有好處，而且還可以緩解妊娠反應。孕婦可以食用車厘茄，但是一定要注意不要食用太多，適量即可。每日食10粒，可以舒緩懷孕期間的便秘，又生津止渴。

孕婦因子宮脹大壓迫腸胃，應該盡量少食多餐，每餐只吃四至五成飽，其間吃小食作補充，有助腸胃慢慢消化。避免吃難消化食物如豆類，可減少胃氣脹，而飲食清淡及少吃油膩食物均有助消化。祝大家孕期都食得瞓得～

淘寶育兒好物分享《寶寶篇》

因為有左上一胎經驗，今胎去到好遲先開始準備BB嘅野~
已列好Checklist，開始陸續買緊，下個月就要最後衝刺！

本身BB用嘅野我好少淘寶，不過偶爾都會淘到d性價比高的好物~
今次淘返嚟有幾樣野超高質，所以想介紹一下，開心Share~~


性價比高淘寶好物 @ 嬰兒防水隔尿墊
推薦指數：＊＊＊＊＊

防水墊係上一胎我冇買嘅東西，因為床裖用膠包住左，我在床單面放即棄的防水墊，再加被袋，BB瞓在被袋入面，萬一濕左就洗。今胎點解買呢？因為大仔最近成日瞓覺漏尿，搞到張床濕晒，見到呢張好得意又真係防到水，所以買嚟試下。收到覺得好驚喜，質地好好，仲細細要可以放入機洗，非常方便。所以一連買左兩張 (120cm x 65cm)，一張俾阿仔，一張俾阿女，仲加購左兩張細Size (50cm x 70cm) 放落BB床。收到貨真係超鍾意超鍾意，值得入手^^

婴儿隔尿垫防水可洗超大号透气纯棉新生儿可机洗宝宝月经垫姨妈垫
https://detail.tmall.com/item.htm?id=599173831183&spm=a1z09.2.0.0.4ca12e8dZoqsJJ&_u=rj9riuld9ae&sku_properties=148060595:97041135

========================================================================

性價比高淘寶好物 @ 棉紗沖涼大浴巾
推薦指數：＊＊＊＊

想幫BB買條沖涼大浴巾，搵到呢款棉紗質地嘅，超多好評，沒有熒光劑！睇Comment話小紅書上好多人推薦，買左返嚟覺得質地好好。南極人呢個品牌我6年前已經幫襯過，唔係買BB野，但係佢地嘅質量係Good嘅，俾到信心我放心購買。

南极人婴儿浴巾毛巾纯棉纱布宝宝洗澡新生儿童吸水家用的初生超柔
https://detail.tmall.com/item.htm?id=576706883047&spm=a1z09.2.0.0.4ca12e8dZoqsJJ&_u=rj9riuldf82

========================================================================

性價比高淘寶好物 @ 訂造日本Combi兒童餐椅High Chair套及墊/防污套
推薦指數：＊＊＊＊

相信唔少媽媽都會買High Chair，如果BB肯坐，真係好好用。上胎我都買左一張二手，可惜阿仔唔肯坐，所以最後放返出去。如果買二手High Chair，擔心衛生問題或者想買多個套替換，就可以考慮一下呢間，佢地有專業訂造Combi High Chair嘅椅套。呢間我上胎都幫襯過，當時造工覺得普通，布料太厚，放入機洗唔方便。今次再幫襯係因為淘寶沒有其他選擇，香港都好難搵，同埋隔左幾年，佢地都進步左，手工好左，布料質地靚左薄左。不過注意：佢地嘅安全帶唔係原裝的，同原裝有d分別，所以如果你張High Chair已經有原裝安全帶，建議可以淨係買椅套，安全帶放入洗衣機洗都好乾淨的。

专业订做日本 康贝combi 儿童餐椅坐垫套婴儿BB 替换垫套
https://item.taobao.com/item.htm?spm=a1z09.2.0.0.4ca12e8dZoqsJJ&id=38429958187&_u=rj9riul7c8c

