Kai太的懷孕日記 @ 懷孕搭飛機 (6w3d)

過去一星期都有幾日流啡，在知道懷孕之前已經plan左要出公司trip，已經出晒機票，聽日就飛喇，仲要去日本......嚟緊下個月仲有個trip去Bali添。

心情一直好忐忑，應該飛？應該唔飛？
好多朋友知我情況咁，叫我同公司講唔好飛，有懷孕證明應該冇問題的。但係今次依個trip唔係去玩，要去傾好重要嘅野，而依樣野亦係其他人唔可以代我做的。掙扎左好耐......都係決定去。

記得家計會個姑娘講過，流啡係好多懷孕婦女都會出現嘅問題，因為初期個胎唔穩，點解會發生？有咩方法阻止？到目前為止醫學都係冇辦法。就算有d醫生會開黃體素安胎藥，幫助都不大，要靠媽咪本身，同埋BB嘅生命力。有d人做足所有安胎野，最後BB都係冇左，有d人由有左一直流啡流到生果日，BB都係順利出世。所以有d野係整定，係你始終係你的。

希望God Bless Me，BB唔好有事。

Kai太的懷孕日記 @ 又見紅 (5w4d)

今日又見紅，護墊有好淺好淺嘅粉紅色，我同Kai先生都有d擔心......
放工去左家計會睇，因為見醫生要預約，所以今次都係見姑娘。
姑娘聽完我形容，叫我繼續觀察下先，如果下次再見紅，可以直接去急症室。

另外姑娘問我有冇需要預約做「早期懷孕評估」，係俾12週內的產婦見醫生驗下個B，最快要4月尾先有得做，但係下星期公司要出trip......驚俾姑娘鬧，所以冇約。
今次淨係收左$25，冇開藥俾我。

Kai太的懷孕日記 @ 見紅 (5w3d)

今日BooBoo完見到粉紅，夜晚見到護墊有少少啡，有少少擔心。

Kai太的懷孕日記 @ 有關懷孕戒口 (5w2d)

開始有d反胃，成日頂住頂住咁。
而家飲食要好小心，唔知咩食得，咩唔食得。
每餐飯之前都要check一check先放心食。

不過網上面嘅人講嘅一時一樣，都唔知信得邊個。
例如：豬潤，香蕉，西瓜，海鮮...等，都係有d話食得，有d人話唔食得。

Kai先生在衛生署搵到依個資料，都幾有用，官方資料應該可靠d卦。

【懷孕及哺乳期的健康飲食】
http://www.fhs.gov.hk/tc_chi/health_info/woman/20036.html

Kai太的懷孕日記 @ 重左好多呀 (5w1d)

今日上磅已經50.3kg，110lbs喇！但係依10磅一定唔係BB架囉......

Kai太的懷孕日記 @ 廣華產科登記 - 我的猴BB

今朝一早去左廣華度登記，新手媽媽乜都唔識，已經生過兩胎的好友同我講，話我而家「時間就是金錢」，有左「懷孕證明」應該第一時間應該登記左醫院先，因為排期驗早期唐氏需要在11-13週期間做，錯過左黃金時間就要排中期唐氏，準確度低好多。

一早起身打左去醫院Check，知道九點就開門，所以Kai先生陪我在返工前去登記左先。產科新症預約在徐展堂門診大樓四樓，上到去排隊登記，填Form，等左一陣，醫院出左兩個產檢日期俾我，對清楚無問題就走得。
１）5月30日 驗唐氏
２）6月28日 產檢

不過提提大家：
．登記產科要帶埋住址證明，去之前Check清楚係咪果區先，如果唔係醫院有可能唔收。
．懷孕證明醫院會收左，如果你得一張Copy，最好預先影印定留底。

一直好想生猴BB，但係人生計劃又未ready，所以一直十五十六，而家個天幫我地決定埋，一次過完晒我嘅心願☺️

Kai太的懷孕日記 @ 真的Bingo了！

上午Check到之後，夜晚去左家計會驗多次，拎懷孕證明。在家計會度驗，幾秒就出結果，證實懷孕，姑娘都話：「恭喜你地，真係中獎喇！」見到果一刻，仍然覺得感覺好唔真實，我就嚟做人媽媽喇～姑娘開左樽葉酸俾我，叫我頭３個月都要食。我問佢洗唔洗戒口，佢就話飲食均衡就得，食葉酸就夠。同埋姑娘有叮囑我，如果這段期間有咩事，見血見啡就要立即去醫院。是次檢查收費：見姑娘$25，驗孕$70，葉酸(100粒)$70。

Kai太的懷孕日記 @ 疑似懷孕

自從4月6號開始，MM一直無嚟，遲左8日，上星期驗好似無懷孕，尋日再驗多次，好似都無乜，但係瞓醒之後再執返嚟睇，竟然見到一深一淺⋯成日囉囉亂，今朝再check多次，同Kai先生一齊靜候結果，初時左右邊果條線好快就深色，然後左手邊果條慢慢顯現出嚟。似乎真係中左baby了！
今次心情平伏d喇，我地已經接受左依份天賜嘅禮物。而家首先係搵左醫生確認先，同埋要開始戒口喇。