Kai太的懷孕日記 @ 廣華產檢 (37w5d)

已經37週喇，轉入大直路。今日又去廣華度產檢，今次好快啊！約左10:45AM，等到12點左右就有得睇，助產士姑娘好好人，除左幫我檢查肚仔大細同聽心跳外，仲幫我照左超聲波 >v< 明明之前廣華話除左唐氏果次以後都唔再照架喇，突然有得見ｂｂ覺得好開心。

照到頭仔額頭對上已經落左骨盤，我問姑娘幾時會入晒盤架？佢話：「如果成個頭入晒盤骨就已經生得架喇」

我問姑娘我一星期重左３磅幾係咪唔正常，佢話可能係水腫，唔洗太擔心，不過都有提醒我，現階段唔好咁為食，因為而家會好吸收，唔好食咁甜，而家ｂｂ約3KG，摸落都幾好肉地，Size差不多了，以我嘅身形，細細粒會易生d 。

依個禮拜成日個肚都好硬，又成日feel到個肚陰陰痛，好似M痛咁，但係又冇規律架喎。姑娘話咁代表個子宮已經成熟，隨時準備好生產，佢硬左其實係供血俾ｂｂ，正常的。最後，姑娘仲有教我肚仔按摩法催產，佢話由而家開始每晚10:30pm左右就上床準備瞓，臨瞓前幫肚仔同大脾分別做15min催產按摩，咁樣到凌晨兩點左右，身體就會分泌催產素，係好嘅荷爾蒙，可以幫助生產。下次產檢日期係12月9日，到時已經39週，姑娘話通常d媽媽做完催產按摩唔洗幾日，就會產房見。

Kai太的懷孕日記 @ 產前紀錄 (37w4d)

37w4d
重62.3kg
肚圍42.5吋

Omg!!!!!我一星期重左3磅幾，大獲喇

Kai太的懷孕日記 @ ＢＢ櫃到左喇！

BB就嚟出世，我地臨急抱佛腳，好遲先去睇櫃。原本有諗過買膠櫃嚟裝，但係有幾個問題：一係唔美觀又易入塵，又食唔到力，如果擺得多衫重就會墜左落嚟，實惠有d靚嘅密封式唔入塵，可以自行組裝，又好貴，買幾個櫃桶已經成千蚊。去過IKEA睇，d木櫃好多款又幾平，不過d 料好乍，全部都係蔗渣板，正因為佢輕，之前在外國發生過幾十宗因上重下輕而出現dup死小童個案，所以全部櫃都要上牆，種種原因都令我們卻步......
於是我地就決定搵人訂造，之前朋友介紹過間傢俬舖，我地張床都係搵佢地訂造，價錢公道，料靚，係實木，搵返佢地造都好，問題係驚趕唔切BB出世前送貨......
我地11月12日去訂，本來話要12月頭先有，但係前日收到電話佢地趕起可以早d送過嚟，好開心呀>v<

依個櫃可以跟我地想要嘅Size，又可以加埋腳線位在櫃後，令到拖板條線唔洗咁核突，齊頭都係$2000，貴係貴d，但係物有所值。

相比起IKEA果d......

仲有實惠果d......

依個櫃會耐用好多～～

不過新傢俬點都有d味，我地要開大隻窗吹幾日等散左先可以放BB衫。

Kai太的懷孕日記 @ 37週足月喇！ (37w)

今日37週足月喇！
睇住兩支妊娠紋霜的進度，意味著距離出世的日子不遠了。

Kai太的懷孕日記 @ 廣華產檢 (36w5d)

話咁快又到產檢嘅日子，今日預約時間係10:20am，天陰陰，雨濛濛，天文台仲話今晚氣溫會跌到落15度，搞到要帶定件褸出門口，好輪盡。

已經36週5，今日除左見助產士仲要見醫生，先去量血壓及驗小便，然後如常地等等等，今日好多人，助產士小組姑娘話唔夠人手，所以平時由小組做的量血壓及驗小便轉左出去大堂做。等到大概12點左右，助產士姑娘終於見我，仲叫左幾位媽媽，一次過講。問我地執好走佬袋未，最好分開兩個袋，一個裝定床墊、產婦衛生巾、尿片兩片、杯等，以防突發穿水入院可以即刻走，其他野可以遲ｄ請家人拎過嚟。跟住就係留意胎動情況，如果ＢＢ郁少左，或者覺得佢突然郁得好勁，好似掙扎緊咁，唔安心都可以入院Check下。如發生規律陣痛，住得唔遠可以慢慢等到痛10分鐘先一次才入院都得，第一產程通常痛好耐。坐我隔離果位媽媽，原來已經40週了！姑娘話今日醫生會同佢講關於催生嘅野。Oh，希望我唔洗等到40週催生啦，ＢＢ在肚裡住得越耐，就越大隻，生嘅時候就越辛苦架喇^^"

