Kai太的懷孕日記 @ 關於產後脫髮問題

話說上一胎我都有好嚴重嘅產後脫髮問題，特別係產後3至6個月，真係甩得好驚人
上網查過原因之後，知道係正常嘅現象，過左大半年之後，就開始慢慢正常返

因為懷孕婦女生BB之後，頭髮會進入休止期，產後3個月開始脫髮，所以點解產後３個月之後會特別甩得嚴重，因為儲埋一次過甩返之前未甩果d~

另外仲有幾個原因，都會令到產後脫髮問題嚴重:

1. 荷爾蒙影響
孕婦佗B時雌激素和懷孕荷爾蒙多，導致懷孕的時候，毛髮長得比較多，如肚毛、手毛等。而在BB出世後，體內雌激素含量開始減少，體內性激素的比例恢復到懷孕前的正常平衡狀態，同時女性的荷爾蒙就會下降，也影響身上的毛髮數量。

2. 缺鐵貧血
生B會流失很多血，由於血色素不高，而身體有貧血的話，就會導致脫髮。我都有血色素低嘅情況，要努力補充多d鐵先得！

3. 缺鈣
餵人奶更容易流失鐵質和鈣，特別係鈣，甚至比起懷孕時嘅量還要多！ＢＢ會chur你好多營養。很多人產後補鈣的意識並不夠，在產後出現腰背酸痛、牙齒鬆動、足跟痛等「月子病」，哺乳期女性更是骨質疏鬆的高危一族。而缺鈣都係導致脫髮的其中一個原因，所以產前產後都一定要好好補鈣！

4. 毛囊發炎
生B後因為坐月唔洗頭嘅衛生問題，可能會導致毛囊發炎、鬼剃頭等情況出現

我發現最近開始甩少左好多頭髮，唔知係咪關「頭髮休止期」事，平時沖涼閒閒地都甩幾十條，但前日沖涼驚訝地竟然幾乎沒有頭髮在去水渠@@

Kai太的懷孕日記 @ QE 產檢見醫生 (32w6d)

話咁快又過左一個月來到QE產檢時間，今次又係去日間醫療中心4樓，到左如常登記、驗小便、磅重、量血壓，omg，脈搏又踩界，今次仲高d，有108（正常應該係100以下），再量第二次都係咁。

好快就被叫名入房見醫生，上次俾醫生捉左去抽血，原來係驗血報告有貧血，血色素較低，所以脈搏都因而高左。醫生開左鐵丸俾我，要我一定要食😅
本來之前有食開materna，但因為食左之後嚴重便秘，materna太多鐵，所以一個月前已經停左🙈其他suppliment都係得閒就食下，本身真係超唔鍾意食藥。

不過點避都係避唔到，上胎又係血色素低要食鐵丸，今胎都要食。
醫生話驚貧血，萬一生產過程出血太多會有危險，所以點都要食。

今日產檢過程都係瞓喺床，醫生摸下肚仔，聽下BB心跳。

又係唔洗一個鐘就完左產檢，然後拎下次覆診紙（兩星期後），同埋去2樓藥劑部等攞藥，拎完就走得。

Kai太的懷孕日記 @ QE 再照超聲波 (29w2d)

我的產前檢查週記（第29週）：QE 再照超聲波

因為BB肚仔大左一週，所以QE俾左個期我再照一次超聲波
我覺得QE好好，跟得好足
今日再去QE超聲波，今次都係在B大樓3樓「婦產科日間中心」照，又係先去E1會計處登記。去到姑娘派左個號碼，就坐低等叫名。
排第6個，都好快，等左幾個字就到我喇。
Yeah~~~BB肚仔size正常返喇。
BB重1.29kg，醫生話中碼B。
安樂晒，最緊要係BB健健康康^^

Kai太的懷孕日記 @ QE 產檢見醫生 (28w6d)

28週的產檢在日間醫療中心4樓婦產科進行
如常的驗小便、磅重、量血壓
上血壓102
下血壓65
脈搏101
體重60.6kg
Oh，我脈膊又擇界喇，101 (正常100以下)，又要再量過
兩次脈膊都擇界添，唔會有咩事卦

因為擔心催淚煙殘餘物
我專登搵個3M嘅加強版R95口罩，有活性碳，可以過濾有機化合物

但係嚟到醫院令我好驚訝，醫護人員、病人，大部分都只係戴普通口罩，甚至唔戴口罩，都幾多人無戴口罩。係咪我過份擔心？不過為左保護BB，寧願誇張左都唔想掉以輕心，始終無色無味嘅二噁英，無人會知道濃度有幾高，聞唔到唔代表唔存在。

因為早又無乜人，好快就見醫生。
首先瞓床聽BB心跳
然後同醫生傾左幾句
醫生話第二胎BB size可能會再大d
見我脈膊擇界，又俾人捉去樓下2樓抽血😵因為怕甲狀腺有事或貧血。
醫生同姑娘都話覺得我個肚好大😅上胎都7磅8，今胎都可能差不多
抽完血就走得喇~

Kai太的懷孕日記 @ QE 第二次飲糖水 (27w6d)

我的產前檢查週記（第27週）：第二次飲糖水測試

妊娠糖尿病檢查一般在懷孕期24-28週進行葡萄糖耐量測試。

本來在上個月23週時已經飲左一次，點知QE姑娘在10月尾打電話俾我，叫我11月返去飲多次😅 我立刻好驚，係咪個報告唔合格呀？佢話唔係，我個報告合格，只不過上次飲時是23週，差少少先到24週，加上我BB個肚圍大左一週，而我又係高齡，有兩個風險，所以想穩陣d，叫我中期再飲多一次糖水，排除妊娠糖尿病的風險。嗚⋯⋯