Kai太的懷孕日記 @ 覆盆子茶助順產

朋友早排送左呢盒覆盆子茶俾我，她說可以幫助順產，臨生前一個月開始飲就好～
雖然我已懷孕第二胎，但之前都未聽過呢，上網search下先～

從18世紀開始，歐洲准媽們就有喝覆盆子茶的傳統了。覆盆子葉本身含有豐富的維他命C、維他命Ｅ、鐵、鈣以及其它許多的礦物質如鉀及磷等，對孕婦基本上很有幫助。但飲用此茶的目的，主要是在於覆盆子葉茶本身有軟化子宮頸口的功能，以及它也能幫助子宮收縮時的放鬆動作，間接地也能使會陰部份的肌肉組織更有彈性。總之，就是我們所謂的『比較好生』或『生產會比較順利』的意思。

聽落唔錯喎，原來網上都好多人講～
不過由於係幫助順產，因此這種草藥茶，也只能於產前六至八周 (32-34週)，才可開始飲用。 若太早或過量使用，則有導致早產的可能性，所以各位媽媽要特別注意！另外，覆盆子葉中含有類黃鹼素，有些媽媽產後飲用數周，可幫助子宮恢復並促進乳汁分泌。

今日已經35w5d，而家飲差唔多喇～
好彩記得^^"

獨立包裝好方便，拎出嚟聞落好香

放入杯中加熱水，泡約3-5分鐘就可以飲

試飲感想：味道好好啊，估唔到，我見佢係莓狀，以為係酸酸地，點知一d酸味都冇，仲有淡淡花草茶香，正呀！本身我好鍾意飲茶，但懷孕就收儉左，呢隻茶仲要無咖啡因

喝覆盆子茶對產婦的好處
1.覆盆子茶具有軟化子宮頸的作用，對孕婦的順產有一定的輔助作用。
2.覆盆子茶含有雌激素類似物，會促進乳汁的分泌和增強乳汁中的營養成分，對產後泌乳也有一定的輔助作用。
3.覆盆子具有一定的收斂作用，對產後子宮的恢復有輔助作用。

孕婦喝覆盆子茶的注意事項
1.覆盆子茶具有刺激子宮的作用，在孕早期不適合飲用，以免由於子宮的收縮頻繁引起流產。 2.覆盆子含有類似雌激素的物質，對孕婦體內的激素水平有一定的影響，因此，孕期飲用這種茶不能大量飲用，以免激素平衡被打破，影響胎兒的正常生長發育。
3.覆盆子茶可以加強子宮收縮能力，飲用時注意不能過濃，特別是有剖腹產傾向，早產現象，高血壓，雙胞胎等情況不能食用。孕婦需特別注意此現象。

Kai太的懷孕日記 @ 產前最後一次私家產檢 (35w4d)

8/1私家產檢 (35w4)

太耐無照過，臨產前最後一次到私家產檢。又約呂醫生，不過今次係去石門唔係尖沙咀，因為驚TG🙈 約左12點，都唔係好多人，去到先驗小便，再磅重量血壓。重63.4kg，又無乜重啊😱量血壓我瞄到個脈搏有117，嘩，高過QE度好多，有無問題架？

呂醫生幫我照完，嚇我一跳
BB肚圍大左4週呀😱😱😱
其他size 都正常，佢而家已經重2.7kg，有6磅
醫生話呢個肚圍係生得嘅size
我問醫生：「會唔會生嘅時候Kick住個肚出唔到架？」
唔怪得我無重到啦，因為BB已經重左好多🙈
醫生估計係大碼B，同弘弘一樣
咁我要節制一下飲食先得喇
要食多d菜同食少d澱粉質

呂醫生寫左封信俾我下星期去產檢時交俾QE，唔知QE會點呢...^^"
明明11月尾照完肚仔size已經正常返，點知短短六星期就由符合週數變成大左4週🙈
好驚佢捉我去催生...

BB頭仔向左下喇，但未落晒盤
佢而家側身瞓，個背脊在我左邊，唔怪得成日都係踢我右邊😂
今日好好彩都照到佢個面珠仔，睇到佢啜手指😆連鼻眼嘴都睇得好清楚
個樣同我老公成個餅印😂😂😂基因太強喇🙈

Kai太的懷孕日記 @ QE 產檢見醫生 (34w6d)

3/1 產檢

今日又返QE產檢，11:15 去到ACC日間醫療中心4樓，又如常check小便、量血壓、磅重。上次重62.5kg，今次重62.35kg，咁係我瘦左定係BB無重到？😱 脈搏又超標，106，姑娘要我再量過，第二次好少少喇，100，剛剛踩界🙈