見完小組姑娘，就坐出大堂等見醫生，大概等左十幾分鐘就入房lu。第一件事就係瞓上床俾醫生姑娘聽心跳、摸肚、度肚皮Size，過程極迅速，check過一切正常就去返位度坐。磅重61.9kg，醫生叫我keep返均衡飲食，唔好食咁多甜野肥膩野，仲有話我知Ｂ型鏈球抹片測試過關，然後就叫我走得喇。我都冇機會問問題添，只係問左一條問題，佢地可能太忙，想我快ｄ走。下次產檢日期係11月30日，一星期後，嚟緊會每一星期產檢一次直到ＢＢ出世。

Kai太的懷孕日記 @ 產前紀錄 (36w3d)

36w3d
重60.7kg
肚圍41.5吋

Kai太的懷孕日記 @ 坐月錦囊

兩個月前參加雪印的產前講座，節錄左Ｄ筆記，ＢＢ就嚟出世喇，順便溫故知新先！

坐月宜忌：坐月可以洗頭嗎？
．坐月是可以洗頭
．洗頭後立即用風筒吹乾
．確保浴室衛生設備完善
．洗頭可以用薑水或自來水

坐月宜忌：沖涼要用薑水？
．沖涼宜用煮滾的水或薑水洗澡。薑水有驅風寒作用
．可用薑皮薑肉放入水全煮滾待用
．如不用薑皮煲水洗澡，可用薑皂或薑製成的沐浴露
．用薑洗澡要注意產婦有否皮膚敏感、濕疹及血壓高的情況

坐月宜忌：甚麼是代茶？
．代茶又稱炒米茶
．炒米茶有暖胃、解口乾作用
．炒米茶材料：白米糙米、紅棗／南棗、陳皮、圓肉
．炒米茶製法：把白米洗淨瀝乾，放入白鑊炒至金黃，把炒米放入滾水內煲，加入陳皮紅棗煲焗約一小時

坐月宜忌：進補時間及方法
．順產進補時間：１２朝後、惡露排清
．開刀進補時間：２１日後、惡露排清
．疑問：食補問可以餵人奶嗎？
．餵人奶是可以食補品，但要時間配合及以清潤為主，不寒不燥

坐月飲食建議
．蔬菜類：菜心、芥蘭、西蘭花、菠菜、節瓜
．肉類：蒸豬肉餅、金針雲耳蒸雞、南瓜炒肉碎
．牛肉可否進食視乎個人喜好，牛肉有補血作用，鐵質高。但傳統認為牛肉、蛋對傷口有副作用，容易引致發炎。
．上奶湯水可煲清潤湯水：魚湯、瘦肉湯、清雞湯、花生雞腳鱆魚湯
．回奶食物：例如豬乾、乳鴿、淡豆豉、麥芽

坐月建議湯水
．木瓜魚湯、蕃茄薯仔紅衫魚湯
．滋潤湯水：百合無花果及豬展湯、淮山南北杏嚮螺瑤柱豬展湯、冬蟲草鮑魚淮山瑤柱雞肉湯、節瓜粟子嚮螺排骨湯、花膠鮑魚瑤柱豬展湯

坐月飲食建議
．薑醋為何要食？
．薑可以驅寒驅風，醋可補血，豬腳上奶
．豬腳豬手鈣質高，雞蛋含鈣及蛋白質
．中國傳統習俗十二朝派薑醋

薑醋製法
．食用前六至八星期將薑洗淨刮皮風乾，拍鬆及切厚片
．薑瀝乾水份放入白鑊炒至乾身
．將薑放入瓦煲加入甜醋煲滾轉用文火，煲半小時熄火
．每隔三至五天翻煲待用
．食前兩天把豬手和豬腳毛洗淨斬件、出水及啤水
．豬手腳瀝乾放入白鑊炒至乾身放入薑醋煲內煲約一小時後加入雞蛋及薑一同煲約一小時，熄火便成

雞酒
．雞酒行氣活血、滋補養身
．材料：雞，木耳，雲耳，金針，紅棗或南棗，糯米酒或米酒

雞酒製法
．雞洗淨去內臟切件，少量糖鹽醃約１０分鐘
．金針浸軟後過水打結
．雲耳木耳浸發出水
．紅棗或南棗加水煮３０分鐘待用
．熱鑊炒薑放油少許，煎封雞件後加入金針、雲耳、木耳、再贊酒
．將棗水加入，燒滾後，煮熟雞酒加入適量酒、鹽，調味後才進食

薑炒飯
．驅風驅寒氣，產後７至１０日後才可進食
．薑切米粒，飯煮熟後降溫待用
．薑洗淨切米粒，將薑米粒炒乾後下少許油，加入飯與薑粒一起炒，可加入雞蛋或蛋白，後下少許鹽才進食