所以今日27週我又要返嚟QE再飲多一次糖水😭
今次係去B座3樓飲，約左8:30am，早到連會計部都未開，所以佢叫我今次直接去B座3樓就得。

程序同上次一樣，只係飲糖水同抽血嘅地點唔同，呢度間房坐得舒服d，兩個鐘話咁快就過。今次抽完血都有派鈣思寶同梳打餅。

報告聽日就會出，如果幾日內都無打電話嚟就即係pass！希望pass啦～

Kai太的懷孕日記 @ 卓越產檢 (25w3d)

今日又去見呂醫生喇～
最期待又可以見妹妹嘅日子^_^
25週妹妹已經大個左好多，眼耳口鼻都成晒形，所以今次照到個樣清楚好多呀😍
妹妹各方面都正常健康，肚仔真係大左一週，但醫生冇話特別有問題，問我係咪食好多甜野。為左妹妹唔好變肥妹仔，我要戒下口喇。

下星期26週要搭飛機，醫生出埋封孕婦健康證明信俾我證明我可以搭飛機。

Kai太的懷孕日記 @ QE 飲糖水測試 (23w0d)

我的產前檢查週記（第23週）：飲糖水測試

妊娠糖尿病檢查一般在懷孕期24-28週進行葡萄糖耐量測試。
唔係個個孕婦都要飲糖水架，有d孕婦身體健康又年輕，如果醫院覺得你係低風險可以豁免。好似我上一胎係廣華生，一直都係助產士小組跟進，所以完全唔洗飲糖水。

今胎35歲，冇得免疫喇，因為BB肚仔大一週，所以尋日俾醫生捉我提前飲糖水，要排除係妊娠糖尿病:0

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
妊娠糖尿病檢查，又稱妊娠抗糖測試（或俗稱：飲糖水測試）是為高齡（35歲或以上）、高危孕婦包括：家族有妊娠糖尿病遺傳病史（即母親、祖母或姊妹曾患此症）、曾分娩超過4.5公斤（9磅）的重磅嬰兒、本身超重或肥胖、卵巢多囊綜合症患者而設的。在懷孕期間，胎盤會分泌一些荷爾蒙令血糖升高，正常情況孕婦身體能調節反應，產生更多胰島素維持正常血糖濃度。但是有少數孕婦身體無法供應額外胰島素應付胎兒發育期間得到足夠的糖分，因此處於高血糖狀態，到了妊娠後半期更加顯著，妊娠糖尿病因此產生。

妊娠抗糖測試主要測試孕婦在兩小時內身體葡萄糖耐量能力，在測試前（飲糖水前）及測試後（飲糖水後）的頭尾兩小時分別抽取孕婦血液樣本作化驗及分析。在進行抗糖測試的前一晚，晚上12時之後到翌日進行抗糖測試的早上，孕婦都不允許進食，只可飲水，直至抽取第二次血液樣本（即飲糖水後兩小時），以及沒有出現過嘔吐情況，之後才可以進食。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

今朝一早9點我就去到排隊等，係第一批抽血嘅孕婦，抽血在日間醫療中心2樓抽血部進行，有好多病人都係呢度排隊抽血。

9:15am 抽完血就派左支裝滿葡萄糖水嘅樽，唔記得有幾多ml，因為我想盡快離開，所以一接過就一口氣飲晒佢。抽完血，就要隔兩個鐘後再返嚟抽多次，比較空腹血糖及飲糖水後嘅血糖指數，睇下身體分唔分解到糖份。我坐係度冇周圍去，d冷氣都幾凍，呆等2小時後約11:15am 再抽多次血，抽完血會派一盒250ml鈣思寶同一包梳打餅，之後就走得喇～

之前我驚空腹咁耐冇食早餐會好肚餓，所以一早買定個老婆餅諗住抽完血就即刻食，點知原來飲完果支糖水會飽住個肚，兩個鐘都冇肚餓嘅感覺。同埋飲糖水冇想像中咁難飲，係好甜，不過都可以接受。

報告一般1-2日內就會出，如果幾日內都無打電話嚟就即係pass！

Kai太的懷孕日記 @ QE 產檢見醫生 (22w6d)

次次產檢都倒塔咁早真係好辛苦😵
又09:15⋯⋯已經病緊唔夠瞓，難得產檢可以輕鬆下，仲辛苦過返工😭

QE個位又吊腳，次次搭車都起碼要九個字先去到，行埋過去差唔多成粒鐘😪

有比較之下，廣華真係方便好多，屋企樓下有紅Van直接去到廣華門口落，半個鐘內就去到。

今日產檢係驗小便同見醫生，QE唔係每次都要驗小便，今次係第一次，唔知合唔合格呢？下個月頭就要飲糖水喇，上次照結構醫生話BB個肚大左啲，我都驚係我食得太多甜野食到佢肥晒，最緊要係妊娠糖尿同妊娠毒血可以過關🙏🏻

今朝驗小便合格，但量血壓嘅時候個脈搏唔合格，正常應該要100以下，我有108，姑娘叫我唞唞再量過。

跟住我被嗌名叫咗入去間房，第一次嚟產檢都有入嗰間房，有好多媽媽一齊聽姑娘講嘢，今日個主題係產檢程序，同埋餵哺母乳。聽左驗血報告之後，姑娘就派左張白色卡仔同一本關於母乳餵哺嘅小冊子俾我。原來嗰張白色卡係好重要，姑娘叫我地放喺銀包隨身攜帶。如果37週之前作動或者有任何異樣，都可以廿四小時前往產科大樓度檢查。我覺得佢呢個服務同安排真係好好，有專責部門照顧。聽完講座之後再量多次血壓，今次正常返喇。

