做媽媽之前咩都唔識，之前提過原來好多學問，泵奶機啦、奶樽、尿片、揹帶、洗衣液、沖涼液、柔順劑、清潔棉、濕紙巾⋯⋯etc，因為性格關係，每樣產品都有N咁多個牌子，我好鍾意鑽研究竟邊隻牌子最好，性價比最高。而家所有野差不多準備好，等我總結一下最後我揀左嘅checklist先～
１）泵奶機
記得初初研究泵奶機時，我覺得勁複雜，好似電腦砌機d spec咁，完全無從入手。首先係牌子先，咁多個都唔知邊個好，又唔知有咩分別，有位媽媽朋友俾左意見我：
「Medela貴但好用，瑞士出。Spectra 9+韓國出，好多媽媽買，因為價錢比Medela便宜。優合機大陸出，價錢最平，但d媽媽怕大陸配件有質量問題，所以會配其他牌子配件使用。例如優合機配Spectra 9+配件。」
對於價錢我都冇咩Concept，可以差幾遠呢？
Medela Free Style (雙泵) - 官網或BB展見過賣6千幾，水貨2千幾
Spectra 9+ (雙泵) - 約千幾蚊
優合機 (雙泵) - 四百幾至五百幾蚊
仲有好多其他牌子，不過以上三個品牌最多人用，所以我冇研究其他。Medela Free Style，我都有好多朋友用覺得好，但係媽媽Group d 媽媽話嘈，同埋配件較貴。朋友用開Spectra 9+，但轉用優合機之後覺得勁好用，輕身，夠力及夠靜，所以俾左部Spectra 9+主機我，另外買配件就用得。最近仲有一隻新出牌子叫Cimilre F1/freemie，可以配免提配件，令媽媽可以邊做野邊泵奶，都係千幾蚊。
研究過後，其實唔複雜嘅，「泵奶陣」主要係由以下配件組成：
泵奶機、喇叭、飛碟、防倒流鴨咀、轉接環(Optional)、膠喉、奶樽/奶袋
以上呢set裝備已經足夠基本泵奶用。好多媽媽話Spectra 9+原裝的奶樽好易漏，所以會配其他奶樽。我揀左Philips AVENT Natural闊口奶樽，因為佢消委會個Report評分幾高，同埋呢款奶樽及奶咀係跟媽媽乳房形狀設計，朋友都讚好用。
另外我仲訂左個接駁環，可直泵入奶袋。Spectra 9+本身冇出，但可配NUK的奶袋接駁環。奶袋我買左呢隻韓國牌子，團購價$103一盒。
 |
| 網購價：$240/對 |
Spectra 9+原裝個鴨咀好易爛，有媽媽會配Medela鴨咀用，硬淨好多。好多媽媽發現泵唔清，都係因為個鴨咀有問題。
 |
| 護協價: $89/對 |
備註：
- 奶泵有分叉電式或插電式，買叉電式較好，可以帶返工用邊度都泵到
- 無論咩牌子，最好買雙泵，因為慳好多時間，同埋泵一邊，另一邊會漏奶的，雙泵保證不浪費
- 喇叭有分大細，要睇下nipple size揀，人人唔同，用錯size會整痛自己
- 奶瓶接口有分窄口及闊口，可以接駁唔同奶樽，唔好搞錯！有d媽媽睇中心儀奶樽，如果奶泵唔同牌子，就要買個轉接環來接駁
-
有關奶具消毒：奶樽不可高溫消毒，先用奶瓶清潔用品，再用熱水消毒(5分鐘內)，放左UV紫外光消毒器。
喇叭用熱水消毒5分鐘。
飛碟(防倒流器)泵奶過程不會接觸奶水，不用清洗，如接觸奶水，請用熱水清毒白色膠(不可高溫)，清潔後請確保完全乾透才使用。
鴨咀不可高溫消毒，輕力清潔，用熱水清洗。
長膠管泵奶過程不會接觸奶水，不用清洗，如接觸奶水，建議更換新的膠管。
２）奶樽
上文都提過，奶樽我揀左Philips AVENT，暫時有六個9安士(260ml)的，買之前都諗左好耐買唔買儲奶瓶，但係要倒來倒去又要洗，最後參考左朋友做法，直接泵入奶樽。
