Kai太的懷孕日記 @ 陪月的重要性

【陪月的重要性】 好多媽媽生第一胎都未必會請陪月，好似我咁，因為想慳錢，唔捨得用兩皮幾野請個陪月，以為陪月只係煮月子餐同幫手照顧BB，等媽媽有得休息。
上胎係奶奶幫我坐月，佢煮飯俾我食同埋幫手照顧BB，都幫輕好多，但坐完月之後有成半年膝頭痛 (好彩之後冇事)，我就覺得坐月好重要，如果坐月坐得唔好搞壞身子，就一世架喇，所以第二胎，我一驗到有左就搵陪月。

而家坐月第13日，我覺得有陪月真係好好。
首先，陪月煮野好好食，因為食d野好正氣同健康，而家差不多日日有便便，千年宿便都清曬！ 上一胎我係廣華順產，d惡露用左個幾月先完，傷口都痛左成個月。 今次清得好快，同埋子宮都收縮得好，頭一星期已經排出好多惡露。陪月叫我得閒就用手搓下個子宮，等佢埋個位埋得靚d，仲話過左頭七日就想搓都搓唔到。
陪月在產後一星期煲益母草俾我飲，連續飲左三日，而家Day 13，惡露已經得返好少，好似嚟M最後一兩日咁。

食療方面，佢都照顧得我好好。
唔係陪月講，我都唔知坐月唔食得隔夜飯，隔夜餸。頭一星期都唔可以食豆腐、食雞。
雖然有d誇張......我以為隔夜飯蒸返熱就食得，佢話有風。
咁我就乖乖聽話，陪月煮乜我就食乜，所有野都食晒飲晒。

唔知係咪因為我乖，同埋休息夠，身體復原得好快，上奶都好順利，12朝已經追到阿女嘅食量，可以全人奶喇😍 老公都記一功，因為老公幫手當夜班，所以我先可以夠瞓泵到咁多奶。
不過子宮收縮就痛到痴線... 頭一星期，每隔一段時間就宮縮，每次痛1分鐘，痛到好似開左5度咁，呢個痛持續左一星期，好似陣痛延續落去咁，初頭痛得好密，慢慢越來越疏。唔知點解上一胎好似唔係好覺有呢種痛，今胎係催生，生完在醫院吊左成包子宮收縮藥，之後果幾日已經痛到標眼淚。上網睇，話如果生得越快，產後宮縮就越快，同埋越痛。我第一胎陣痛左廿幾個鐘，可能咁，所以第一胎子宮收縮得慢，d惡露排左個幾月先清晒。

今胎仲冇咁肥，兩胎陀到生嘅時候體重都係差不多一百四十幾磅，第一胎生完之後只係跌到一百三十幾磅，坐月又肥返，去返一百四十幾磅，肥到豬咁，足足用左一年時間先減返到一百一十幾磅。今胎我在十二朝磅過，得返一百二十幾磅，距離我生之前只係爭左十零磅左右，同埋多左個大肚腩，令我更有信心可以變返以前咁瘦😍

總結，今次請陪月嘅體驗好好，有個好嘅陪月坐月真係事半功倍！
呢d錢真係唔慳得，因為身子係一世嘅，養好身體先可以有精力湊小朋友。
如果之前坐月坐衰左，可以在下次再生嘅時候坐返好。
第一胎冇請陪月嘅，強烈建議第二胎要請返。
只係打算生一個嘅，都好值得請！
不過好嘅陪月好搶手，基本上一驗到就要立即落訂hold期。
準備懷孕嘅，最好拎定幾個好陪月嘅資料，有口碑嘅最好。
祝大家好孕，懷孕、生產、坐月都順順利利！

Kai太的懷孕日記 @ 自製坐月炒米茶

今日開始放產假喇，本來請左前1後9，但係真懷孕後期實在比想像中辛苦，加上好多野未準備好，如果佢突然出世會好危險，所以都係同公司改左請前2後8。

放假第一件事，就係要整代茶，代茶又稱炒米茶，有暖胃、解口乾作用。之前聽坐月講座，話坐月唔好飲白開水，要飲炒米茶，補中益氣。因為產婦身體較虛弱，身體吸收會較平時差，若在坐月期間飲白開水，身體或會出現胃脤、尿頻、便秘、腳水腫的情況。同埋產婦多有胃寒的情況，飲用白開水會增加口淡感覺，容易作悶。所以坐月期間應飲用代茶，特別係餵人奶的媽媽，要吸收大量水份才有奶俾BB。

我自己本身唔鍾意飲水，加埋以上原因，我更加要整代茶嚟飲。


炒米茶的製作方法：

至於炒米茶的製作方法，坊間有好多個版本，有d人同白米，有d人用糙米，有d人會落埋淮山、黨參、北旗，但最基本嘅材料都離不開米及陳皮，其他材料可以因應個人喜好加。

準備材料：
．米 (可選白米, 紅米, 糙米, 黑糯米，只選其中一種或按個人喜好混合亦可)
．陳皮 - 理氣健脾，燥濕化痰
．圓肉 (龍眼肉) - 有安眠作用
．杞子 - 明目，補腎益精，可調節機體免疫功能
．紅棗 / 南棗 (Optional) - 有補脾和胃、養心安神、補血之效，順產者第4日後可加
．薑 (Optional) - 散寒驅風、止嘔，順產者適用
．茶包袋