跟住坐低等嗌名入房見醫生，醫生幫我摸肚，檢查乳房，同埋聽BB心跳。跟住再跟進上次照結構嘅報告，因為BB肚仔大左少少，佢擔心我係妊娠糖尿，所以明明26週先飲糖水，醫生幫我改期聽日就飲。另外再俾咗兩個覆診期我，11月尾照多次超聲波。今晚12點之後就唔可以再食嘢， 聽朝9:15要去到QE抽血😭同飲糖水。本來聽日10:30有個產前運動班都去唔到😔

我好眼瞓呀😭😭😭
成個禮拜都唔夠瞓，今日已經好攰，聽日仲要嚟多次。因為唔夠休息所以個病一路都未好，鼻塞仲嚴重左😞

Kai太的懷孕日記 @ QE 20週照結構 (20w6d)

終於嚟到照結構嘅大日子喇~~~
通常懷孕到大概20-22週左右，就可以去照結構架喇！
照結構對一個孕程嚟講都幾重要的，因為BB的主要器官已發展成型，所以來到孕中期就會有個照結構，主要睇下BB係唔係健康，有冇先天性身體問題或異常等。如發現有嚴重問題，可能需要要24週前安排人工流產。

在私家診所照結構費用約千幾到四幾千蚊不等，有平有貴，中位數約二千幾三千左右。

因為政府醫院資源有限，所以一般公立醫院都唔包照結構呢一part，除非係高齡產婦，或者有特別疾病的產婦，才有機會排到結構。好似我上一胎在廣華生，當時仍是35歲以下，所以醫院一早就已講到明唔包結構，叫我自己俾錢出去照。

上胎我係搵王紹宏醫生照的，睇返先發現原來我上次照結構冇寫到日記＠＠
但我明明記得有寫的，唔通唔小心delete左......?

因為今胎已踏入高齡，聽好多朋友講都話QE生排到結構期，所以今胎改左去QE生，睇下搏唔搏到。皇天不負有心人，真係派到結構期俾我呀，超幸運，可以慳返幾千蚊^^

Booking約左三點，今次都係在B大樓3樓「婦產科日間中心」照，又係先去E1會計處登記。去到姑娘派左個號碼，就坐低等叫名，大概等左大半個鐘左右就到。

照結構時間大概用左15分鐘左右，靚女醫生好細心，首先睇左心臟先，心房、心室、心瓣都正常，然後就到肺、腎、腸、血管、肝，手指、腳指都數齊有10隻，換另一個角度，睇埋個咀仔，冇兔唇，胎水、BB size一齊都正常，重量410g，太好喇^^ 又過左一關！

唯一係個肚仔大左少少，醫生問我係咪食好多甜野^^"

丫也...唔好肥妹仔呀，阿媽要戒甜先得喇～

因為公立醫院唔俾影相同拍片的，所以今次結構冇相可以keep。

下一次產檢日係10月11日，到時見醫生睇下醫生點講先。

Kai太的懷孕日記 @ 產前紀錄 (20w5d)

懷孕週數 20w5d
肚圍 36吋
重量 122磅

Kai太的懷孕日記 @ 有關懷孕戒口

有關懷孕戒唔戒口嘅問題......都幾大爭議🤔

中醫角度係要戒口嘅，好多嘢都唔食得; 西醫角度係除左生嘢同軟雪糕乜都可以食，只要唔好過量，因為均衡飲食才可以攝取不同營養。

我有喺呢方便做過research，發現其實BB患濕疹同媽媽懷孕時戒唔戒口未必有直接關係。
因為有d媽媽生兩胎，第一胎戒得好清，BB出世患上嚴重濕疹，第二胎冇戒口，海鮮照食，凍飲照飲，反而皮膚白白滑滑。

我認為中醫有佢嘅道理，但係西醫都講得啱，相對我比較支持後者。
當然要睇媽媽嘅體質，如果媽媽本身食某d食物都會容易唔舒服嘅，就最好少食為妙。

有益嘅食物，如果過量攝取都會帶來反效果。

紅蘿蔔都好有益，含豐富維生素A，但食得太多維生素A，不但會有畸胎風險，小孩也容易出現發長遲緩、唇顎裂、腦神經障礙等問題。紫菜含豐富嘅碘，可讓胎兒生長及腦部正常發育，但如果食過量，可能會誘發甲狀腺功能亢奮，導致心跳快、手震、容易緊張等不適。

仲有葉酸，對懷孕中的婦女非常重要，孕婦攝取足夠的葉酸，葉酸可以幫助細胞分裂，能夠減低胎兒患上神經管缺陷的風險。但每日攝取劑量不應超過1,000mg，因研究顯示，如孕婦攝取過量的葉酸，可能增加嬰兒患自閉症的機會。記得上一胎懷孕初期，家計會姑娘叮囑我頭3個月一定要食葉酸，但係坊間唔同牌子出嘅葉酸/孕婦維他命所含的葉酸份量都唔同，有d一日食用份量已經有800mg，加埋平時嘅飲食攝取嘅葉酸，好易就超標喇！

懷孕需要更多鐵質來造血，輸送氧氣俾細胞同BB，但係太多鐵質又會造成便秘。我而家食緊嘅孕婦維他命就係太多鐵質，所以服食期間成日便秘，要靠食益生菌才去到廁所^^"

所以結論係...食物本身有唔同營養 (垃圾食物除外)，除非係有敏感問題，否則均衡飲食才是最健康的。

個人而言，我頭三個月完全冇食生嘢、軟雪糕、煙三文魚等，總之凡係李斯特菌的高危食物都要避之則吉，特別係夏天，因為李斯特菌可通過胎盤傳染給胎兒，導致流產、早產、嚴重甚至會死亡。在受李斯特菌感染的足月或臨近足月胎兒中，約有半數可能夭折。較後期感染李斯特菌病的胎兒出生後亦可能會出現智力障礙、癱瘓、失明，以及大腦、心臟和腎臟受損等多種健康問題。