奶樽有分Size，四安、九安、十一安，初生嬰兒飲奶量唔多，四安可能夠，但因B而異，朋友個仔第一個月已經每餐飲五安奶，所以買奶樽買大好過買細。
除左要注意瘦樽定肥樽，仲有要留意BB飲得快定慢。ChuChu奶樽可減少入風，但較難吸啜；Pigeons奶樽都多人用；Tommee Tippee (TT)有排氣管減入風，仲有出黑色粉紅色，好多型媽揀。
奶樽有分玻璃及膠樽，如果餵母乳唔好買玻璃，因為玻璃會痴住母乳抗體，同埋玻璃樽都重，長期拎住隻手會攰同埋易打爛。膠奶樽有分pp / ppsu / pes / pesu，咩嚟架？原來係指奶樽壽命，pp用到三個月至半年，Pesu用左半年至九個月。
網上有好多奶樽比較文，我唔多講喇，大家可以自己爬下。
Chu Chu、Dr Browns、B free plus 等奶樽比較及測試！
http://www.testingmama.com/milkbottle/
３）嬰兒紙尿片
有關初生嬰兒紙尿片，朋友話日版白色Pampers、Merries好用，Huggies易漏。之前出席BB展，送左好多BB尿片Sample，因為size唔同，所以遲d先試到邊隻好。
477 期 (2016年7月)消委會出的《選擇月刊》有講嬰兒紙尿片，邊隻吸濕力高？邊隻最平？邊隻回滲嚴重？好有參考價值，非常建議大家去官網訂返果期嚟睇。
不過揀咩牌子都好，建議唔好一次過買咁多，因為BB大得好快，要睇佢出世幾重，同埋個Pat Pat幾大，有冇敏感，再決定買咩碼同咩牌子。我地暫時買左Huggies 0碼一包及白色Pampers NB兩包，應該一星期內用晒。
４）嬰兒洗衣液
我地之前買左樽思詩樂，另外加另一隻牌子BB柔順劑用，但唔知點解洗完d衫好硬。前幾日試左日本雅寶樂Arau嬰兒洗夜液試用裝，覺得勁好用！洗完d衫好軟熟，仲散發住天然薰衣草清香，仲要唔洗另外落柔順劑，價錢又唔係好貴。不過網上價同門市價差好遠：
800ml支裝，AEON賣$75，網上價$45。
720ml補充裝，AEON賣$48，網上價$32。
５）嬰兒尿疹膏
呢個我冇咩研究，人地話Mustela好用，我都係買一支看門口，如果pat pat紅先查。
６）乳頭膏 (羊脂膏)
好多人話Medela好用，用來塗nipple，唔洗過水，用完可以直接餵奶。如果俾BB啜損可以查，不過用人奶查乳頭會好得最快。
７）嬰兒沖涼盤
好多人買摺得果d款慳位，我地揀左呢個，三百幾蚊，勁sai位但好得意。最鍾意佢個軟墊，皇帝級享受，我地仲配埋佢條變色毛巾，會隨著水溫變色。
８）嬰兒沖涼液
我地都冇咩研究，買開沖涼盤見到順便買埋，暫時買左Mustela。
９）嬰兒清潔棉
之前買左一包思詩樂，朋友話Soft touch好用d，更易撕，下次我會試下。
 |
| AEON價：$32.9/包，150片 |
 |
護協價：$25
|
１０）脫脂棉花球
之前在護協買左包Soft touch。
 |
| AEON價：$28 |
１１）奶瓶清潔液 (洗奶樽液)
人地話NUK好用，所以我揀左NUK，其他牌子仲有chuchu pigeon arau 思詩樂。有d人話冇需要用，淨係清水洗就得，如果你啲樽係餵泵出來的人奶，就要用洗奶樽液，啲樽超油，齋水一定唔得。
１２）奶瓶消毒器
朋友俾左個Philips AVENT 我，勁開心！原本都想買呢隻。
１３）洗奶瓶刷
因為我用Philips奶樽，所以我買返Philips刷。
１４）奶瓶夾
在護協買左個最長的，夾頭仲可以180度旋轉。