今日入左健康教育室上堂，學點餵母乳。因為上胎好少埋身，又餵得唔耐，我已經唔係好記得正確姿勢同點餵，今胎想學好d，要溫故知新！姑娘教得好好，講解得好清楚，要努力記住佢先。希望實戰時可以順利💪🏻💪🏻💪🏻

上完堂就出去見醫生，醫生幫我量BB心跳，摸肚仔，BB頭轉左下面喇，心跳150正常。見完醫生就約期下次產檢時間，兩星期後再返嚟驗B鏈，到時差不多37週喇。

Kai太的懷孕日記 @ 關於產後脫髮問題

話說上一胎我都有好嚴重嘅產後脫髮問題，特別係產後3至6個月，真係甩得好驚人
上網查過原因之後，知道係正常嘅現象，過左大半年之後，就開始慢慢正常返

因為懷孕婦女生BB之後，頭髮會進入休止期，產後3個月開始脫髮，所以點解產後３個月之後會特別甩得嚴重，因為儲埋一次過甩返之前未甩果d~

另外仲有幾個原因，都會令到產後脫髮問題嚴重:

1. 荷爾蒙影響
孕婦佗B時雌激素和懷孕荷爾蒙多，導致懷孕的時候，毛髮長得比較多，如肚毛、手毛等。而在BB出世後，體內雌激素含量開始減少，體內性激素的比例恢復到懷孕前的正常平衡狀態，同時女性的荷爾蒙就會下降，也影響身上的毛髮數量。

2. 缺鐵貧血
生B會流失很多血，由於血色素不高，而身體有貧血的話，就會導致脫髮。我都有血色素低嘅情況，要努力補充多d鐵先得！

3. 缺鈣
餵人奶更容易流失鐵質和鈣，特別係鈣，甚至比起懷孕時嘅量還要多！ＢＢ會chur你好多營養。很多人產後補鈣的意識並不夠，在產後出現腰背酸痛、牙齒鬆動、足跟痛等「月子病」，哺乳期女性更是骨質疏鬆的高危一族。而缺鈣都係導致脫髮的其中一個原因，所以產前產後都一定要好好補鈣！

4. 毛囊發炎
生B後因為坐月唔洗頭嘅衛生問題，可能會導致毛囊發炎、鬼剃頭等情況出現

我發現最近開始甩少左好多頭髮，唔知係咪關「頭髮休止期」事，平時沖涼閒閒地都甩幾十條，但前日沖涼驚訝地竟然幾乎沒有頭髮在去水渠@@

Kai太的懷孕日記 @ QE 產檢見醫生 (32w6d)

話咁快又過左一個月來到QE產檢時間，今次又係去日間醫療中心4樓，到左如常登記、驗小便、磅重、量血壓，omg，脈搏又踩界，今次仲高d，有108（正常應該係100以下），再量第二次都係咁。

好快就被叫名入房見醫生，上次俾醫生捉左去抽血，原來係驗血報告有貧血，血色素較低，所以脈搏都因而高左。醫生開左鐵丸俾我，要我一定要食😅
本來之前有食開materna，但因為食左之後嚴重便秘，materna太多鐵，所以一個月前已經停左🙈其他suppliment都係得閒就食下，本身真係超唔鍾意食藥。

不過點避都係避唔到，上胎又係血色素低要食鐵丸，今胎都要食。
醫生話驚貧血，萬一生產過程出血太多會有危險，所以點都要食。

今日產檢過程都係瞓喺床，醫生摸下肚仔，聽下BB心跳。

又係唔洗一個鐘就完左產檢，然後拎下次覆診紙（兩星期後），同埋去2樓藥劑部等攞藥，拎完就走得。

Kai太的懷孕日記 @ QE 再照超聲波 (29w2d)

我的產前檢查週記（第29週）：QE 再照超聲波

因為BB肚仔大左一週，所以QE俾左個期我再照一次超聲波
我覺得QE好好，跟得好足
今日再去QE超聲波，今次都係在B大樓3樓「婦產科日間中心」照，又係先去E1會計處登記。去到姑娘派左個號碼，就坐低等叫名。
排第6個，都好快，等左幾個字就到我喇。
Yeah~~~BB肚仔size正常返喇。
BB重1.29kg，醫生話中碼B。
安樂晒，最緊要係BB健健康康^^

Kai太的懷孕日記 @ QE 產檢見醫生 (28w6d)