有關懷孕期間的營養攝取，上胎嘅營養講座內容都幾有用
https://kaikaifamily.blogspot.com/2016/07/kai_23.html

Kai太的懷孕日記 @ 卓越產檢 (16w0d)

呀～～～等到頸都長喇！
由驗完唐氏到今日又過左4星期，在未feel到胎動嘅時間，真係覺得好不安。
即使係第二胎有經驗，都仍然會囉囉亂，直到見到BB郁先至安樂。
下一次政府產檢要等到9月27日，仲有成個月呀，同埋政府唔俾影相，所以今日又book左卓越搵呂醫生產檢，見下BB先😊

星期六嘅卓越醫務中心好熱鬧，超多準媽媽嚟產檢，幾乎坐滿了人。今日帶埋老公同仔仔一齊見BB，阿仔仲未知咩事，只係知媽媽個肚大左，裡面有BB，但對於妹妹嘅來臨，暫時仲未有太大感覺。不知不覺等左一個鐘左右，可惜阿仔瞓著左見唔到妹妹。

呂醫生超好人，佢幫我影左好多相，咁啱BB好活躍，不停郁來郁去，呂醫生仲幫我錄低左Video😍醫生話BB好健康，各方面都正常，Size正常，好開心呀～
如果各位孕媽正在尋找好嘅產科醫生，誠意推薦呂桂英醫生，細心又溫柔，價錢仲非常合理。

知道BB健康終於安心d，進入第16週已經冇晒孕吐不適，開始有返胃口，要好好享受孕中期的快樂😊

Kai太的懷孕日記 @ 出左Nifty報告喇 (12w2d)

出左Nifty報告喇！係囡呀😍😍😍😍😍😍😍

今日卓越診所姑娘Whatsapp我：
「您好, 你的nifty pro 報告已出, 報告正常, 不用擔心. 請問想知性別嗎?」

我都未問，佢就已經答下一句：
「baby girl」

超開心呀～～～
如願以償，湊夠一個好字！

一早Plan左生兩個，其實仔女都冇所謂，健康就得，性別都係緣份嚟嘅
但係如果可以有一子一女，當然係最Perfect啦！
老公得知有個前世情人嚟搵佢，開心到不得了

Kai太的懷孕日記 @ QE唐氏 照超聲波 (11w4d)

今日係第二次去QE產檢，今日終於有得照超聲波喇！因為今日係驗早期唐氏。
預約時間係8:45am，又係晨咁早...上次係直接去粉紅色大樓產檢，今次有d唔同，係去B大樓3樓做產檢。但去之前要特登去另E大樓1樓會計部度登記左先，因為唔識路，所以都搵左好一陣......去到E大樓會計部有其他病人一齊排隊，搞到遲左少少先到B大樓。

去到登記左就度高磅重，然後坐低等嗌名，等左半個鐘左右就到我喇～今日要照超聲波+抽血，我被安排照左超聲波先。
BB身長5.72cm，Size計係12w2d，度頸皮厚1.26mm，屬於低風險，不過姑娘話等埋驗血報告出埋先可以作準。BB已經成形喇，仲見到鼻骨。姑娘好強調有鼻骨，因為鼻骨都係唐氏BB嘅一個參考指標，如果係唐氏BB鼻骨可能扁d。

跟住出房等叫名入去抽埋血，就走得。今日好快呀，產檢過程只係用左個零鐘左右。
姑娘話如果驗血報告冇問題就唔會收到電話，如果驗到有問題就會兩星期內收到通知。

下次在QE產檢就係兩個月後lu，20週照結構。

Kai太的懷孕日記 @ 卓越產檢+Nifty Pro (11w0d)

等左好耐，終於等到今日喇！
繼上次見BB之後已經差不多成個月冇見BB，好掛住佢
同埋上次只係見到心跳閃閃，聽唔到聲，而家咁細粒又feel唔到佢，感覺總係好唔實在。

Nifty Pro我係去媽媽group朋友極度推薦的卓越醫務中心做。
卓越係一間專做婦產科嘅醫務中心，尖沙咀和石門都有分店。有5位婦產科醫生坐陣，其中一位係好出名嘅孫錫鴻醫生。

呂桂英醫生做Nifty Pro好抵，HKD4400包埋照超聲波，仲平過家計會。
而且個個都讚呂醫生好Nice，溫柔又細心，所以我就book左搵呂醫生做Nifty Pro^^

星期六尖沙咀center，超級多人，裡面好多孕婦，登記完就等嗌名，首先係度高磅重量血壓，然後就等嗌名入房。等等下又一個鐘，終於到我喇！入到房首先上床照超聲波先，好清楚見到BB同胎囊，好得意呀😍醫生話BB好活躍，見到手腳郁郁游緊水，仲伸隻手仔出嚟同我Say Hi😂  聽到BB心跳係145，屬於正常。醫生度過BB size都話預產期係吻合2月8日，即係而家係11週，BB好健康，呂醫生仲影左兩張3D圖俾我睇。之前聽媽媽朋友講卓越d儀器好清楚，你會愛上卓越嘅儀器，真係名不虛傳，真係超級清楚😍見到BB咁活躍就好開心，唔怪得媽媽咁唔舒服啦

見完醫生，就出去等俾錢，付款方法有：現金、EPS、支付寶、微訊支付
跟住姑娘俾左張紙我落樓下12樓化驗所度抽血，抽完血就走得～



之前聽人講，話胎囊圓碌碌，頭身比例係1:1，就係女；胎囊腰果形，頭身比例係1:2，就係仔
今胎圓頭圓身，似係女呀😍😍😍
我記得上胎阿仔個超聲波係腰果形同個身長d，如果係真就好喇😍
Nifty Pro約8-12個工作天就知結果。


