Kai太的懷孕日記 @ 倒數 (38w3d)

距離產期越近，心情開始緊張。

好快就做人媽媽，突然跳進另一個世界，好多野要學，泵奶機啦、奶樽、尿片、揹帶、洗衣液、沖涼液、柔順劑、清潔棉、濕紙巾⋯⋯etc，好多學問。起初好擔心自己handle唔到，乜都唔識，好在身邊有好多媽媽朋友無私分享，教我好多育兒知識，同埋這是每個媽媽必經的階段，咁多人都得，我都應該得嘅。

自問是一個勁怕痛的人，每個月經歷一次的M痛有時真的生不如死，想搵把刀切個肚出嚟，由細到大入醫院的次數一隻手數得晒，都無做過手術。所以對於生產，心裡是極度恐懼的。經歷8個月的產檢、產前講座、睇書、網上爬文後，同埋醫護人員給我的信心，我的心情由超緊張，慢慢轉化為隨遇而安。驚喜嘅係：唔懷孕唔知身體好。以為自己體弱多病，飲食習慣又唔健康，懷孕一定好辛苦，點知醫院檢查後，我被評估為「低危健康孕婦」可以加入助產士小組，懷孕過程可能會出現的狂嘔、腰痛、腳腫、及最擔心的妊娠糖尿病及B鏈，都無出現在我身上，實在非常感恩。只係孕期試過幾次感冒，同埋懷孕後期開始感到身體笨重帶來的不適，偶爾的宮縮、肚痛、抽筋、腳痺，所以要提前放產假，由原本前1後9改為前2後8，但已經好幸福了。亦因為懷孕，我注重了營養攝取同均衡飲食的重要，身體比懷孕前更健康。

希望BB繼續錫媽咪，順利出世。生產只是第一步，嚟緊嘅挑戰會更多，我地一齊努力啦！