Kai太的懷孕日記 @ 進入孕期最後階段了 (29w0d)

嘩，弘弘你越來越大隻喇。踏入29週，身體開始變得笨重，又開始半夜起身小便的日子，前日唔知係咪情緒太激動，分泌有少少淡粉紅色，好驚呀！有媽媽group內嘅媽媽bb在28週5d搶閘出世，成為group內的第一個bb，搞到我都驚弘弘會隨時走出嚟。37週就足月，仲有8星期乍，好快呀！呢排弘弘胎動好勁，郁來郁去，又大力，肉眼已經見到肚皮跳動喇

Kai太的懷孕日記 @ 有關孕婦胸圍

承上文，因為網上面好少人談及孕婦胸圍，難得今日買到兩款唔同價錢，又幾舒服的無鋼綫胸圍，希望分享下。

１）中價Bra — 「元氣媽咪」日本風孕哺內衣 $199@

第一款係護協買的「元氣媽咪」日本風孕哺內衣 ($199)，佢另外仲有一款「學院風孕哺內衣」幾Kawaii的前開鈕款 ($150)，但果款冇連胸墊。比較起上來，日本風好d，有胸墊同延長背鉤。

元氣媽咪 日本風孕哺乳內衣

元氣媽咪 學院風孕哺乳內衣

Kai太的懷孕日記 @ 廣華產前講座 + 護協購物記 (27w1d)

今個月係講座月，每個星期六都貢獻左俾產前講座。今朝都唔例外，去廣華聽「產後護理及營養」。聽完之後我地去左佐敦護協度買野，趁而家仲行得走得，要快ｄ買齊晒需要嘅ＢＢ用品先得。朋友話ＢＢ用品去護協買平ｄ，除左護協會員之外，用「惠氏媽媽會」卡都可以買。

香港護士協會（親子天地）
http://www.nurse.org.hk/
地址：九龍佐敦白加士街25-27號慶雲商業大廈一樓
電話：2314 6925
營業時間：星期一至五10:30 am - 7:00 pm；星期六10:30 am - 4:00 pm (星期日及公眾假期休息)

之前冇格過價，所以我都唔知實質平幾多。但係見到哺乳圍巾幾平，有兩款，大概七十幾至八十幾蚊，質地都ok，不過因為冇乜花揀，最後冇買到。事前無做功課，今次只係買左三樣野，澳洲Emotion & kids的純綿薄紗巾(120cm x 140cm)$84，SoftTouch嬰兒專用消毒綿花球$19/250粒，同埋孕婦胸圍。依樣野一樣想買好耐好耐，但係完全唔知應該買咩Size好！網上爬文都好少人分享...但係距離生嘅日子越近，個胸就越大，唔買仲keep住著有鋼綫嘅bra會對個胸好唔健康。依款幾好，有胸墊同延長背鉤。有關試著感，請看下篇。

Kai太的懷孕日記 @ 唔食飯無力頭暈 (26w6d)

今日中秋節，朝早食左個好豐富嘅早餐，公司放4點，所以下晝無出去食飯，怕食左飯夜晚食唔落，只係食左3/8舊雙黃白蓮蓉月餅，超過左1/4個。食完已經好飽，因為1/4舊月餅等如一碗白飯的熱量，飲埋杯水就走。點知放工後越來越唔舒服，全身無咩力，覺得好頭暈同缺氧，等別係人多嘅地方，同埋個肚皮好痺，硬晒咁。好不容易才捱到返屋企，飲左碗湯，食d飯，慢慢有返氣力。可能同我晏晝無食到飯有關，我仲以為食月餅有白飯嘅熱量就夠，原來真係唔可以無碳水化合物！

Kai太的懷孕日記 @ 廣華產檢 (26w5d)

26w6d，肚仔已經37.5吋喇, 重56.4kg 今日去廣華產檢，姑娘話我肚仔大小適中，胎水正常，如果keep住咁嘅進度，到時應該會好好生。哈哈，係就好喇∼姑娘有提話37週足月後就唔好飲d咁杰嘅湯水，因為會令到d奶水好杰，影響分泌。 姑娘聽弘弘心跳時，弘弘踢左姑娘兩腳，個胎心機一放落肚皮佢就踢，好百厭呢。 下次產檢係四週後，到時就要抽血化驗血糖，我一直最擔心嘅妊娠唐尿就會揭盅喇！

Kai太的懷孕日記 @ 「雅培」產前講座 媽媽學堂 (初生嬰兒護理知多少及湊B攻略)

今日出席左雅培舉辦的媽媽講座，在逸東酒店舉行，不過時間好早兼好長，10:15-12:45，對於我同老公都係一個挑戰^^"

雅培嘅講座一向搶手，一來唔係成日搞，二來座位有限，好似今日只限１００對父母參加，三來好難報名，之前有媽媽group send過資料出嚟，我試過打去報名，原來係特選媽媽先可以登記，所以每次在網頁見到講座資料已經爆滿。咁點先可以成為特選媽媽？可以在婦科診所內報名，然後等消息。如果有幸被選中，會收到短訊邀請優先登記，成功報名的媽媽會在講座五日前收到短訊或電郵通知申請是否成功。

Kai太的懷孕日記 @ 私家產檢 + 廣華講座 (26w1d)

每一次產檢心情都是興奮的！今日又去見我們的心肝寶貝弘弘b了～
對上一次照超聲波已經係7月30日照結構果日，差不多個半月前，真係等到頸都長。今次又去返尤醫生度，約左10:15am，等左55分鐘左右。一見面醫生同我地回顧返上次17週時嘅紀錄，佢話上次BB前臂同小腿長度爭少少，以威院個標準係合格，但以其他醫院個標準就短左少少，今次26週，目標係前臂4cm，小腿4.4cm。度之前有d緊張，因為已經好耐冇照過，唔知ＢＢ生長速度如何，照完後鬆一口氣，手仔有4.35cm長，腳仔有4.59cm長，重0.9kg (約2磅1安士)，符合標準。不過今次佢冇咁乖俾我地睇個靚樣喇，用對手仔遮住左，只係睇到個靚耳仔同腳仔。至於位置呢，而家頭仔向下，眼望我右邊身，所以而家佢郁都係右邊肚皮彈彈下。

Kai太的懷孕日記 @ 「雪印」產前講座 (坐月錦囊)

早前見到雪印有新嘅媽媽講座資料，次次都報唔到，今次終於俾我捕到，拿拿聲報左名。Topic係我好想聽的「坐月知識」，幸運地抽中左，超開心！

講座內容：

。坐月的重要及禁忌

。坐月的進補方法

。坐月食療

。掃風及換片示範

Kai太的懷孕日記 @ 「惠氏」孕媽咪1對1免費專業營養諮詢

早排收到惠氏媽媽會email邀請，免費登記參加「孕媽咪1對1免費專業營養諮詢」，可以由營養師為你做評估，及俾返懷孕飲食建議，出席後可獲得豐富禮物。我見位置就腳，時間就到，所以報左名參加，今日約見營養師。