卓越醫務中心
http://www.zenithmc.com.hk/

地 址: 九龍尖沙嘴廣東道5號 海港城海洋中心13樓1326-27室
電 話: 2110 4760 / 2110 4761
傳 真: 2110 4765
電 郵: info@zenithmc.com.hk
診症時間: (敬請預約) 星期一至六
逢星期日及工作假期休息

地 址: 新界沙田石門安群街3號京瑞廣場1期19樓C室(港鐵石門站C出口)
電 話: 2155 2871 / 2155 2872
傳 真: 2155 2874
電 郵: info@zenithmc.com.hk
診症時間: (敬請預約) 星期一至六
逢星期日及工作假期休息

Kai太的懷孕日記 @ 第一次QE產檢 (9w0d)

第一次嘅QE產檢，安排在第10週。
時間是早上8:30...好早，對於懷孕初期嘅孕婦嚟講，真係好辛苦😅
今次為左快少少，在佐敦地鐵站B出口搭小巴去QE，總站落車，但行過去婦產科都搵左一陣，結果遲左少少8:45先到排隊登記。

姑娘首先同我度高磅重，然後就派左一堆書仔、紙同問卷俾我，跟住叫我入左去一間房仔度等，裡面有其他孕婦一齊喺度等，大概等左10分鐘左右，助產士姑娘就同大家講解一下關於QE婦產科的產檢流程同安排，例如幾多週會做咩呀、會唔會安排結構呀、如果產檢當日唔舒服要改期要打咩電話呀咁。如果2年內生過，或者曾經在QE聽過的可以唔洗聽。

聽完講解，就出返去等嗌名檢查。
「等～～～寂寞到夜深」係每次去產檢最想唱嘅歌，因為每次產檢，2個鐘係基本，d冷氣又凍，不知不覺等左成個鐘。都唔記得等左幾耐，終於嗌我個名喇～～入到間房仔，係助產士姑娘見我，第一次見面唔洗檢查，血壓都唔洗量，主要係問下第幾胎，上次邊度生，順產定開刀等問題。姑娘睇左上次家計會醫生幫我寫嘅信，因為醫生度size BB細左一週，再問埋我經期週期一向係28-35日不等，所以幫我改左個預產期至2月8日，噢！如果遲左一星期，咁就有機會係老鼠唔係豬豬🙈 跟住姑娘就一次過出左4個期俾我，分別係：
1) 早期唐氏評估 (11w)
2) 結構 (20w)
3) 見醫生 (22w)
4) 飲糖水 (26w)

好開心呀，排到結構期😍可以慳返d錢
上胎廣華講到明冇結構，要去自己俾錢出去照，因為政府資源有限，今次姑娘在講座都有講未必排到，如果full左就要自己出去照，所以排到真係超開心呀！
其實呢個都係我揀QE嘅原因，不過唔好意思同姑娘講...^^"
姑娘知我上胎廣華生，都問我做乜唔去返廣華，通常好多人第一胎去開果間生就會繼續喺同一間醫院生。其實廣華都好好嘅，不過想試下QE啫😝

Kai太的懷孕日記 @ 第一次照超聲波~ 家計會「早期懷孕評估」 (9w0d)

等到頸到長，今日終於見BB喇😍
上次驗孕時book左家計會嘅「早期懷孕評估」，原來好多人都唔知家計會有呢個服務，係俾早期懷孕嘅婦女做個初步檢查，評估下懷孕同ＢＢ狀況。

由知道有左之後一直好緊張，一日未見到BB，一日都唔知佢生長成點，好驚著床位置唔好、又擔心無心跳、胎水夠唔夠呢？會諗好多問題
直到今日見醫生照超聲波，終於安心d☺

BB有心跳呀，見到有白色點閃閃下，隱約見到佢d手仔腳仔，醫生話著床位置理想，除左醫生話暫時度個size細左一週之外，一切大致正常，同埋照到有兩粒子宮肌瘤，好細只係1cm左右，唔會影響懷孕，不過生完之後最好跟進下。

照陰超有d唔舒服，不過咁早期，陰超比肚皮超聲波清晰d。醫生都好細心幫我睇左好耐，影左6張相，佢仲寫左封轉介信叫我覆診時交俾QE。下星期就第一次去QE產檢了，心情好期待。

Kai太的懷孕日記 @ 【唐氏綜合症篩查】Nifty vs T21

政府資料顯示，新生兒中，大約700人之中有一人患唐氏綜合症。香港唐氏綜合協會估計，現時香港有約3000多名唐氏綜合症患者。

當孕婦懷孕10-12週左右，就要做【唐氏綜合症篩查】，我地俗稱「度頸皮」，係預測BB患上唐氏綜合症嘅機會率，不過政府的唐氏綜合症度頸皮和驗血篩查並非100%準確，只有90%！除咗公立醫院提供嘅唐氏綜合症篩查之外，坊間仲有另一啲非入侵性檢查可以選擇，最常見就係T21同NIFTY，但呢啲檢查政府係無提供嘅，要自費的！

有關 Nifty 與 T21 嘅分別，上一胎我係無做的，所以只係搵過下資料大概知道係咩嚟，唔係好詳細研究。

懷孕期間，媽媽同BB的橋樑就係胎盤同臍帶，媽媽同寶寶的血並無直接接觸，但BB成長過程中，會有一小部分的遺傳基因DNA經胎盤同臍帶入到媽媽血流。只要抽取媽媽的血，再比對上面提及的DNA「找不同」，就可以快速得到胎兒的DNA，從而去化驗BB有無DNA染色體異常，明白原理之後就會知道呢個檢查準確度好高，亦可以由此搵到除唐氏綜合症以外的常見DNA問題，例如愛德華綜合症(T18)、性染色體問題等等。