煮食產婦須知
．要注意營養
．可進食豆類，瓜菜類，吸收植物蛋白質
．如可進食蛋類可增加蛋白質及鈣質

坐月餐單：休養一期（平補排惡露）
適合產後首７天
早餐
．肉丸粥
．小米肉碎粥
．五更飯（配以瘦肉或雞肉）
餸類
．梅菜蒸魚
．冬菇蒸肉片
．西蘭花炒肉片
．節瓜炆排骨
湯類
．淮山圓肉豬展湯
．蓮藕百合排骨湯
．木瓜魚湯
．清燉雞汁
甜品
．薑汁燉奶
．合桃芝麻糊
．蓮子百合糖水

坐月餐單：休養二期（平補排惡露）
適合產後首８天至１４天
早餐
．小米肉碎粥
．花膠紅米肉碎粥
．五更飯（配以淮水粒或雞肉）
餸類
．銀魚仔蒸肉餅
．冬菇瑤柱蒸滑雞
．肉碎蒸釀節瓜甫
湯類
．紅腰豆合桃腰果瘦肉湯
．淮山圓肉螺頭豬展湯
．鱆魚茨實蓮子豬展湯
甜品
．雪耳燉木瓜
．杏仁露
．合桃露

坐月餐單：進補一期（不宜太燥補）
適合產後首１５天至２１天
早餐
．南瓜肉碎通粉
．肉碎紅米粥
．五更飯（配以瑤柱杞子及雞肉）
餸類
．粟米燴魚塊
．三色椒炒肉絲
．四季豆鮮百合炒雞球
湯類
．鮑魚海參煲雞湯
．紅棗圓肉冬蟲草煲豬展湯
．猴頭菇花膠玉竹煲豬展湯
甜品
．冰糖燉木瓜
．花膠燉鮮奶
．合桃腰果糊

坐月餐單：進補二期（養血、養陰，大補元氣）
適合產後首２２天至３０天
早餐
．肉片菜心通粉
．陳皮肉丸雞粥
．五更飯（配以南瓜、滑雞、牛肉）
餸類
．鮮茄洋蔥燴豬扒
．陳皮薑絲蒸石斑
．花膠海參炆冬菇
．蓮藕花生炆豬手
湯類
．花膠螺頭烏雞湯
．南棗栗子燉水魚湯
．鮑魚螺頭花膠煲雞
．冬蟲草燉竹絲雞
甜品
．沙參玉竹雞蛋糖水
．南北杏冰糖燉木瓜雪耳
．芝麻糊

產後修身
．產後運動有助血液循環
．餵哺母乳助子宮收縮，令產婦身體回復窈窕身材
．避免進食高糖高脂肪高膽固醇食物，以清淡為主雞魚瘦肉新鮮蔬菜瓜果類，每餐份量適中

認識嬰兒黃疸
．初生嬰兒黃疸非常普通，大部份是生理性
．出生後３－５日呈現
．嚴重黃疸可導致失聰及阻礙腦部發育
．餵哺母乳的嬰兒黃疸延長，但不會加深病症，可以延續餵哺母乳
．徵狀：皮膚、眼白呈黃色，小便顏色茶色，嚴重者食慾下降
．治療：照燈療法，水份充足，餵母乳的母親避免進食中藥
．嚴重黃疸可能要換血

Kai太的懷孕日記 @ 少少血絲 (36w)

晚上沖完涼之後發現下陰有少少血絲，好少好少，但明顯鮮紅色，唔知係咪關做完B鏈檢查事呢？弘弘你唔好咁快出嚟呀，媽媽仲有好多野未準備好

Kai太的懷孕日記 @ 護墊見血 (35w5d)

今日臨放工去洗手間時發現護墊有少少淡粉紅色淺啡色的分泌，一撻仔咁，唔知係咪尋日做檢查導致的，希望係啦

Kai太的懷孕日記 @ 廣華驗B鏈 + 美素佳兒禮物 (35w4d)

已經好耐好耐冇寫懷孕日記喇，不知不覺懷孕35週幾，時間過得好快呀！今日下晝去左廣華度驗B鏈 (乙型鏈球菌)，明明記得好似係好快，點知我等左成粒鐘都未叫我，覺得唔對路......走去問登記護士，驗B鏈覆診紙係咪都係放入助產士小組個兜度，佢話係，跟住我又繼續等，飯都未食，等到勁肚餓......

好彩姑娘發現得早，原來驗B鏈唔係排助產士小組，而係直接去登記處入紙排見醫生T^T

白白等左粒幾鐘......

