Kai太的懷孕日記 @ 廣華產檢 (33w5d)

今日又係一個月一次嘅產檢，本身約左10:30，人流同平時差唔多，等待嘅過程有個姑娘問我願唔願意參加一個「實驗計劃」，佢會搵240對夫婦，抽籤分成兩組，一組係按摩組，一組係非按摩組，抽中按摩組的夫婦，醫院會安排上「產前按摩班」，然後在產前利用按摩的方式減痛；另一組就完全唔俾按摩，其他減痛方法都用得。因為我地之前報唔到按摩班，報到果班已經係預產期，所以好想試下運氣。本人係非常支持非藥物式減痛方法的，因為對BB的副作用減到最低，不過...希望還希望，運氣差的我抽中左「control group」，即係冇按摩組XD
有少少失望，不過唔緊要啦，仲有其他方法家嘛。

等到約12點幾可以見姑娘，佢循例幫我摸肚仔，聽BB心跳，Size正常，佢仲話BB背脊在左邊，咦，明明在右邊架，之前照幾次超聲波都係右邊。頭仔在下面，佢仲叫我用手摸：「你摸下，頭仔係呢度呀」但係我摸完都唔覺得果個係頭XD 姑娘好勁。今日產檢仲有份問卷要填，主要係考我對餵母乳嘅知識。因為之前有聽過醫院產前講座，所以全部都答啱晒。

對返上次個驗血報告，血色素已經回升返至11.4，姑娘話依個數字好靚，可以唔洗再食鐵丸～不過都要繼續食返多d紅肉同埋深綠色蔬菜。