NIFTY
華大健康, 中國無創產前基因 。胎兒染色體數目異常是一種常見的出生缺陷。臨床上常見的染色體非整倍體疾病包括21-三體綜合。篩檢適合懷孕至少 10 週的婦女。

敏兒安T21是一種用於篩查胎兒染色體非整倍性, 如唐氏綜合症、18-三體綜合症及13-三體綜合症,的非侵入性產前DNA檢測方法。該診斷技術由香港中文大學研發。

T21& nifty 除咗check 唐氏綜合症(T21)，仲可以check埋愛德華氏綜合症(T18)、巴陶氏綜合症(T13) &性染色體異數。

婦產科專科醫生藍寶梅表示，孕婦亦可選擇接受無創性胎兒DNA唐氏篩查，包括T21或NIFTY，準確度達99%；假陽性少於1%。她解釋，「無創基因產前診斷測試」（T21）屬非入侵性檢查，透過驗血漿內胎兒的細胞、染色體，妊娠10周後就可以進行，且沒有流產風險。不過，她指由於公院未有提供相關服務，故孕婦如到私院做，T21費用達7000至8000元；Nifty則為5000至6000元。另外，準確度亦只是99%，不是100%。

Kai太的懷孕日記 @ 止孕吐方法 (7w6d)

睇返第一胎嘅懷孕日記，原來上一胎都有試過反胃作嘔，可能當時只係乾嘔，所以唔係好為意。呢個星期真係好辛苦，最慘係好肚餓，又好想嘔😭，網上不停尋找「止孕吐方法」，希望可以舒緩一下初期懷孕帶來嘅不適。有d方法試過都有幫助，等我總結一下，希望幫到想嘔的同路人。


※避免空腹、少量多餐
低血糖容易引發噁心，因此剛起床空腹時可補充一些好消化的餅乾或點心，以減輕早晨產生噁心情形。尤其孕婦在空腹時，容易引起胃酸逆流、造成噁心不適，因此，要儘量避免空腹或是兩餐時間相隔過久，建議採用一天6餐、少量多餐的方式來減輕孕吐。我之前就係因為隔太耐冇食野，時間一耐就出現噁心感覺，一想嘔就更加唔想食野，唔食野就更唔舒服，造成惡性循環。自從開始左少食多餐之後，孕吐的情況都舒緩左。

※止嘔法寶：梳打餅
婦產科醫生教路，孕吐嚴重的準媽媽最好吃「Dry Food」，即是吐司、梳打餅等較乾身的食物。不要問，只要信，當食乜都想嘔嘅時候，就試下拎一包梳打餅出嚟食，好神奇，真係能減輕作嘔反胃的情況。因為梳打餅有中和胃酸作用，所以餐與餐之間、或者每每想作嘔就吃半片，反胃的感覺就已經明顯得到紓緩。是「止嘔恩物」，作為孕婦，隨身攜帶梳打餅就最合適。

※止嘔法寶：選擇易消化的食物，例如：食粥
懷孕期間，孕媽咪腸胃蠕動的速度變慢，所以，建議選擇好消化的食物，例如低脂但高碳水化合物的食物，像土司、麵包、優酪乳、濃湯。粥是流質食物較易入口，容易消化和吸收，又可以補充水份。頭一星期作胃左幾日，完全冇胃口食任何野，但唔食又唔得，所以去左買粥食。呢個方法適用於我身上，呢幾日冇胃口都係食粥，暫時都OK。

※止嘔法寶：維生素B6
多補充蛋白質食物，像溫牛奶、豆漿等含蛋白質食物，可減緩孕吐，同時提供孕期所需營養。有研究指，孕吐可能與維生素B6攝取不足有關，若能每天攝取1.9毫克，有助減輕作嘔感覺。市面不少孕婦補充劑都含有維生素B6，除了每日服用，亦要多吃奶類、雞蛋、魚類、肉類、蔬菜類、全穀類、堅果類及香蕉，就能夠吸收進足量的維生素B6。上兩星期和家人去了3天2夜短Trip，唔記得帶孕婦維他命同葉酸，所以食少左兩日，唔知關唔關事......好似返來之後就開始唔舒服。我食開的惠氏Materna孕婦維他命一粒已含1.4mg維他命B6，這星期每日準時補充返，好似真係冇咁反胃。

※避開刺激食物
在飲食上，應避免油炸、油膩或過鹹等食物，像是薯條、炸雞等高脂肪、難消化的食物，不僅容易對孕婦的身體造成負擔，味道也容易讓孕媽咪感到不舒服，要特別注意。不過其實講就易，要跟足都幾難。當孕吐十分嚴重嘅時候...已經唔輪到我地揀食乜，而係究竟「想食d乜」，頭3個月BB都唔係吸收媽媽嘅營養，所以媽媽食d咩影響不是太大，上一胎有段時間我只係想飲「冬陰功」，真係飲左連續一星期，唔係持續都無傷大雅嘅......無計可施之下，「食得落」才是王道。

※酸感的食物
因為孕婦的唾液分泌比較多，會刺激胃酸分泌而引起噁心感，可以補充一些酸性的飲料，像檸檬水、酸梅湯、或是不含咖啡因的茶類，可以改善反胃的情況，但水分容易造成胃部膨脹，造成飽脹感，易引起噁心嘔吐，還是要儘量避免湯湯水水為佳。我試過最佳方法係食橙同奇異果，除左有豐富維他命C，仲有維生素B6同埋鈣，非常啱孕婦食！另外食乳酪都唔錯。

