對上一次照超聲波已經係7月30日照結構果日，差不多個半月前，真係等到頸都長。今次又去返尤醫生度，約左10:15am，等左55分鐘左右。一見面醫生同我地回顧返上次17週時嘅紀錄，佢話上次BB前臂同小腿長度爭少少，以威院個標準係合格，但以其他醫院個標準就短左少少，今次26週，目標係前臂4cm，小腿4.4cm。度之前有d緊張，因為已經好耐冇照過，唔知ＢＢ生長速度如何，照完後鬆一口氣，手仔有4.35cm長，腳仔有4.59cm長，重0.9kg (約2磅1安士)，符合標準。不過今次佢冇咁乖俾我地睇個靚樣喇，用對手仔遮住左，只係睇到個靚耳仔同腳仔。至於位置呢，而家頭仔向下，眼望我右邊身，所以而家佢郁都係右邊肚皮彈彈下。
弘弘b，你要加油啊！努力吸收營養，媽媽都會努力食多Ｄ有營養嘅食物俾食懾取。下個月再見^^
診所送左罐奶粉Sample俾我地試，話如果餵人奶唔夠需要補奶粉時可以俾ＢＢ食，依個係雅培新出的系列，叫Eleva，係全新配方，源自愛爾蘭。之前完全未聽過，拎左張單張睇下。而家屋企已經有幾罐奶粉Sample，咁多隻牌子都唔知揀邊隻好，照計無理由逐隻牌子試架。
************************************************************************
睇完醫生已經11點幾 ，拿拿聲趕去廣華聽產前講座，今日主題係「母乳餵哺」。原本11:15am開始，我地遲到半小時，又錯過左好多。姑娘講解得好好，有教餵哺母乳的姿勢及技巧，仲overrun到一點先完。餵母乳一直都係我幾擔心嘅問題，聽身邊嘅朋友講得多，好驚自已無奶，又驚佢啜到我好痛，又驚返工後唔知點應付泵奶的問題。姑娘都有叫我地放鬆心情唔洗緊張，生完之後醫院的姑娘都會再教我地，唔識學到識。
聽左咁多產前講座，心情真係由咩都好驚轉為鎮定，船到橋頭自然直，生產是每個媽媽必經的階段，咁多女人都做到，我相信我一定都可以嘅！
沒有留言:
張貼留言