注意:
1. 米炒過後有驅風作用
2. 勿用當歸，因會旺血
3. 紅棗較燥(去核用)、南棗補而不燥
4. 陳皮越耐越好，建議7年以上，而且陳皮唔洗浸淋去囊，唔會令其他材料濕透而變壞
5. 順產用薑建議飲時先加，才不會弄濕其他材料
6. 所有材料不用洗，保持乾爽
7. 材料漸進式加...若果產後太快飲用大量紅棗既湯水/代茶...或一些行血藥材會令產婦惡露突然增多..所以一生完先飲"陳皮炒米茶"為佳
8. 炒米可放1個月，代茶要天天清，不可以放過夜

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

製作步驟：

１）白鑊炒米至金黃
炒米我用左: 白米, 紅米, 糙米, 乾鑊炒10分鐘左右, 炒到米變少少金黃色即可, 不要炒焦!!! 米可洗不唔洗，我懶洗，所以直接放入白鑊炒。

２）把炒好的米連同材料放入茶包袋

茶包袋於生活提案/日本城等有售，一包有100個，我買依隻包得幾好

３）包裝份量

每包份量可按個人喜好增減:
炒米 (兩西式湯匙)
陳皮一小片
圓肉數粒
杞子隨意

第一日: 炒米 + 陳皮 ( 順產可以加薑 )
第二日: 炒米 + 陳皮 + 元肉
第三日至坐完月: 炒米 + 陳皮 + 元肉 + 杞子 (開刀者適用)
第四日至坐完月: 炒米 + 陳皮 + 元肉 + 杞子 + 南棗 (順產者適用)

開刀者只需弄第一日, 第二日, 第三日
順產者第一日, 第二日, 第三日, 第四日都要弄



４）弄好後放入密實袋壓走空氣

一次過整好三天份量，放入雪櫃備用，到入院時帶埋去醫院就可以了。

我炒了三杯米，大概整到8天的份量。

頭幾日在醫院，飲用前會先過一次熱水，第二次熱水焗15分鐘就可以飲，每一包炒米茶可以翻沖2-3次。帶備一隻保溫杯就好方便了！

出院後可以直接把材料放入滾水內煲焗約一小時，直接搵茶壺裝起，想飲時直接倒出來就得。

Kai太的懷孕日記 @ 坐月錦囊

兩個月前參加雪印的產前講座，節錄左Ｄ筆記，ＢＢ就嚟出世喇，順便溫故知新先！

坐月宜忌：坐月可以洗頭嗎？
．坐月是可以洗頭
．洗頭後立即用風筒吹乾
．確保浴室衛生設備完善
．洗頭可以用薑水或自來水

坐月宜忌：沖涼要用薑水？
．沖涼宜用煮滾的水或薑水洗澡。薑水有驅風寒作用
．可用薑皮薑肉放入水全煮滾待用
．如不用薑皮煲水洗澡，可用薑皂或薑製成的沐浴露
．用薑洗澡要注意產婦有否皮膚敏感、濕疹及血壓高的情況

坐月宜忌：甚麼是代茶？
．代茶又稱炒米茶
．炒米茶有暖胃、解口乾作用
．炒米茶材料：白米糙米、紅棗／南棗、陳皮、圓肉
．炒米茶製法：把白米洗淨瀝乾，放入白鑊炒至金黃，把炒米放入滾水內煲，加入陳皮紅棗煲焗約一小時

坐月宜忌：進補時間及方法
．順產進補時間：１２朝後、惡露排清
．開刀進補時間：２１日後、惡露排清
．疑問：食補問可以餵人奶嗎？
．餵人奶是可以食補品，但要時間配合及以清潤為主，不寒不燥

坐月飲食建議
．蔬菜類：菜心、芥蘭、西蘭花、菠菜、節瓜
．肉類：蒸豬肉餅、金針雲耳蒸雞、南瓜炒肉碎
．牛肉可否進食視乎個人喜好，牛肉有補血作用，鐵質高。但傳統認為牛肉、蛋對傷口有副作用，容易引致發炎。
．上奶湯水可煲清潤湯水：魚湯、瘦肉湯、清雞湯、花生雞腳鱆魚湯
．回奶食物：例如豬乾、乳鴿、淡豆豉、麥芽

坐月建議湯水
．木瓜魚湯、蕃茄薯仔紅衫魚湯
．滋潤湯水：百合無花果及豬展湯、淮山南北杏嚮螺瑤柱豬展湯、冬蟲草鮑魚淮山瑤柱雞肉湯、節瓜粟子嚮螺排骨湯、花膠鮑魚瑤柱豬展湯