※止孕吐手環
佢係一條環狀手帶，把它戴在手腕位置，就可以達到止嘔止暈功效！在中醫角度，手腕有一個重要的穴位稱為內關穴，位置就在我們手腕橫紋對上大約三隻手指位。它可治心、胸、胃部疾病，刺激穴位對止孕吐亦有效用。止暈浪手帶上的小圓球，正好能持續刺激內關穴，達到止吐效果。呢個我冇試過，但網上見到唔少人試過都work，如果真係孕吐好嚴重，不妨一試。

※保持充足睡眠、心情愉快
正所謂...瞓覺能醫百病，睡眠充足都好大幫助！雖然冇研究話瞓覺同孕吐有直接關係，但又真係好少孕婦會瞓瞓下覺突然起身嘔，懷孕初期特別易攰不適，瞓多d同保持心情愉快可以減輕孕吐的不適。


人人的妊娠反應都唔同，坊間通常形容孕婦多數是「晨吐」，我是剛剛相反的，越夜越反胃，越夜越想嘔。孕婦嗅覺特別靈敏，有些朋友懷孕期間一聞到「某種氣味」就立即想嘔，還有突如其來的口味轉變，可能未有之前從來唔食榴槤，覺得好臭，陀緊嘅時候突然間覺得好香，仲好鍾意食，都是因為懷孕期間帶來的荷爾蒙變化造成的影響，生產後一切就回復正常。

Kai太的懷孕日記 @ 踏入第七週...開始孕吐 (7w1d)

前兩星期除了有幾日下腹扯痛外，就冇乜其他反應，食得瞓得。又未照超聲波，唔知BB狀況如何，所以一直都囉囉攣。

直到尋晚...開始有少少反胃，頂住頂住，夜晚仲嘔左出嚟！

上一胎係冇乜點孕吐的，印象中好似嘔過３次，今次反應比上次強少少。

今日返工都係成日口淡淡，反反地胃，個胃頂住頂住咁。
有d食物突然完全唔想食，例如：豆腐、豆漿、芝士，全部都係我平時最鍾意食嘅野，上星期都仲瘋狂食，但而家全部唔想食@@ 有d食物直頭諗起就想嘔

希望妊娠反應快d完啦~~

不過有反應都好開心嘅，因為即係BB正慢慢成長緊！
6月27號就會照超聲波見BB，好期待呀>v<

Kai太的懷孕日記 @ 懷孕初期下腹扯痛

自從知道有左之後，呢個星期下腹都成日扯住扯住痛，間唔中有陰道抽痛，都痛左好幾日。上網睇人講話係正常，因為子宮開始擴大，所以會有下腹輕微抽痛情況。

上一胎又好似唔覺有呢個感覺，定係因為上一胎遲一星期check到，所以我誤以為谷M而不以為意呢？

希望快d冇事啦～～
今胎好似比上一胎易攰，可能始終年紀大左，所以話有仔真係要趁嫩生呀！

暫時book左9 weeks做陰超檢查，同埋10 weeks伊院產檢。

Kai太的懷孕日記 @ QE產科登記 - 我的豬BB (5w0d)

拎左懷孕證明信，下一步就係去醫院婦產科登記喇！

上一胎我係廣華生的，今胎一直十五十六，繼續揀廣華好丫，定係試下QE呢？上胎廣華當時未係高齡產婦，身體健康，被編去助產士小組，小組d姑娘都幾好嘅，不過產檢冇得照結構，同埋廣華係主張純天然生產，在冇「笑氣」，冇止痛針，完全零止痛嘅情況下生。唔生仔唔知身體好，原來我可以捱得住陣痛廿幾粒鐘生B，過程中完全冇嗌。但係生產過程中冇剪陰道關係，傷口撕裂，足足痛左個幾兩個月，諗返起都有d驚！

有朋友在QE生，話好彩的話，可以排到照結構，慳返幾千蚊。同埋QE有個母乳中心，俾想餵母乳嘅媽媽有更好的support！但係QE令我最卻步嘅係位置有點吊腳，廣華個位超方便，樓下又有好多野食，又有經驗熟晒架步。

經過一番考慮之後，最後決定揀QE！
因為人一世，物一世，生仔嘅機會冇乜幾可，廣華已經試過喇，不如試下QE，睇下有咩分別啦。同埋可以在孕期產檢過程，加添新鮮感。我呢個諗法好無聊😂😂😂

同日下午同公司請左半日假，衝去QE登記，其實印象中除左出世之外，無嚟過QE，QE比起廣華大，由睇地圖搵路，去到大樓周圍搵，都花左唔少時間。因為唔識路，我先去左C大樓的詢問處問，佢再俾個婦產科部門地址我。

婦產科在日間醫療中心4樓 (上圖粉紅色大樓)，上到去排隊，出示以下文件登記：
1) 懷孕證明信 或 醫生轉介信
2) BB媽媽嘅身份證
3) BB爸爸嘅身份證副本

等左一陣，問左幾條簡單問題就俾左封信我，係第一次產檢日期。印象中廣華登記第一次俾左兩個期我的：唐氏和產檢，我問姑娘：「係咪有唐氏架？」佢話第一次產檢左見左醫生再派唐氏期的。而QE俾個產檢期係早d嘅，大概在10w左右。

搞掂第一步，暫時鬆一鬆~
又裝返呢個App XD，幫BB起個花名做「芝士b」^^

Kai太的懷孕日記 @ 再去家計會驗孕，真的Bingo了！(5w0d)