等左一陣，已經入去見醫生，有位女醫生同女護士幫我採集組織化驗，冇咁尷尬。醫生叫我除褲瞓上床，然後佢就將儀器放入陰道同肛門中採集樣本，過程中有少少唔舒服，不過好快就搞掂，拎埋到診紙就走得。

乙型鏈球菌常見於腸道、女性陰道，一般不會致病，惟孕婦一旦帶菌，可增加死胎或新生嬰兒中招風險。約10%至30%懷孕婦女的陰道或直腸拭子樣本中可找到乙型鏈球菌。雖然媽媽本身沒有症狀，但生產過程中，新生兒經過產道時，會遭到感染，盛行率約千分之一。乙型鏈球菌也會引起早產、死產或是流產的問題。孕婦在懷孕35至37周時，應接受陰道及肛門B型鏈球菌的例行篩檢，發現帶菌的孕婦，在分娩前使用有效的抗生素治療，可減少約7成的早發性感染。

下星期又去產檢，到時應該公佈結果喇，希望唔好中啦。

返屋企，去郵局取件，原來係美素佳兒寄來的禮物，係一個好靚嘅牛牛BB車掛袋同埋一本育兒書。美素佳兒真係好窩心呀，成日都送咁多野，送d禮物仲好實用添^^

最surprise係佢有個Checklist，雖然好簡單，但印刷好精美又實用，特別係對我呢d仲未執齊走佬袋嘅人，真係好貼心

仲有本書仔，真係要大力推薦！之前已經送左一本「開心懷孕篇」育兒書，裡面講懷孕時會遇到的階段，由發現懷孕1個月至10個月，胎兒成長、媽媽營養與飲食、準備生產、產後護理等知識，內容非常實用呀！今次呢本係講生左之後，BB成長嘅各種階段，由零歲講到歲半，咩階段食咩、咩階段寶寶成長會有咩變化等，連疫苗注射一覽表，勁實用呀！(心心眼)

 我同老公都覺得好正，多謝美素佳兒。

個牛牛袋都好靚，可以掛BB床，又可以掛BB車，size唔太大，啱啱好可以放d BB濕紙巾呀、紗巾仔等，出街正晒。

Kai太的懷孕日記 @ 私家產檢 (35w1d)

35w1d

重60.4kg

肚圍41.5吋

去尤醫生度最後一次產檢

今日可能係弘弘出世前最後一次在超聲波見佢lu～Book左尤醫生12點鐘，等到差不多一點半先有得睇。BB已經5磅喇，頭圍、肚圍，都乎合週數，係手仔同腳仔只係僅僅合格，不過都屬正常，係中碼B。預計出世時應該有3kg左右。而家BB背脊骨已經去了左邊，醫生話依個係最靚嘅位。BB頭仔有少少已經落左骨盤，照超聲波時差d照唔晒，塊面就塞左入去，所以望唔到佢個樣lu，上次廣華個姑娘好勁，一摸就知BB轉左位。咁樣咪好快生得？仲有兩個星期就足月，好驚呀......弘弘你唔好咁早出嚟住，媽媽仲有好多野未做，等我準備好d你先出嚟呀。醫生提我有咩未準備好要立即1st priority做左先，唔好拖，希望我以完全放鬆嘅心情去生。同埋冇咩特別，唔洗再睇佢喇，因為下個月都生了。轉入直路，加油呀！

Kai太的懷孕日記 @ 廣華產檢 (33w5d)

今日又係一個月一次嘅產檢，本身約左10:30，人流同平時差唔多，等待嘅過程有個姑娘問我願唔願意參加一個「實驗計劃」，佢會搵240對夫婦，抽籤分成兩組，一組係按摩組，一組係非按摩組，抽中按摩組的夫婦，醫院會安排上「產前按摩班」，然後在產前利用按摩的方式減痛；另一組就完全唔俾按摩，其他減痛方法都用得。因為我地之前報唔到按摩班，報到果班已經係預產期，所以好想試下運氣。本人係非常支持非藥物式減痛方法的，因為對BB的副作用減到最低，不過...希望還希望，運氣差的我抽中左「control group」，即係冇按摩組XD
有少少失望，不過唔緊要啦，仲有其他方法家嘛。

等到約12點幾可以見姑娘，佢循例幫我摸肚仔，聽BB心跳，Size正常，佢仲話BB背脊在左邊，咦，明明在右邊架，之前照幾次超聲波都係右邊。頭仔在下面，佢仲叫我用手摸：「你摸下，頭仔係呢度呀」但係我摸完都唔覺得果個係頭XD 姑娘好勁。今日產檢仲有份問卷要填，主要係考我對餵母乳嘅知識。因為之前有聽過醫院產前講座，所以全部都答啱晒。

對返上次個驗血報告，血色素已經回升返至11.4，姑娘話依個數字好靚，可以唔洗再食鐵丸～不過都要繼續食返多d紅肉同埋深綠色蔬菜。