坐月飲食建議
．薑醋為何要食？
．薑可以驅寒驅風，醋可補血，豬腳上奶
．豬腳豬手鈣質高，雞蛋含鈣及蛋白質
．中國傳統習俗十二朝派薑醋

薑醋製法
．食用前六至八星期將薑洗淨刮皮風乾，拍鬆及切厚片
．薑瀝乾水份放入白鑊炒至乾身
．將薑放入瓦煲加入甜醋煲滾轉用文火，煲半小時熄火
．每隔三至五天翻煲待用
．食前兩天把豬手和豬腳毛洗淨斬件、出水及啤水
．豬手腳瀝乾放入白鑊炒至乾身放入薑醋煲內煲約一小時後加入雞蛋及薑一同煲約一小時，熄火便成

雞酒
．雞酒行氣活血、滋補養身
．材料：雞，木耳，雲耳，金針，紅棗或南棗，糯米酒或米酒

雞酒製法
．雞洗淨去內臟切件，少量糖鹽醃約１０分鐘
．金針浸軟後過水打結
．雲耳木耳浸發出水
．紅棗或南棗加水煮３０分鐘待用
．熱鑊炒薑放油少許，煎封雞件後加入金針、雲耳、木耳、再贊酒
．將棗水加入，燒滾後，煮熟雞酒加入適量酒、鹽，調味後才進食

薑炒飯
．驅風驅寒氣，產後７至１０日後才可進食
．薑切米粒，飯煮熟後降溫待用
．薑洗淨切米粒，將薑米粒炒乾後下少許油，加入飯與薑粒一起炒，可加入雞蛋或蛋白，後下少許鹽才進食

煮食產婦須知
．要注意營養
．可進食豆類，瓜菜類，吸收植物蛋白質
．如可進食蛋類可增加蛋白質及鈣質

坐月餐單：休養一期（平補排惡露）
適合產後首７天
早餐
．肉丸粥
．小米肉碎粥
．五更飯（配以瘦肉或雞肉）
餸類
．梅菜蒸魚
．冬菇蒸肉片
．西蘭花炒肉片
．節瓜炆排骨
湯類
．淮山圓肉豬展湯
．蓮藕百合排骨湯
．木瓜魚湯
．清燉雞汁
甜品
．薑汁燉奶
．合桃芝麻糊
．蓮子百合糖水

坐月餐單：休養二期（平補排惡露）
適合產後首８天至１４天
早餐
．小米肉碎粥
．花膠紅米肉碎粥
．五更飯（配以淮水粒或雞肉）
餸類
．銀魚仔蒸肉餅
．冬菇瑤柱蒸滑雞
．肉碎蒸釀節瓜甫
湯類
．紅腰豆合桃腰果瘦肉湯
．淮山圓肉螺頭豬展湯
．鱆魚茨實蓮子豬展湯
甜品
．雪耳燉木瓜
．杏仁露
．合桃露

坐月餐單：進補一期（不宜太燥補）
適合產後首１５天至２１天
早餐
．南瓜肉碎通粉
．肉碎紅米粥
．五更飯（配以瑤柱杞子及雞肉）
餸類
．粟米燴魚塊
．三色椒炒肉絲
．四季豆鮮百合炒雞球
湯類
．鮑魚海參煲雞湯
．紅棗圓肉冬蟲草煲豬展湯
．猴頭菇花膠玉竹煲豬展湯
甜品
．冰糖燉木瓜
．花膠燉鮮奶
．合桃腰果糊

坐月餐單：進補二期（養血、養陰，大補元氣）
適合產後首２２天至３０天
早餐
．肉片菜心通粉
．陳皮肉丸雞粥
．五更飯（配以南瓜、滑雞、牛肉）
餸類
．鮮茄洋蔥燴豬扒
．陳皮薑絲蒸石斑
．花膠海參炆冬菇
．蓮藕花生炆豬手
湯類
．花膠螺頭烏雞湯
．南棗栗子燉水魚湯
．鮑魚螺頭花膠煲雞
．冬蟲草燉竹絲雞
甜品
．沙參玉竹雞蛋糖水
．南北杏冰糖燉木瓜雪耳
．芝麻糊

產後修身
．產後運動有助血液循環
．餵哺母乳助子宮收縮，令產婦身體回復窈窕身材
．避免進食高糖高脂肪高膽固醇食物，以清淡為主雞魚瘦肉新鮮蔬菜瓜果類，每餐份量適中

認識嬰兒黃疸
．初生嬰兒黃疸非常普通，大部份是生理性
．出生後３－５日呈現
．嚴重黃疸可導致失聰及阻礙腦部發育
．餵哺母乳的嬰兒黃疸延長，但不會加深病症，可以延續餵哺母乳
．徵狀：皮膚、眼白呈黃色，小便顏色茶色，嚴重者食慾下降
．治療：照燈療法，水份充足，餵母乳的母親避免進食中藥
．嚴重黃疸可能要換血