連續幾日起身第一件事就係驗孕，今朝都唔例外，我諗住在家日日驗，直到驗到明顯深色為止。

前幾日等約5分鐘左右先見到有第2條線，今朝等約30秒已經開始見到淡淡一條粉紅線，然後慢慢變深。對比返呢幾日嘅試紙，明顯深色好多啦！所以我決定今日再戰家計會！！！

今日比星期二多人，等耐少少，今次我醒喇，拎埋晨尿過去，希望可以成功！等左大概15-20分鐘左右，就入房見姑娘喇。

一入到去，姑娘就笑住問我：「咁快又再嚟，唔怕嘥錢呀？」
我即刻有d拗底，明明佢叫我一星期後再嚟，點知我兩日就嚟。
姑娘：「點解咁心急呀？」
我：「因為我好想快d排期呀」
姑娘：「快都唔快得好多架，就算俾你排到期，個B都仲有好耐先出嚟，你都仲要等好耐」
我：「係嘅...但係我真係好想快d知呀」
姑娘：「你自己決定啦，唔後悔丫嘛？」
我：「照驗啦」心諗：算啦，嘥錢就嘥錢啦！橫掂嚟左都要搏下！

同上次一樣，睇住尿液滴落試紙上，慢慢...變深，但係...咦，點解冇屋企驗咁深嘅？姑娘同我傾計，問下上次經期幾時，今次第幾胎，上次邊度生等，傾左一陣，第2條線都未到第1條線咁深色。

姑娘：「等左好耐，都未夠深喎」
我開始失望 T^T
姑娘：「不過咁，以我地試紙嚟講，你呢個深度都算中架喇～我照開俾你啦，費事你走多轉喇」
我立即變成心心眼：「真係架，好多謝你呀！」

太太太太太開心喇，我終於拎到懷孕證明，姑娘仲問我做唔做「早期懷孕評估」見醫生照陰道超聲波 (俗稱：照閃閃)，家計會做$600，好似平過出面私家，見有期就立即book埋。

除左封懷孕證明信，佢仲有俾埋驗孕紙我留念。下一步，就係去醫院排期！^^

Kai太的懷孕日記 @ 家計會驗孕失敗 (4w5d)

呢頭講完話唔好太早去驗，太淺色會唔批懷孕證明
果頭就走左去隔離家計會驗孕......
「不聽老人言」嘅後果...就係嘥左一百蚊T^T

因為我實在太心急，好想好想可以快d去醫院排期，所以lunch去左公司附近間家計會驗下，入去見姑娘，睇住佢拎個dropper抽少少小便，滴落張試紙度，望住條線......1分鐘...2分鐘...3分鐘......傾下計，量下血壓，到差不多5分鐘，都係仲好淺色。

姑娘話：「咁淺色，我地出唔到懷孕證明俾你架喎！」
我立即好失望：「下......唔好啦」
姑娘：「正常情況應該第二條線起碼去到80%深色甚至一樣深先得」
我：「真係冇其他方法拿？或者再等多陣丫...我屋企都有驗過係兩條線」(然後我show屋企驗嘅相俾佢睇)
姑娘望一望：「你呢個都算淺色呀，同埋你見而家仲係咁淺色，睇落都應該唔會再深落去，所以我地唔可以當係」
我：「嗚......真係冇其他方法拿？驗血呢？會唔會快d？」
姑娘：「你驗血要私家先有，你下星期再嚟過啦」

白白嘥左一百蚊T^T
買個教訓

Kai太的懷孕日記 @ 疑似再懷孕

我記得以前臨生之前，會上網周圍睇人地嘅懷孕同生產日記，但係寫到「生產記」之後就會停左，再睇嘅Post已經突然幾歲，Skip左中間的BB成長過程! 原來係真架......^^"
到發生係自己身上，當生左出嚟果一下，生活上有出現翻天覆地嘅變化，忙到忙左一年都唔知自己忙左d乜，總之就係生活好充實，長期唔夠瞓，將所有心思時間都擺晒喺家庭同工作上。

好喇，阿仔已經2歲半，我地為開始平靜嘅生活再次帶來衝激XD
其實由阿仔1歲幾開始，我地就為第二胎舖路，斷斷續續咁造人都不成功，應該係唔夠勤力，同埋用App捉唔正排卵期，因為我M唔太準，週期可以28日至35日不等。於是我就學人買「紅d」註1*大衛排卵試紙來試，差唔多到排卵日就每日驗尿，紀錄低排卵嘅狀況。同埋用驗孕試紙，直到今個月......疑似成功喇😍

我一直有用App紀錄經期嘅習慣，近幾個月加埋「紅d」試紙雙管齊下，能夠預知準確的排卵日。App話排卵日係13號，但我用「紅d」check到係14或15號。今個月我地喺正排卵日前1日同後1日都有努力，22號都有試過驗但係驗唔到，可能太早啦...直到26號，經期前一日再驗，等左5分鐘左右，就慢慢見到兩條線。跟住我立刻衝入房：「老公，好似真係中左呀😍」

好驚係假，28號再驗多次，睇下係咪深色左。見人話紅d都可以驗孕，如果紅d 係越黎越深粗，超過 80% 的話就有機會係bingo！

計返個預產期，可能有機會生豬寶寶添😍我地一直想生豬BB，努力左成年，上個月都唔中，我地已經疊埋心水製造鼠BB，點知真係如願以償！

已經荒廢左好耐嘅Blog又復活了，唔睇返都唔知我寫過咁多野，點解我可以咁好心機😂而家可能有二寶，一樣好想記低呢個懷孕過程。

本來尋日好想拿拿臨衝去家計會驗孕拎懷孕證明，但係有人試過因為太淺色家計會唔肯出懷孕證明，照charge HK$100驗孕費。而家真係好心急好心急，好想快d拎到證明去醫院排期😊巧開心巧開心巧開心呀~~~今胎心情同第一胎好唔同，因為有晒經驗，同埋心理準備，所以心情比上一次興奮好多。


註1* 有關「紅d」「綠d」
「紅d」係check排卵，「綠d」係驗孕，用「紅d」由 day 9 開始check，每日定時check，唔可以用晨尿，check前2個鐘唔好飲水，如果你cycle正常，check到條線同對照線一樣色即表示未來24至48小時內即將排卵，可以開工