28週的產檢在日間醫療中心4樓婦產科進行
如常的驗小便、磅重、量血壓
上血壓102
下血壓65
脈搏101
體重60.6kg
Oh，我脈膊又擇界喇，101 (正常100以下)，又要再量過
兩次脈膊都擇界添，唔會有咩事卦

因為擔心催淚煙殘餘物
我專登搵個3M嘅加強版R95口罩，有活性碳，可以過濾有機化合物

但係嚟到醫院令我好驚訝，醫護人員、病人，大部分都只係戴普通口罩，甚至唔戴口罩，都幾多人無戴口罩。係咪我過份擔心？不過為左保護BB，寧願誇張左都唔想掉以輕心，始終無色無味嘅二噁英，無人會知道濃度有幾高，聞唔到唔代表唔存在。

因為早又無乜人，好快就見醫生。
首先瞓床聽BB心跳
然後同醫生傾左幾句
醫生話第二胎BB size可能會再大d
見我脈膊擇界，又俾人捉去樓下2樓抽血😵因為怕甲狀腺有事或貧血。
醫生同姑娘都話覺得我個肚好大😅上胎都7磅8，今胎都可能差不多
抽完血就走得喇~

Kai太的懷孕日記 @ QE 第二次飲糖水 (27w6d)

我的產前檢查週記（第27週）：第二次飲糖水測試

妊娠糖尿病檢查一般在懷孕期24-28週進行葡萄糖耐量測試。

本來在上個月23週時已經飲左一次，點知QE姑娘在10月尾打電話俾我，叫我11月返去飲多次😅 我立刻好驚，係咪個報告唔合格呀？佢話唔係，我個報告合格，只不過上次飲時是23週，差少少先到24週，加上我BB個肚圍大左一週，而我又係高齡，有兩個風險，所以想穩陣d，叫我中期再飲多一次糖水，排除妊娠糖尿病的風險。嗚⋯⋯

所以今日27週我又要返嚟QE再飲多一次糖水😭
今次係去B座3樓飲，約左8:30am，早到連會計部都未開，所以佢叫我今次直接去B座3樓就得。

程序同上次一樣，只係飲糖水同抽血嘅地點唔同，呢度間房坐得舒服d，兩個鐘話咁快就過。今次抽完血都有派鈣思寶同梳打餅。

報告聽日就會出，如果幾日內都無打電話嚟就即係pass！希望pass啦～

Kai太的懷孕日記 @ QE 飲糖水測試 (23w0d)

我的產前檢查週記（第23週）：飲糖水測試

妊娠糖尿病檢查一般在懷孕期24-28週進行葡萄糖耐量測試。
唔係個個孕婦都要飲糖水架，有d孕婦身體健康又年輕，如果醫院覺得你係低風險可以豁免。好似我上一胎係廣華生，一直都係助產士小組跟進，所以完全唔洗飲糖水。

今胎35歲，冇得免疫喇，因為BB肚仔大一週，所以尋日俾醫生捉我提前飲糖水，要排除係妊娠糖尿病:0

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
妊娠糖尿病檢查，又稱妊娠抗糖測試（或俗稱：飲糖水測試）是為高齡（35歲或以上）、高危孕婦包括：家族有妊娠糖尿病遺傳病史（即母親、祖母或姊妹曾患此症）、曾分娩超過4.5公斤（9磅）的重磅嬰兒、本身超重或肥胖、卵巢多囊綜合症患者而設的。在懷孕期間，胎盤會分泌一些荷爾蒙令血糖升高，正常情況孕婦身體能調節反應，產生更多胰島素維持正常血糖濃度。但是有少數孕婦身體無法供應額外胰島素應付胎兒發育期間得到足夠的糖分，因此處於高血糖狀態，到了妊娠後半期更加顯著，妊娠糖尿病因此產生。

妊娠抗糖測試主要測試孕婦在兩小時內身體葡萄糖耐量能力，在測試前（飲糖水前）及測試後（飲糖水後）的頭尾兩小時分別抽取孕婦血液樣本作化驗及分析。在進行抗糖測試的前一晚，晚上12時之後到翌日進行抗糖測試的早上，孕婦都不允許進食，只可飲水，直至抽取第二次血液樣本（即飲糖水後兩小時），以及沒有出現過嘔吐情況，之後才可以進食。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