１５）暖奶瓶器 (食物保暖座)
都係買左Philips AVENT 牌，門市價約$380，護協價$320。
１６）萬用清潔劑
原本冇諗過買，AEON見到呢支Babyganic好似幾好，免過水，買嚟看門口試下啦。
１７）ＢＢ包被/睡袋
我淨係買左包被，護協有隻七十幾蚊好薄嘅質地幾好，洗完唔會起毛粒。包被唔洗買好貴，薄薄地平平地果d已經得，太厚反而包唔實。包被嘅作用係令到BB有安全感，好似在媽媽個子宮入面咁。
ＢＢ包被：
十分好的包初生嬰兒方法，新手媽媽必睇
http://www.mammydaddy.com/product_details.php?id=1634
條片教點樣幫BB包被，好實用嘅教學，睇埋d comments好有用。
Youtube:
https://www.youtube.com/watch?v=vMBn-hdA3e8
因為已經好多被，所以冇買睡袋，朋友送左幾個睡袋俾我。
ＢＢ睡袋：三個步驟就可把BB包住，讓BB猶如在媽媽的子宮內而感到安全感，進而睡得更安全、更沉久，減少BB因蓋被而窒息的危險。
１８）ＢＢ紗巾
原本冇諗住買，因為聽講座d奶粉商送埋送埋已經十幾條，但朋友話依個要買好多，因為出一次街已經用十幾廿條，流口水、嘔奶、抹汗等等，好快就用好多條。紗巾都有分好多質地，759阿信屋有隻韓國出嘅質地最好，又抵買，$59/10條。不過唔係間間有得賣，要搵搵。加埋朋友送同自己買果d，我地而家已經有60-70條儲備^^"
１９）乳墊
用來放入胸圍內防止漏奶整濕，Pigeon日版最好。
２０）產後束腹帶
又係原本冇諗過買，但係產後子宮仲好似有左5個月咁，要等佢慢慢收縮，餵人奶可以加快子宮收縮，但係用埋收腹帶會更好。好多人話六甲村好，我就
淘寶淘左條平平地嘅用。
２１）奶粉
雖然話想餵人奶，但係我係唔堅持嘅媽媽。如果自己唔夠奶或BB食唔飽，必要時我都會補奶粉俾佢。咁眾多牌子應該揀邊隻奶粉呢？聽左好多媽媽意見，又網上做過research，最後揀左雪印，貪佢唔甜同埋食完白雪雪。
 |
| 奶粉比較圖 from testingmama.com |
２２）BB床上用品
呢個冇話邊隻好唔好，針數越高越滑，同埋睇公仔款，不過買最好趁百貨公司特價時買，平好多！某d牌子護協都有得賣。
２３）BB車
BB車最緊要安全，歐洲車大架，較重，但穩陣。日本車輕巧，但易反。有朋友俾左架Chicco我地，用住先。478 期 (2016年8月)消委會出的《選擇月刊》有講BB車，分析得好詳細，好有參考價值，非常建議大家去官網訂返果期嚟睇。
２４）BB High Chair
又係原本冇諗過買嘅野，就算係買都係六個月之後嘅事，但係咁啱有個Fd個朋友放二手，我個Fd話勁新淨，佢生兩胎都有用，話好好用，強烈建議我買。我地做過Research後，覺得都值得入手，所以買左。
Combi Rounju High Chair
至於值唔值得買，真係見仁見智，有d朋友冇買都好好地地。如果你都猶豫緊，可以睇下這篇文章，我地都係參考左佢用後感覺得唔錯所以買。
[父母必修課] 使用Combi High Chair一年之體驗及用後評價
２５）ＢＢ揹帶
而家d初生嬰兒揹帶主要分幾隻：Sling、冇Hip seat、有Hip seat。首先初生BB因為骨頭軟，未咁快需要用揹帶住，第二係有好多款，依個Topic可以講好耐，遲d等阿B出左世之後再講。
呼......一口氣寫左幾粒鐘，好攰呀，坐到pat pat都痺，希望以上資料幫到大家啦。