今朝一早9點我就去到排隊等，係第一批抽血嘅孕婦，抽血在日間醫療中心2樓抽血部進行，有好多病人都係呢度排隊抽血。

9:15am 抽完血就派左支裝滿葡萄糖水嘅樽，唔記得有幾多ml，因為我想盡快離開，所以一接過就一口氣飲晒佢。抽完血，就要隔兩個鐘後再返嚟抽多次，比較空腹血糖及飲糖水後嘅血糖指數，睇下身體分唔分解到糖份。我坐係度冇周圍去，d冷氣都幾凍，呆等2小時後約11:15am 再抽多次血，抽完血會派一盒250ml鈣思寶同一包梳打餅，之後就走得喇～

之前我驚空腹咁耐冇食早餐會好肚餓，所以一早買定個老婆餅諗住抽完血就即刻食，點知原來飲完果支糖水會飽住個肚，兩個鐘都冇肚餓嘅感覺。同埋飲糖水冇想像中咁難飲，係好甜，不過都可以接受。

報告一般1-2日內就會出，如果幾日內都無打電話嚟就即係pass！

Kai太的懷孕日記 @ QE 產檢見醫生 (22w6d)

次次產檢都倒塔咁早真係好辛苦😵
又09:15⋯⋯已經病緊唔夠瞓，難得產檢可以輕鬆下，仲辛苦過返工😭

QE個位又吊腳，次次搭車都起碼要九個字先去到，行埋過去差唔多成粒鐘😪

有比較之下，廣華真係方便好多，屋企樓下有紅Van直接去到廣華門口落，半個鐘內就去到。

今日產檢係驗小便同見醫生，QE唔係每次都要驗小便，今次係第一次，唔知合唔合格呢？下個月頭就要飲糖水喇，上次照結構醫生話BB個肚大左啲，我都驚係我食得太多甜野食到佢肥晒，最緊要係妊娠糖尿同妊娠毒血可以過關🙏🏻

今朝驗小便合格，但量血壓嘅時候個脈搏唔合格，正常應該要100以下，我有108，姑娘叫我唞唞再量過。

跟住我被嗌名叫咗入去間房，第一次嚟產檢都有入嗰間房，有好多媽媽一齊聽姑娘講嘢，今日個主題係產檢程序，同埋餵哺母乳。聽左驗血報告之後，姑娘就派左張白色卡仔同一本關於母乳餵哺嘅小冊子俾我。原來嗰張白色卡係好重要，姑娘叫我地放喺銀包隨身攜帶。如果37週之前作動或者有任何異樣，都可以廿四小時前往產科大樓度檢查。我覺得佢呢個服務同安排真係好好，有專責部門照顧。聽完講座之後再量多次血壓，今次正常返喇。

跟住坐低等嗌名入房見醫生，醫生幫我摸肚，檢查乳房，同埋聽BB心跳。跟住再跟進上次照結構嘅報告，因為BB肚仔大左少少，佢擔心我係妊娠糖尿，所以明明26週先飲糖水，醫生幫我改期聽日就飲。另外再俾咗兩個覆診期我，11月尾照多次超聲波。今晚12點之後就唔可以再食嘢， 聽朝9:15要去到QE抽血😭同飲糖水。本來聽日10:30有個產前運動班都去唔到😔

我好眼瞓呀😭😭😭
成個禮拜都唔夠瞓，今日已經好攰，聽日仲要嚟多次。因為唔夠休息所以個病一路都未好，鼻塞仲嚴重左😞

Kai太的懷孕日記 @ QE 20週照結構 (20w6d)

終於嚟到照結構嘅大日子喇~~~
通常懷孕到大概20-22週左右，就可以去照結構架喇！
照結構對一個孕程嚟講都幾重要的，因為BB的主要器官已發展成型，所以來到孕中期就會有個照結構，主要睇下BB係唔係健康，有冇先天性身體問題或異常等。如發現有嚴重問題，可能需要要24週前安排人工流產。

在私家診所照結構費用約千幾到四幾千蚊不等，有平有貴，中位數約二千幾三千左右。

因為政府醫院資源有限，所以一般公立醫院都唔包照結構呢一part，除非係高齡產婦，或者有特別疾病的產婦，才有機會排到結構。好似我上一胎在廣華生，當時仍是35歲以下，所以醫院一早就已講到明唔包結構，叫我自己俾錢出去照。

上胎我係搵王紹宏醫生照的，睇返先發現原來我上次照結構冇寫到日記＠＠
但我明明記得有寫的，唔通唔小心delete左......?

因為今胎已踏入高齡，聽好多朋友講都話QE生排到結構期，所以今胎改左去QE生，睇下搏唔搏到。皇天不負有心人，真係派到結構期俾我呀，超幸運，可以慳返幾千蚊^^

Booking約左三點，今次都係在B大樓3樓「婦產科日間中心」照，又係先去E1會計處登記。去到姑娘派左個號碼，就坐低等叫名，大概等左大半個鐘左右就到。

照結構時間大概用左15分鐘左右，靚女醫生好細心，首先睇左心臟先，心房、心室、心瓣都正常，然後就到肺、腎、腸、血管、肝，手指、腳指都數齊有10隻，換另一個角度，睇埋個咀仔，冇兔唇，胎水、BB size一齊都正常，重量410g，太好喇^^ 又過左一關！

唯一係個肚仔大左少少，醫生問我係咪食好多甜野^^"

丫也...唔好肥妹仔呀，阿媽要戒甜先得喇～

因為公立醫院唔俾影相同拍片的，所以今次結構冇相可以keep。

下一次產檢日係10月11日，到時見醫生睇下醫生點講先。

Kai太的懷孕日記 @ 產前紀錄 (20w5d)

懷孕週數 20w5d
肚圍 36吋
重量 122磅

Kai太的懷孕日記 @ 有關懷孕戒口

有關懷孕戒唔戒口嘅問題......都幾大爭議🤔

中醫角度係要戒口嘅，好多嘢都唔食得; 西醫角度係除左生嘢同軟雪糕乜都可以食，只要唔好過量，因為均衡飲食才可以攝取不同營養。

我有喺呢方便做過research，發現其實BB患濕疹同媽媽懷孕時戒唔戒口未必有直接關係。
因為有d媽媽生兩胎，第一胎戒得好清，BB出世患上嚴重濕疹，第二胎冇戒口，海鮮照食，凍飲照飲，反而皮膚白白滑滑。

我認為中醫有佢嘅道理，但係西醫都講得啱，相對我比較支持後者。
當然要睇媽媽嘅體質，如果媽媽本身食某d食物都會容易唔舒服嘅，就最好少食為妙。

有益嘅食物，如果過量攝取都會帶來反效果。

紅蘿蔔都好有益，含豐富維生素A，但食得太多維生素A，不但會有畸胎風險，小孩也容易出現發長遲緩、唇顎裂、腦神經障礙等問題。紫菜含豐富嘅碘，可讓胎兒生長及腦部正常發育，但如果食過量，可能會誘發甲狀腺功能亢奮，導致心跳快、手震、容易緊張等不適。

仲有葉酸，對懷孕中的婦女非常重要，孕婦攝取足夠的葉酸，葉酸可以幫助細胞分裂，能夠減低胎兒患上神經管缺陷的風險。但每日攝取劑量不應超過1,000mg，因研究顯示，如孕婦攝取過量的葉酸，可能增加嬰兒患自閉症的機會。記得上一胎懷孕初期，家計會姑娘叮囑我頭3個月一定要食葉酸，但係坊間唔同牌子出嘅葉酸/孕婦維他命所含的葉酸份量都唔同，有d一日食用份量已經有800mg，加埋平時嘅飲食攝取嘅葉酸，好易就超標喇！

懷孕需要更多鐵質來造血，輸送氧氣俾細胞同BB，但係太多鐵質又會造成便秘。我而家食緊嘅孕婦維他命就係太多鐵質，所以服食期間成日便秘，要靠食益生菌才去到廁所^^"

所以結論係...食物本身有唔同營養 (垃圾食物除外)，除非係有敏感問題，否則均衡飲食才是最健康的。

個人而言，我頭三個月完全冇食生嘢、軟雪糕、煙三文魚等，總之凡係李斯特菌的高危食物都要避之則吉，特別係夏天，因為李斯特菌可通過胎盤傳染給胎兒，導致流產、早產、嚴重甚至會死亡。在受李斯特菌感染的足月或臨近足月胎兒中，約有半數可能夭折。較後期感染李斯特菌病的胎兒出生後亦可能會出現智力障礙、癱瘓、失明，以及大腦、心臟和腎臟受損等多種健康問題。

有關懷孕期間的營養攝取，上胎嘅營養講座內容都幾有用
https://kaikaifamily.blogspot.com/2016/07/kai_23.html